Eyjafréttir

KFS tapaði í annað sinn í kvöld fyrir Árborg en liðin mættust nú á gervigrasinu á Selfossi.  Selfyssingar höfðu betur á Hásteinsvelli um helgina 0:2 og ljóst að róðurinn var ansi erfiður fyrir Eyjamenn.  Ekki bætti úr skák að heimamenn komust í 1:0 í fyrri hálfleik og bættu svo við öðru marki sínu strax í upphafi síðari hálfleiks.  Þar með þurfti KFS að skora fjögur mörk en Árborg fékk ekki mörg mörk á sig í sumar á heimavelli.

Bjarni Rúnar Einarsson náði þó að minnka muninn úr vítaspyrnu á 61. mínútu en heimamenn bættu við þriðja markinu áður en yfir lauk og lokatölur því 3:1.  KFS er þar með úr leik í úrslitakeppninni en Árborg mætir Tindastóli í undanúrslitum.