Eyjafréttir

Löggæsla hefur verið efld frá fyrra ári og fíkniefnalöggæsla er öflug eins og alltaf áður. Nú verður mikil löggæsla og ekki síst fíkniefnalöggæsla í Landeyjahöfn á vegum lögreglunnar á Hvolsvelli sem njóta aðstoðar lögreglunnar á Selfossi. Að auki mun sérstakt teymi fíkniefnalögreglu­manna á vegum ríkislögreglustjóra sinna eftirliti og munu koma yfir til Eyja til aðstoðar en einnig aðstoða uppi á landi á aðkomustöðum til Vestmannaeyja.

Ríflega 11.600 farþegar eiga bókað far til Eyja vikuna og dagana fyrir þjóðhátíð en reikna má með að einhver hluti farþega með Herjólfi fyrri part viku hafi verið í dagsferðum. Ef farið er yfir flutningstölur frá síð­ustu þjóðhátíð þá komu 9.400 þjóðhátíðargestir með Herjólfi og flugi en nú má allt eins má reikna með um 12.000 manns ef allt er talið. Heimamenn í Dalnum eru líklega um tvö þúsund þannig að reikna má með í kringum 14.000 manna þjóðhátíð. Í fyrra voru gestir tæplega 10.000 þegar mest var.

Í dag var gerð áhugaverð tilraun þegar reynt var að koma skipulagi á tjöldun hvítu tjaldanna á þjóðhátíð.  Til þessa hefur verið hálfgert skipulagsleysi þegar kemur að því að finna tjaldinu pláss en nú var ákveðið að láta slag standa, hælun tjaldplássa yrði ekki leyfð fyrr en á slaginu 18:00 og var fengin fallbyssa til að gefa merki.  Tjaldbúar biðu spenntir og minnti uppákoman helst á villta vestrið þegar hleypt var á ný landsvæði.  Og þótt fallbyssan hafi klikkað, beið fólk þar til klukkan á stóra sviðinu sló 18:00 og hljóp þá af stað.  Myndir og myndband af viðburðinum má sjá hér að neðan.

„Tjaldbúarnir og þeir sem ætla á þjóðhátíð fara að koma. Traffíkin í dag hefur ekkert verið meiri en venjulega þar sem það hefur alltaf allt verið fullskipað frá því að höfnin opnaði,“ segir Sigmar Jónsson. Hann segir farið að bæta við ferðum á morgun en þá verða farnar átta ferðir. Farnar verði sex, sjö og átta ferðir á sólarhring yfir verslunarmannahelgina. Venjulega eru farnar fjórar ferðir mánudaga til miðvikudaga en fimm ferðir hina dagana.

Í dag klukkan 18.00 hefst tjöldun hvítu tjalda þjóðhátíðarinnar en þá finna heimamenn tjaldinu sínu stað.  Gera á tilraun í ár með að jafna leikinn þannig að allir fari af stað á sama tíma, nema hvað starfsmenn þjóðhátíðarnefndar fá að velja sér pláss á undan öðrum og eru það laun þeirra.  Oftast nær er talsverður slagur um að finna besta plássið en aldrei hefur verið hægt að standa við tímasetningar fyrr en nú.  Eða hvað?