Eyjafréttir

Mánudaginn 23. janúar opnum við í Einarsstofu í Safnahúsinu sýningu um eldgosið sem við nefnum Eldgos – aflvaki sagna og sigra.  Á sýningunni getur að líta margvíslegar heimildir úr Bóka-, Skjala- og Byggðasafni um örlagadaga Vestmannaeyja. Jafnframt höfum við tekið saman listaverk eftir ýmsa listamenn úr Eyjum er grunlausir mála svæði er síðar varð horfinn heimur.

Uppistand þeirra Péturs Jóhanns Sigfússonar og Þorsteins Guðmundssonar, Steini, Pési og gaur á trommu, mun fara fram í Höllinni, en ekki Kiwanis eins og áður var auglýst. Þetta er gert vegna mikilla eftirspurnar eftir miðum en salurinn í Kiwanis tekur aðeins 200 manns í sæti á meðan í Höllinni komast auðveldlega fyrir 500 áhorfendur.

Þrettándahátíðinni í Eyjum lýkur í kvöld með afar vönduðum og góðum tónleikum þar sem nokkrir af bestu tónlistarmönnum landsins koma saman til að leika lög Oddgeirs Kristjánssonar.  Þetta eru sömu tónleikar og voru í Hörpunni í nóvember á síðasta ári en þeir tónleikar fengu einróma lof.  Forsala miða heldur áfram í dag, sunnudag í versluninni La Tienda við Strandveg milli 13 og 16.

Þrettándinn er sannkölluð bæjarhátíð í Eyjum en hátíðahöldin hófust síðastliðinn fimmtudag.  Þótt um sé að ræða fjögurra daga bæjarhátíð, þá náði hún hámarki sínu í gær, föstudag á hinum eiginlega þrettánda degi jóla þegar Þrettándagleði ÍBV fór fram.  Hún hófst með blysför frá Hásteini eftir myndarlega flugeldasýningu og var gengið fylktu liðið upp á malarvöll við Löngulág þar sem jólasveinar, álfar og tröll heilsuðu upp á börn og fullorðna en á miðjum vellinum logaði myndarlegur bálköstur.  Sjón er í raun sögu ríkari en með fréttinni fylgja bæði myndir og myndband.