Eyjafréttir

ÍBV er komið í úrvalsdeild á ný í kvennaknattspyrnunni en þar var liðið síðast sumarið 2005.  Stelpurnar unnu Keflavík í dag 4:1 og samanlagt 8:1 í einvíginu og eru því vel að því komnar að spila meðal þeirra bestu að ári.  Sigur ÍBV var aldrei í hættu og í raun var Keflavík aldrei líklegt til að koma í veg fyrir að Eyjastelpur kæmust upp.  Leikmenn og forráðamenn fögnuðu svo vel og innilega í leikslok enda varð liðið af sæti í úrvalsdeild síðasta sumar með dramatískum hætti.

Það þurfti greinilega ekkert að minna stelpurnar á hrakfarirnar fyrir ári síðan þegar FH skoraði jöfnunarmark í uppbótartíma og kom í veg fyrir að ÍBV spilaði í úrvalsdeild í sumar.  Leikmenn voru einbeittir á að láta slíkt ekki endurtaka sig, unnu glæsilegan útisigur í Keflavík 0:4 og gerðu svo það sem þurfti í leiknum í dag.

 

ÍBV hafði talsverða yfirburði á Hásteinsvellinum.  Edda Birgisdóttir skoraði eftir aðeins 9. mínútna leik þannig að Keflvíkingar þurftu þar með að skora fimm mörk til að komast áfram.  Þær minntu á sig á 18. mínútu þegar Nína Ósk Kristinsdóttir jafnaði fyrir Keflavík en í kjölfarið komu þrjú mörk frá ÍBV.  Kristín Erna Sigurlásdóttir kom ÍBV aftur yfir á 23. mínútu, Lerato Kgasago bætti við þriðja markinu á 33. mínútu og Edda skoraði svo annað mark sitt og fjórða mark ÍBV á 36. mínútu.  Lerato var svo nærri því að koma ÍBV í 5:1 undir lok fyrri hálfleiks þegar hún skaut í þverslánna.

 

Síðari hálfleikur var svo frekar bragðdaufur.  Bæði lið fengu tækifæri til að skora og átti Eva Kristinsdóttir, leikmaður Keflavíkur gott skot í slánna.  En nær komust Keflvíkingar ekki og Eyjastúlkur fögnuðu vel og innilega í leikslok enda sæti í úrvalsdeild að ári í höfn.