Eyjafréttir

Fréttir af aukinni skjálftavirkni í Eyjafjallajökli hafa vakið upp spurningar meðal Eyjamanna um hvernig eldgos í jöklinum gæti haft áhrif í Eyjum.  Þannig er vatnsból Eyjamanna við rætur jökulsins og Landeyjahöfn gæti verið í hættu ef jökulhlaup yrði í kjölfar eldgoss.  Almannavarnarnefnd Vestmannaeyja fundar í dag vegna málsins en Elliði Vignisson, bæjarstjóri og varaformaður nefndarinnar segir að fundurinn sé ekki haldinn vegna þess að um bráða hættu sé að ræða.

„Við fundum á eftir í almannavarnarnefnd til að fara yfir stöðuna.  Við eigum ýmiskonar áætlanir við hverskonar vá, þar á meðal eldgosi í Eyjafjallajökli og mögulegu hlaupi í kjölfarið.  Á eftir förum við m.a. yfir þau.  Í augnablikinu erum við þó fyrst og fremst að hugsa um vatnsbólið.  Störfin nú eins og endranær ganga út á að undirbúa hið versta en vona hið besta.  Enn sem komið er bendir ekkert til þess að neinskonar hætta steði að okkur Eyjamönnum hvað þetta varðar, hvorki vantsbólinu, né öðru.  Fundurinn á eftir er því á engan mátt boðaður vegna þess að við teljum bráða hættu á ferð. Við erum bara að fara yfir stöðuna,“ sagði Elliði.

 

Síðasta gos í Eyjafjallajökli var 1821 - 1823 og þar á undan árið 1612. Um landnám Íslands er einnig talið að gosið hafi í jöklinum. Gos í Eyjafjallajökli hafa almennt ekki verið hamfaragos, þau byrja rólega en færast svo í aukana. Árin 1994 og 1999 var mikil jarðskjálftavirkni í Eyjafjallajökli og talið að kvikuinnskot hafi verið djúpt í fjallinu, sem ekki náði að komast upp á yfirborðið, segir í frétt á www.dv.is