Eyjafréttir

Á fundi bæjarráðs var m.a. tekin fyrir staða Heilbrigðisstofnunar Vestmannaeyja.  Gunnar Gunnarsson, forstjóri stofnunarinnar og Eydís Ósk Sigurðardóttir, hjúkrunarforstjóri komu á fundinn og kynntu bæjarráði stöðun.  Í máli þeirra kom m.a. fram að niðurskurður á rekstrarfé stofnunarinnar hafi skert þjónustustig stofnunarinnar, sérstaklega hvað varðar skurðdeildina.  Gert er ráð fyrir því að skurðstofunni verði lokað í sex vikur í sumar og öðrum niðurskurðaraðgerðum beitt enda liggur fyrir aukinn niðurskurður.  Bæjarráð lýsir yfir áhyggjum af grunnþjónustu stofnunarinnar.

Bæjarráð lýsir yfir áhyggjum af niðurskurði á grunnþjónustu Heilbrigðisstofnunar Vestmannaeyja. Enn og aftur veldur það umtalsverðum vanda fyrir samfélagið að hafa ekki stjórnunarlega aðkomu að grundvallar þjónustu þess. Af þeim sökum á samfélagið erfitt með að sinna nauðsynlegri hagsmunagæslu á viðsárverðum tíma.

 

Með tilliti til þessa felur bæjarráð bæjarstjóra að kanna forsendur fyrir, og eftir atvikum að ráðast í úttekt á Heilbrigðisstofnun Vestmannaeyja hvað varðar rekstrarþætti og samfélagslegt mikilvægi stofnunarinnar. Af sjálfsögðu verður slíkt gert í góðu samráði við heilbrigðisyfirvöld.

 

Meðal annars skal horft til og ljósi varpað á eftirfarandi þætti:

Raunkostnaðar vegna inngripa (skurðaðgerðir og fæðingar) í samanburði við LSH

Vegið meðaltal launa Heilbrigðisstofnunar Vestmannaeyja og samanburð við LSH

Hlutfall reksturs og launakostnaðar

Hvaða þjónustu Sjúkrahús Vestmannaeyja getur veitt og á hvaða verði, ef skurðstofur eru fullnýttar

Helstu sóknarfæri stofnunarinnar

Kostnað sem leggst á sjúklinga/sjúkratryggingar ef þjónusta er flutt til Reykjavíkur

Ferðir sjúklinga metnar m.t.t. öryggis og óþæginda

Samfélagsleg áhrif, dæmi: áhættufæðingar fluttar til LSH, hversu lengi verðandi mæður eru frá fjölskyldu sinni og hver ber kostnaðinn.