Eyjafréttir

Nú er unnið að því að setja upp leikritið Fullkomið brúðkaup, eftir Robin Hawdon, hjá Leikfélagi Vest­mannaeyja.  Leikfélag Akur­eyrar sýndi leikritið við gríðarlega miklar vinsældir veturinn 2005 til 2006, bæði norðan heiða og í Borgarleik­húsinu í Reykjavík.  Um er að ræða bráðfyndinn farsa en slíkt hefur alltaf gengið vel í Eyjumenn.  
 

Brúðguminn vaknar með konu sér við hlið sem hann hefur aldrei séð fyrr.  Hver er þessi kona? Hvað gerðist kvöldið áður? Hann flækist inn í atburðarás sem hann ræður ekkert við, brúðurin á leiðinni, herbergið í rúst, nakin kona í rúminu og þá er bankað, eins og leikritinu er lýst á vefsíðunni Gríman.is.
 

Ari Matthíasson leikstýrir verkinu hjá Leikfélagi Vestmannaeyja en sex leikarar stíga á svið, þau Sindri Ragnarsson, Vilhjálmur Bergsteins­son, Hjalti Pálsson, Emma Bjarna­dóttir, Ásta Jóna Jónsdóttir og Elín Sólborg Eyjólfsdóttir.  Ari sagði í samtali við blaðamann Frétta að leikarahópurinn væri góður.  „Þetta er breiður aldurshópur, frá 18 ára og upp í fertugt sem hentar verkinu mjög vel.  Sumir eru að stíga sín fyrstu skref á sviðinu á meðan aðrir eru orðnir mjög reyndir og það er góð þróun fyrir áhugamannaleikhús því það þarf alltaf að vera ákveðin endurnýjun.  Við fengum líka mikið af efnilegu fólki í prufur en þegar allt kemur til alls þá þurfti m.a. að velja í hlutverk eftir aldursamsetn­ingu hópsins.  Pabbinn gat t.d. ekki verið á sama aldri og brúðurin.  Auk þess er kostur að hafa breiðan aldurshóp í svona verki.“
 

Ari sagði að stefnan væri að frumsýna föstudaginn 19. mars næst­komandi eða eftir rúmar tvær vikur.  „Við byrjuðum að æfa í byrjun febrúar þannig að æfingaferlið er um það bil sjö vikur.  Það er eðli­legt.  Stundum er æfingaferlið tveir mánuðir en maður verður að huga að aðstæðum í bæjarfélaginu.  Hér er vertíð og ekki hægt að halda fólki endalaust á æfingum.  Þetta er auk þess áhugamannaleikhús og því ekki hægt að ætlast til þess að fólk standi á æfingum í sex klukkutíma eftir erfiðan vinnudag.  Það er ákveðin kúnst að halda álaginu réttu svo að leikararnir fái hreinlega ekki nóg.“
 

Auk leikaranna sex koma fjöl­margir að uppsetningunni.  „Anton Eggertsson hefur umsjón með leikmyndinni, Gíslína Dögg Bjarka­dóttir sér um búninga, smink og leikmynd og Viktor Rittmuller um lýsingu.  Þau hafa svo herskara af fólki með sér þannig að fyrir utan þessi sex sem standa á sviðinu, er stór hópur fólks sem hjálpar til.“
 

Hvernig líkar þér að vinna hjá Leikfélagi Vestmannaeyja?
„Mér líkar það mjög vel.  Aðstað­an hér er mjög fín, leikarahópurinn er sterkur og stjórnin er að standa sig mjög vel.  Mér skilst að stund­um hafi vantað eldri leikara í hópinn en við erum með breiðan aldurshóp núna.  Samfélagið á Íslandi er auk þess að breytast og það hjálpar áhugaleikhúsum eins og hér að fá fólk til starfa.“
 

Ari lofar Eyjamönnum góðri skemmtun 19. mars og á sýning­unum sem fylgja í kjölfarið.  „Þetta leikrit er gamanverk fyrir alla fjölskylduna.  Fullkomið brúðkaup er farsi af bestu gerð sem fjallar um misskilning og vandræði sem karlar geta komið sér í þegar litli heilinn fær að ráða för,“ sagði Ari að lokum.