Eyjafréttir

Leikmenn og stuðningsmenn enska úrvalsdeildarliðsins Portsmouth, sem Eyjamaðurinn Hermann Hreiðarsson leikur með, hafa ekki haft mikla ástæðu til að fagna í vetur.  Liðið er í neðsta sæti, vandræði utan vallar hafa loðað við félagið í allan vetur og nú síðast voru dregin níu stig af félaginu, sem veldur því að örlög liðsins eru nánast ráðin í ensku deildarkeppninni.  En annað er upp á teningnum í FA-bikarkeppninni þar sem Portsmouth er nú komið í undanúrslit sem verða leikin á þjóðarleikvanginum Wembley.

Portsmouth lagði annað úrvalsdeildarlið að velli, Birmingham á heimavelli sínum 2:0.  Hermann lék allan tímann í hjarta varnarinnar og stóð að venju fyrir sínu og gott betur.

 

Portsmouth þekkir ágætlega til þess að spila stóra bikarleiki á Wembley en félagið vann FA bikarinn veturinn 2007-2008 með því að leggja Cardiff að velli.  Hermann lék allan tímann, kinnbeinsbrotnaði m.a. í leiknum en lét slíka smámuni ekkert stoppa sig.