Eyjafréttir

Goslokahátíð Vestmannaeyjabæjar verður haldin hátíðleg um næstu helgi með fjölbreyttri skemmtidagskrá fyrir alla fjölskylduna. Að hátíðinni er enginn aðgangseyrir og dagskrá helgarinnar bæjarbúum og gestum að kostnaðarlausu. Goslokanefnd hefur lagt áherslu á að bjóða ávallt upp á metnaðarfulla barnadagskrá þessa helgi og verður engin undantekning gerð á þetta árið. Merki goslokahátíðar verður til sölu fyrir þessa hátíð og munu sölubörn ganga í hús auk þess sem merkin verða til sölu í upplýsingamiðstöð ferðamanna í Eymundsson og á byggðasafninu.

Merkið kostar 1.000.- kr. og verður ágóða sölunnar varið í barnadagskrá hátíðarinnar og er ætlað að tryggja að ætíð verði hægt að standa fyrir veglegri dagskrá fyrir fjölskyldufólk. Það er von mín og trú að allir þeir sem ætla að njóta goslokahátíðarinnar muni sjá sóma sinn í því að festa kaup á slíku barmmerki og bera það yfir hátíðina. Ég skora hér með á alla Eyjamenn og gesti til þess að kaupa merki hátíðarinnar, bera það með stolti og leggja þannig sitt af mörkum til vandaðrar dagskrár.