Reynið bara að stöðva mig

Reynið bara að stöðva mig

Forsetakosningar 2016 | Vil hlusta á fólkið í landinu og leggja því lið

Ég vil vera málsvari þeirra sem minna mega sín og standa vörð um grundvallarréttindi allra. Kæru Eyjamenn! Ég vil byrja á að þakka ykkur kærlega fyrir þær yndislegu móttökur sem þið veittuð okkur Elísu í heimsókn okkar til Eyja dagana 7. til 8. júní. Síðustu vikur höfum við hjónin verið á fleygiferð um landið, sem hefur verið fjörleg og skemmtileg, en eitt af því sem helst stendur upp úr í hugum okkar beggja er heimsóknin til Eyja. Hún rennur okkur seint úr minni og verðum við ævinlega þakklát fyrir gestrisnina, þann hlýhug og þá góðvild sem okkur var hvarvetna sýnd. Vestmannaeyjar eru einstakur staður og það vitið þið heimamenn líklega manna best. En glöggt er gests augað; náttúrufegurðin er ótrúleg, sagan mögnuð og fólkið hugmyndaríkt og kraftmikið. Þetta birtist meðal annars í einkar öflugu atvinnulífi og verðmætasköpun, blómlegri menningarstarfsemi og svo auðvitað einu öflugasta íþróttafélagi heims miðað við höfðatölu. Dvöl okkar í Eyjum var viðburðarík og dagskráin þétt. Fyrst sóttum við fróðlega vinnustaðafundi þar sem okkur gafst færi á að kynnast starfsemi sjávarútvegsfyrirtækja frá fyrstu hendi og þeirri mögnuðu blöndu hugvits og atorkusemi sem þar ræður ríkjum. Við áttum einnig gott spjall við starfsfólk á heilsugæslunni og heimilisfólk á Hraunbúðum sem tók afar vel á móti okkur. Þar fyrir utan áttum við líka fjölmörg skemmtilegt samtöl við heimamenn hér og þar, hvort sem það var niðri við höfn, á vappi um bæinn eða yfir kaffibolla í Skýlinu. Það var ánægjulegt hvað fólk var ófeimið að spjalla og spyrja. Fólk er þó misjafnlega málglatt eins og gengur og mér er minnisstæð konan sem vatt sér upp að mér í Skýlinu með útrétta hönd og sagði einfaldlega: „Sæll, ég ætla að kjósa þig!“ Síðan gekk hún rakleitt að afgreiðsluborðinu og hélt áfram að sinna sínu. Engar óþarfa málalengingar þar. Á milli funda og vinnustaðaheimsókna gafst okkur tími til að sprikla aðeins og frílysta okkur. Við skelltum okkur til dæmis í sund í glæsilegri sundhöll Eyjamanna auk þess sem við fórum í Sprönguna þar sem mér tókst að spranga nokkurn veginn klakklaust, þrátt fyrir að vera á lakkskóm. Einhverjum þótti frammistaðan „ágæt miðað við aldur“ en ég lagði nú ekki í að leika eftir þær listir sem Gunni Ella Pé sýndi viðstöddum við þetta tækifæri.   Fundurinn hápunkturinn Hápunktur ferðarinnar var opinn fundur í skemmtilegum húsakynnum Sagnheima. Starfsfólk Safnahúss hafði sett upp fróðlega sýningu í anddyrinu um sögu forsetaembættisins sem mér þótti afar áhugaverð. Fundurinn var vel sóttur og líflegur og fundargestir spurðu um allt milli himins jarðar. Fyrsta spurningin var spurning sem Þóra Arnórsdóttir fékk oft á sínum tíma: Hvernig ég gæti sinnt þessu mikla embætti með öll þessi börn! Ég var einnig spurður um afstöðu mína til helstu ágreiningsmála, til dæmis varðandi stjórnarskrárbreytingar og Evrópusambandið. (*) Að fundi loknum áttum við Elísa notalega stund á Slippnum áður en við héldum á gistiheimilið Hamar.    Hitta fólk og hlusta  Það sem mér hefur þótt skemmtilegast á ferðum mínum undanfarnar vikur er að hitta fólkið í landinu og hlusta á hvað það hefur að segja. Þar er auðvitað af ýmsu að taka en ef ég ætti að velja tvö orð til að lýsa því hugarfari sem ég skynjaði hjá ykkur Eyjamönnum þá tel ég að orðin bjartsýni og sóknarhugur fangi það vel. Þetta hugarfar er smitandi og veitti mér góðan innblástur fyrir kosningabaráttuna. En þrátt fyrir bjartsýnina og drifkraftinn þá heyrði ég líka áhyggjuraddir. Nú hafa til dæmis margir áhyggjur af því að ekki sé lengur hægt að fæða börn í Vestmannaeyjum. Þó ég hafi reynt að slá á létta strengi með því að leggja til að Eyjamenn samræmdu fæðingardaga barna sinna með einhverjum hætti þá er þetta auðvitað alls ekkert gamanmál. Áhyggjurnar eru réttmætar. Í mínum huga er algjört grundvallaratriði að við tryggjum að allir Íslendingar njóti ákveðinna lágmarksréttinda, óháð því hvar þeir kjósa að búa.   Ósýnilegt ræðupúlt Þó forseti geti ekki haft beint áhrifavald í málum sem þessu þá hefur hann óbeint áhrifavald sem getur skipt sköpum. Því hvar sem forseti fer hefur hann meðferðis „ósýnilegt ræðupúlt“, eins og ég orðaði það á fundinum í Sagnheimum, og þar af leiðandi getur hann leitt umræðu um mikilvæg mál er varða hagsmuni landsmanna. Það skellir enginn á þegar forsetinn hringir. Nái ég kjöri vil ég vera forseti allra Íslendinga. Ég vil hlusta á fólkið í landinu og leggja því lið. Ég vil vera málsvari þeirra sem minna mega sín og standa vörð um grundvallarréttindi allra. Ég hef lagt áherslu á að forseti standi utan og ofan við fylkingar í landinu og sé ekki með einum í liði á móti öðrum; að forseti dragi fólk ekki í dilka. Mér þykir mikilvægt að forseti virði alla Íslendinga jafnt og hefji sig þannig yfir dægurþras stjórnmálanna. Þá hef ég talað fyrir því að forseti sé bjartsýnn og hafi ekki allt á hornum sér, enda þekkjum við öll úr daglegu lífi að bjartsýni gerir öll viðfangsefni okkar auðveldari viðureignar. Við höfum ekkert að óttast. Ef við erum óhrædd við breytingar og óhrædd við að treysta lýðræðinu, ef við stöndum saman og látum mótlæti ekki sundra okkur, þá eru okkur allir vegir færir. Þá mun okkur farnast vel. Við Elísa hefðum gjarnan viljað staldra lengur við í Vestmannaeyjum en því miður var tíminn af skornum skammti í þetta skipti og sigldum við í land snemma morguns 8. júní til að halda áfram för okkar um Suðurland. Það er hinsvegar morgunljóst að hvernig sem kosningarnar fara þann 25. júní þá hlökkum við mjög til að sjá ykkur aftur. Takk fyrir okkur!    

Samfélagsleg sátt rofin

Á Íslandi er bara ein borg, hún heitir Reykjavík. Mikilvægi hennar fyrir þjóðina er mikið. Í gegnum styrk hennar vegum við upp aðdráttarafl erlendra borga. Þar höfum við byggt upp stjórnsýsluna, fjármálakerfið, dómskerfið, helstu menningarstofnanir, helstu háskólastofnanir, sérhæfða heilbrigðisþjónstu og annað það sem þjóðin þarf á að halda. Til grundvallar þessu liggur ákveðin samfélagssátt. Í grófum dráttum er sáttin fólgin í því að landsmenn sameinist um þessa uppbyggingu –þótt stundum sé það með semingi- og á móti gegni borgin ákveðinni höfuðborgarskyldu. Bregðist borgin þessari skyldu er hætt við að sáttin rofn     Aðgengið skiptir máli Meðal helstu skyldu borgarinnar er að auðvelda landsmönnum öllum aðgengi að þessum sameiginlegu stofnunum. Aðgengi landsmanna að þjónustunni í borginni er í lang flestum tilvikum háð flugi og/eða einkabílum. Núverandi borgaryfirvöld hafa hinsvegar með einbeittum hætti lagt risavaxnar hindranir í veg utanbæjarfólks með árásum á þetta aðgengi. Fyrst með fordómum gagnvart einkabílnum og svo með fordæmalausum árásum gegn þeirri lykilæð sem Reykjavíkurflugvöllur er.     Bregðast skyldum sínum Vafalaust þykir nú einhverjum sem ég seilist langt með kröfum gagnvart höfuðborginni. Ég er jú af landsbyggðinni og ætti sennilega í huga einhverra að halda mig til hlés þegar kemur að borgarmálum. Það er þó í mínum huga ekkert óeðlilegt að ég sem kjörinn fulltrúi á landsbyggðinni bendi á að núverandi borgaryfirvöld eru að bregðast skyldu sinni sem leiðtogar höfuðborgarinnar og þar með að vega að þeim samfélagssáttmála sem ríkt hefur.     Við leggjum öll til uppbyggingar í Reykjavík Við eigum nefnilega öll jafna heimtingu á þjónustu ríkisstofnana sem greiddar eru af okkar sköttum a.m.k. til jafns á við það sem gengur og gerist meðal borgarbúa. Íbúar í Vestmannaeyjum greiða 5527 milljónir á ári umfram það sem ríkið nýtir í nærþjónustu í Vestmannaeyjum. Þannig er sagan víða um land. Þetta fé nýtist að mestu leyti í uppbyggingu á þeirri miklu þjónustu sem er í höfuðborginni.     Sjálfsagður réttur að geta nýtt hina sameiginlegu þjónustu Við á landsbyggðinni hljótum að gera ráð fyrir því að það þyki sjálfsagður réttur okkar að geta á einfaldan og aðgengilegan máta nýtt okkur þá þjónustu sem við öll greiðum fyrir. Við viljum að hægt sé að fljúga sjúkum sem næst sérhæfðri hjúkrunarþjónustu. Við viljum geta á sem greiðastan máta ekið til Reykjavíkur og komist á okkar einkabíl að stofnunum og fengið þar bílastæði. Við þurfum að geta flogið með almenningsflugi í borgina, sinnt þar erindum og komist sem fyrst til okkar heima. Við viljum að borgin sinni þeirri skyldu sem nauðsynleg er og beri virðingu fyrir hlutverki sínu sem höfuðborg okkar allra.     Virða á sáttmálann Á sama máta viljum við að borginni sé vel stjórnað og að sómi sé af henni. Hún er höfuðborg allrar þjóðarinnar, andlit okkar og gróðurmold margra tækifæra allra landsmanna. Við viljum að borgin sé sterk og þar þrífist öflugt mannlíf. Þótt sannarlega teljum við mörg að fastar mætti stíga fram í að dreifa ákveðnum störfum um landið þá erum við algerlega tilbúin til að halda áfram þeim allra stærsta byggðastyrk í sögu þjóðarinnar sem fólgin er í því að þjappa saman stjórnsýslu og lykilstofnunum í Reykjavík. Okkur þykir á sama máta sjálfsagt að höfuðborgin okkar hafi ríkan rétt sem slík og þar á meðal að samráð sé haft við stjórnendur hennar og íbúa um þær ákvarðanir ríkisstjórnarinnar og þings sem snerta mikilvæga hagsmuni borgarbúa, svo sem atvinnutækifæri, skipulag og yfirbragð. Allt þetta er þó með fyrirvara um að borgaryfirvöld virði þann óskrifaða samfélagssáttmála sem í gildi hefur verið áratugum saman.     Fordæmalaus skref í átt að rofi á samfélgssáttmála Borgarstjórn Reykjavíkur undir stjórn Samfylkingar, Bjartrar framtíðar, Vinstri grænna og Pírata hafa stigið fordæmalaus skref í átt að rofi á samfélagssáttmála um hlutverk höfuðborgarinnar. Það er áhyggjuefni ef áfram skal halda í þá ógæfuátt. Staðreyndin er sú að þótt á stundum kunni okkur að greina á um áherslur þá þurfum við hvert á öðru að halda, íbúar í landsbyggðunum og íbúar í borginni. Við erum heilt yfir hvert öðru velviljug. Grunnurinn að áframhaldandi sátt er að borgaryfirvöld sinni hlutverki sínu og sjái sérstaklega sóma inn í því að hindra ekki íbúa landsbyggðarinnar í því að sækja þangað hina sameiginlegu þjónustu.   Elliði Vignisson birti þessa færslu fyrst á heimasíðu sinni.  

Forsetakosningar 2016 | Reynsla, dómgreind og þor

Við Íslendingar vitum hversu mikilvægt það er að forseti Íslands hafi burði og þor til að taka erfiðar ákvarðanir og verja hagsmuni lands og þjóðar. Á ögurstundu má dómgreind ekki bresta en treysta á reynslu og þekkingu á íslenskri stjórnsýslu, stjórnmálum, menningu og atvinnulífi. Það er ekki aðeins eðlilegt og sanngjarnt, heldur nauðsynlegt, að gerðar séu kröfur um að sá er gegnir embætti forseta geti mótað sér sjálfstæðar skoðanir í mikilvægum málum og tekið ákvarðanir af yfirvegun. Þá er ekki hægt að taka mið af dægurvinsældum, bogna undan þrýstingi áhrifaafla eða láta raddir hinna háværu en fámennu hafa áhrif. Sá sem gegnir embætti forseta hverju sinni mótar embættið með sínum hætti. Í aðdraganda kosninganna hef ég lagt áherslu á að breyta í nokkru inntaki forsetaembættisins. Ég vil færa forsetann að fólkinu og fólkið að forsetanum – bjóða öllum landsmönnum heim að Bessastö um – gera Bessastaði að sannkölluðu þjóðarheimili. Forseti sem þekkir þjóðarsál Íslendinga og er hreykinn af landi og þjóð, án hroka eða yfirlætis, getur stuðlað að meiri sátt í þjóðfélaginu. Á komandi misserum og árum er mikilvægt að við hugum sameiginlega að innviðum samfélagsins og þá ekki síst hinum andlegu innviðum, tökumst á við óróann og ósættið sem hefur náð að grafa um sig í samfélaginu. Þar getur forseti gegnt lykilhlutverki. Um leið og forseti plægir jarðveg sátta verður hann að hafa kjark til að stöðva þöggun og brjóta niður umræðubann um tiltekna þætti í samfélaginu. Forsetinn þarf því að vera tilbúinn til að knýja á um umræðu um mikilvæg þjóðfélagsmál, sem leiðir til jákvæðra athafna í þágu lands og þjóðar. Um leið getur forsetinn tryggt að raddir hinna hófsömu og þeirra sem standa höllum fæti fái að heyrast en verði ekki kaffærðar með hrópum hinna fáu sem hæst hafa. Forseta ber að gæta hófsemdar í málflutningi sínum og allri framkomu. Þær aðstæður kunna hins vegar að skapast að hann geti ekki og megi ekki víkjast undan því að taka opinberlega afstöðu í mikilvægum og erfiðum málum sem skipta land og þjóð miklu. Forsetinn á að blása fólki – ekki síst ungu fólki – bjartsýni í brjóst og stuðla með sínum hætti að því að við séum öll stolt af því að vera Íslendingar og höfum trú á framtíðinni, hreykin af menningu okkar og sögu. Hannes Hafstein hafði óbilandi trú á landi og þjóð. Um aldamótin 1900 bar hann þá von í brjósti að Íslendingar yrðu að nýju sjálfstæð þjóð sem gengi frjáls að arfi sínum. Í kvæðinu Aldamótin hvatti Hannes samlanda sína til samstöðu. Brýning Hannesar fellur aldrei úr gildi: Starfið er margt, en eitt er bræðrabandið, boðorðið, hvar sem þér í fylking standið, hvernig sem stríðið þá og þá er blandið, það er: Að elska, byggja og treysta landið. Þá mun sá guð, sem veitti frægð til forna, fósturjörð vora reisa endurborna. Þá munu bætast harmasár þess horfna, hugsjónir rætast. Þá mun aftur morgna. Reynslan og þekkingin gerir mér kleift að takast á við flestar þær aðstæður sem upp geta komið. Verði ég kallaður til þess verks að gegna embætti forseta Íslands, mun ég standa þá vakt af sanngirni og af þeirri yfirvegun sem reynslan hefur kennt mér.  

Tónleikar á Háaloftinu með Axel og Co. á fimmtudaginn

Sjóðandi heit kántrýsveit, Axel O & CO halda tónleika á Háaloftinu fimmtudagskvöldið 30. júní. Axel O & Co er hljómsveit sem hóf störf fyrir um ári síðan. Forsprakkinn og söngvari hljómsveitarinnar er Axel Ómarsson sem ólst upp á sínum yngri árum í vöggu Country tónlistarinnar í Texas og Oklahoma í Bandaríkjunum. Þar lærði Axel að meta Country tónlist og tók þann áhuga með sér þegar hann flutti aftur til Íslands. Axel kom með Texas hreiminn inn í íslenskt tónlistarlíf sem heillað hefur Country áhugafólk að undanförnu. Meðlimir Axel O & Co eru valinkunnir tónlistarmenn úr íslensku tónlistarlífi og hafa hver um sig gert garðinn frægan með fjölda hljómsveita og í raun má segja að Axel O & Co sé sannkölluð súpergrúppa. Hljómsveitina skipa þeir Magnús Kjartansson (Júdas, Trúbrot, Brimkló, Brunaliðið, HLH og Sléttuúlfarnir) , Sigurgeir Sigmundsson (Start, Gildran, Tyrkja Gudda), Jóhann Ásmundsson (Mezzoforte, Stjórnin, Heart2Heart), og Sigfús Óttarsson (Rikshaw, Jagúar, Mannakorn, Stjórnin og Strax, Dali). Fyrir utan að spila með öllum þessum vinsælu og flottu hljómsveitum, hafa þeir spilað inn á ótrúlegan fjölda hljómplatna í gegnum tíðina, enda hér á ferð hreint frábærir hljóðfæraleikarar.   Axel O & Co gáfu út sitt fyrsta lag, “Country Man” í ágúst 2015 og það lag rataði inn á ýmsa vinsældarlista á útvarpsstöðvum erlendis, í Bandaríkjunum og víðar. Lagið skipaði t.d. fyrsta sæti á Country Lista í London í tvær vikur. Nú hefur hljómsveitin gefið út sinn fyrsta disk sem inniheldur 10 frumsamin lög.   Við lofum frábærum tónleikum, kántrýtónleikum af dýrustu sort, á Háaloftinu fimmtudagskvöldið 30.júní.   Tónleikarnir hefjast klukkan 22.00 og húsið opnar klukkan 21.00.    

EM 2016 | Stemmninginn í Frakklandi er gríðaleg

Mikill fjöldi Eyjamanna hefur verið í Frakkalandi síðustu daga að fylgjast með íslenska karlalandsliðinu í fótbolta spreyta sig á EM. En liðið hefur spilað tvo leiki sem hafa skilað þeim tveim stigum og sitja þeir nú í öðru sæti í sínum riðli, sem verður að teljast glæsilegur árangur hjá litla Íslandi. Næsti leikur liðsins er á morgun klukkan 16.00 í París á móti Austurríki. Vinni Ísland leikinn eiga þeir stóran möguleika á að komast í 16. liða úrslit keppninnar. Við slógum á þráðinn á Eyjapeyjann Ólaf Björgvin Jóhannesson og spurðum út í stemmninguna í Frakkalandi. ,,Við erum hérna sex Eyjapeyjar á leiðinni til Parísar eftir að hafa verið í Nice í fimm daga. Erum búnir að lenda í fullt af skemmtilegum atvikum vegna tafa á samgöngum en höfum ekkert verið að láta það hafa áhrif á stemmninguna. Stemmninginn á leiknum í Marseille var geggjuð en við misstum samt af fyrstu mínútum leiksins vegna tafa í öryggisleytinni á völlinn, en það bras gleymdist um leið og maður var kominn inn á völlinn. Þvílík stemmning! Veðrið er búið að vera alveg frábært hérna og margir hafa stoppað okkur hérna úti og flestir sem eru hlutlausir í keppninni halda með okkar mönnum. Við tókum eitt kvöld með stuðningsmönnum Svíþjóðar og sungum saman söngva þjóðanna og hápunkturinn það kvöld var án efa þegar við sungum öll saman til heiðurs Lars. Erum núna á leiðinni út í vél á leið til Parísar í enþá meiri stemmningu þar sem við munum hitta fullt af Eyjafólki og halda áfram að skemmta okkur. ÁFRAM ÍSLAND."    

Bylgjufræðingur - Sannleikurinn um Landeyjahöfn

Frá þvi að ég sá fyrst hvernig átti að gera Landeyjahöfn var ég viss um að það væri röng aðferð. Einnig sá ég það að höfnin er nákvæm eftirlíking af höfninni í Hanstholm í Danmörku sem er ekki gott því þar eru aðstæður allt aðrar. Seinna kom í ljós að skýrslur sérfræðinga sem farið var eftir voru um Hanstholm en ekki Landeyjahöfn. Þetta segir Árni Björn Guðjónsson, bylgjufræðingur í aðsendri grein á Pressunni pressan.is/pressupennar/     Sandur kemur niður um ós Markarfljóts sem segir að þar þarf að gera garð sem nær það langt út að framburður fljótsins fari á um 10 metra dýpi og fleytist til vesturs. Garðurinn að sjálfsögðu vestan megin við ósinn. Eystrigarð Landeyjahafnar þarf að framlengja þannig að hann nái fyrir hafnarmynni Landeyjahafnar. Þannig er komið í veg fyrir að hafaldan eigi beina braut inn í höfnina og eys sandinum inn um hafnarmynnið. Þetta er eina leiðin til að koma í veg fyrir að höfnin verði ófær, nýtt skip hefur ekkert með þetta að gera. Það þarf að stytta vestari garðinn svo se meira ´rými fyrir skip að sigla inn.   Ef þetta tvennt hafði verið gert hefði Landeyjahöfn verið nothæf flesta óveðursdaga ársins og sandur ekki náð að komast inn í höfnina. Sagt hefur verið að ef þetta er gert þá leiti sandurinn í skjól vestan megin við garðinn. En það tæki langan tíma að fylla í höfnina. Því megin sandurinn fleytist framhjá með austan straumnum sem þarna er. Til samanburðar eru flestar hafnir sem ég hef skoðað með slíkan öldubrjót. Til dæmis Þorlákshöfn og Dalvíkurhöfn. Þetta þarf að gera strax svo höfnin verð fær allt árið.   Ég hef gert Facebooksíðu sem heitir Endurgerð Landeyjahöfn þar eru um 30 myndir sem sýna þetta á svart og hvítu.   Suðaustanáttin lendir beint inn um hafnarmynnið og eys sandinum í höfnina. Þetta er hægt að laga með því að gera öldubrjót svo aldan brotnar á honum það utarlega og kemur i veg fyrir að sandurinn lendi í höfninni. Þessi garður þarf að ná út á um 10 metra dýpi og ná vel fyrir hafnarmynnið. Þá verður einnig logn við hafnarmynndið og hafaldan nær ekki inn. Einnig myndast skjól vegna öldurnar sem brotnar og endurkastast á mótu öðrum öldum í nágrenninu.   Eftir að þetta hefur verið gert getur hvaða skip sem er siglt inn i höfnina i hvaða veðri sem er.   Árni Björn Guðjónsson, bylgjufræðingur  

Heimir: Enn eina ósigraða liðið í sögu EM

Heimir Hallgrímsson, segir að það hafi verið hljótt inni í búningsklefa íslenska landsliðsins eftir leikinn gegn Ungverjalandi í gær í samtali við vísi.is   Ísland og Ungverjaland gerðu 1-1 jafntefli en Ungverjar skoruðu jöfnunarmark sitt á lokamínútum leiksins er Birkir Már Sævarsson varð fyrir því óláni að skora sjálfsamark.   „Það var dapurt inn í búningsklefa inni í leik. Eins og hjá öllum liðum sem fá á sig mark í lok leikja. Það er svolítið sérstakt. Við fögnuðum einu stigi gegn Portúgal en grátum nú stig gegn Ungverjalandi, eins kjánalega og það hljómar,“ sagði Heimir.   Hann hrósaði Ungverjum fyrir frammistöðu sína í leiknum og sagði þá vera með virkilega gott lið. „Þeir sem munu vanmeta þá munu þjást. En við héldum boltanum illa og vorum ekki nógu þéttir í lokin. Þeir hlupu líka meira en við og settu svo tvo sóknarmenn inn á.“   „Við hefðum átt að refsa þeim fyrir að taka þá áhættu en hún borgaði sig á endanum fyrir þá. Stundum gerist það,“ sagði Heimir.   Héldum boltanum ekki nógu vel Hann játti því að spennustigið hafi líklega verið of hátt fyrir leikmenn íslenska liðsins. „Það var munur á okkur og ungverska liðinu. Kannski voru það stigin þrjú sem þeir höfðu fyrir leikinn. Við héldum boltanum ekki vel og þeir spiluðu vel úr pressunni okkur. Þetta leit þægilega út fyrir þá.“   „En við fengum betri færi í leiknum. Að vissu leyti gátum við nýtt okkur það að vera minna með boltann en það kostar mikla orku. En eftir færið hjá Jóa Berg og markið okkar fannst mér að það væri meira sjálfstraust í okkar liði.“   Soft víti en það var snerting Hann var einnig spurður um vítaspyrnudóminn. „Það var kannski „soft“ en það var snerting. Það er undir dómaranum komið að dæma það. Ég get tekið undir að þetta var „soft“.“   Heimir sagði enga ástæðu til að vera með óbragð í munni og sló meira að segja á létta strengi.   „Ég held að við séum eina liðið í Evrópu sem hefur ekki tapað í úrslitakeppni EM. Það er vissulega gott að hafa ekki enn tapað og við eigum enn möguleika. Við vorum nálægt því að tryggja þetta í dag og þess vegna eru vonbrigðin mikil. En við vorum að spila við virkilega gott lið.“   Gott að spila á síðasta deginum Heimir segir að það sé gott að Ísland sé í þeim riðli sem spilar síðustu leiki sína í riðlakeppninni.   „Þá munum við vita fyrir leikinn gegn Austurríki hvort að þrjú stig nægji eða hvort við þurfum að vinna leikinn. Það er gott að fara inn í leikinn og vita allar staðreyndir.“   „Við munum auðvitað fara inn í leikinn til að vinna hann en út frá áhættumati og öðru slíku getur verið gott að vita þessa hluti. Stig gæti dugað en mér þykir það ólíklegt.“  

Fjölbreytt dagskrá á Þjóðhátíðardaginn 17. júní

Dagskrá 17. júní  hefst í Vestmannaeyjum með því að fánar dregnir að húni í bænum klukkan 9.00. Klukkan 10.30 verða Fjallkonan – Dröfn Haraldsdóttir á Hraunbúðum og Sindri Freyr Guðjónsson og Thelma Lind Þórarinsdóttir með tónlistaratriði á Hraunbúðum. Að öðru leyti er dagskráin eftirfarandi:       Kl. 15.00 Lúðrasveit Vestmannaeyja leikur fyrir heimilisfólk og hátíðargesti.     Hásteinsvöllur Kl. 11.00-13.00 Leikmenn meistaraflokks ÍBV karla þakka fyrir veittan stuðning það sem af er sumri og bjóða börnum og ungmennum í æfinga- og þrautabraut á Hásteinsvelli. Að því loknu munu stuðningsaðilar ÍBV bjóða öllum til grillveislu.     Íþróttamiðstöð Kl. 13.30 Bæjarbúar og aðrir gestir safnast saman fyrir skrúðgöngu, lagt af stað 13.45. Gengið verður frá íþróttamiðstöðinni niður Illugagötu, inn Faxastíg og áfram Vestmannabraut að Stakkó í lögreglufylgd. Félagar úr Lúðrasveit Vestmanneyja leika fyrir göngunni. Fánaberar úr Skátafélaginu Faxa leiða gönguna ásamt Leikfélagi Vestmannaeyja og fleirum.     Stakkagerðistún Kl. 14.00 Lúðrasveit Vestmannaeyja spilar af alúð. Sigursveinn Þórðarson varabæjarfulltrúi setur hátíðina og flytur hátíðarræðu. Fjallkonan – Dröfn Haraldsdóttir flytur hátíðarljóð. Umhverfisverðlaun Vestmannaeyja 2016 afhent. Ávarp nýstúdents – Kristín Edda Valsdóttir. Fimleikasýning fimleikafélagsins Ránar. Tónlistaratriði frá Sindra Frey Guðjónssyni og Molunum.   Leikfélag Vestmannaeyja skemmtir hátíðargestum með ýmsu glensi. Hoppukastalar ef veður leyfir. Popp, kandýfloss og fleira til sölu á staðnum.      

Friðunin - Hörð viðbrögð koma bæjarstjóra ekki á óvart

„Það hefur ekki komið mér á óvart þó friðlýsing hafi hlotið sterk viðbrögð hér í Eyjum. Málið er enda þannig fallið að báðir flokkar í bæjarstjórn klofnuðu vegna þess og á þeim 14 árum sem ég hef verið í bæjarstjórn man ég ekki eftir því að slíkt hafi gerst. Ég var einlæglega á móti þessari friðlýsingu og það skýrist fyrst og fremst af þeirri prinsippástæðu að ég vil að við ráðum sem mestu sjálf um okkar Eyjar,“ sagði Elliði Vignisson, bæjarstjóri um ákvörðun meirihluta bæjarstjórnar þvert á flokka um friðlýsingu búsvæðis sjófugla í Vestmannaeyjum.     Félag bjargveiðimanna í Vestmannaeyjum hafa mótmælt samþykktinni og bendir m.a. á að þar með færist forræði héðan til Reykjavíkur. Elliði tekur í svipaðan streng. „Sporin hræða einfaldlega þegar kemur að samskiptum við ríkið. Ég reyndi þess vegna í mörg ár að koma inn þessu orðlagi: „Náist ekki samkomulag um endurskoðun á mörkum verndarsvæðisins eða einstaka ákvæðum friðlýsingarinnar getur hvor aðili fyrir sig sagt sig frá friðlýsingunni og mun hún þar með falla niður“ Í þeirri baráttu hafði ég ekki erindi sem erfiði og þess vegna greiddi ég atkvæði á móti.“   Elliði segir það hins vegar komið sér mikið á óvart sú sterka krafa hér í Eyjum um að hann beiti einhverju meintu oddvitavaldi og láti þann meirihluta sem samþykkti friðlýsingu breyta afstöðu sinni. „Jafnvel fólk sem hér hefur farið mikinn í að halda á lofti umræðu um einhverja „hirð“, „foringjaræði“ og fl. er nú hneykslað á því að ég skuli ekki bara hafa ráðið þessu og látið hina gegna. Sannleikurinn er þó sá að í flestum málum erum við bæjarfulltrúar allir sammála, þegar við klofnum í afstöðu er það oftast vegna ólíkra stjórnmálsskoðana og þá skiptumst við í meiri- og minnihluta. Svo gerist það einstaka sinnum að við klofnum þvert á flokka og þá ræður persónuleg afstaða hvers og eins.   Í þeirri stöðu sem við erum nú í væri ég alveg til í að taka þessa ákvörðun upp og skipa einhverskonar samráðsnefnd með það að leiðarljósi að veita þeim sem hagsmuna eiga að gæta á svæðinu og þeim sem áhuga hafa á svæðinu að koma sínum sjónarmiðum á framfæri. Mér dettur þó ekki í hug að beita aðra fulltrúa einhverjum þrýstingi þótt þeir hafi haft aðra afstöðu en ég enda væri ég þá að biðja þá um að brjóta lög sem kveða á um að bæjarfulltrúar styðjist við eigin sannfæringu við ákvörðunartöku,“ sagði Elliði.    

Betur má ef duga skal

Í seinustu viku kom upp beinbrot hjá ungri konu í Vestmannaeyjum. Konan var flutt til röntgenmyndatöku í Reykjavík þar sem ekki var hægt að framkvæma slíkt hér í Vestmannaeyjum. Auðvitað olli þetta bæði auknum sársauka og margskonar óþægindum fyrir konuna og fjölskyldu hennar. Upp komu vangaveltur um að ekki hafi verið hægt að veita fulla þjónustu hér í Vestmannaeyjum vegna niðurskurðar eða einhverskonar yfirvinnubanns vegna fjárskorts. Ég leitaði til framkvæmdastjóra lækninga eftir upplýsingum.   Ekkert yfirvinnubann hjá geislafræðingum Þær upplýsingar sem ég fékk voru að því færi fjarri að um væri að ræða yfirvinnubann væri hjá geislafræðingum og að úrvinnsla og ákvarðanir í þessu máli hafi ekkert haft með fjármögnun eða slíka hluti að gera. Staðan er einfaldlega sú að ekki hefur enn tekist að fá afleysingu geislafræðings í hér Vestmannaeyjum vegna sumarleyfa. Hjá HSU í Vestmannaeyjum starfa tveir geislafræðingar og þeir eru (eins og skiljanlegt er) ekki tilbúnir til að standa bakvakt einir vikum saman þegar annar þeirra er í fríi. Það þýðir að það er ekki hægt að manna allar vaktir. Hins vegar hafa þeir lýst yfir að ef um neyðartilfelli sé að ræða þá muni þeir ekki neita að koma.   Allt gert til að fá geislafræðinga í afleysingar Verið er af fullum hug að reyna að leysa úr þessu ástandi. M.a. hefur verið sendur tölvupóstur á alla félagsmenn í félagi geislafræðinga og haft hefur verið samband við aðrar heilbrigðisstofnanir. Góð laun fyrir afleysingamanneskju eru í boði og það er því ekki fyrirstaða.     Eðlileg tortryggni Það er skiljanlegt að Eyjamenn séu tortryggnir þegar kemur að heilbrigðisþjónustu og túlki hluti eins og þessa á versta veg þar sem heilbrigðisþjónusta hér, eins og víða á landsbyggðinni, hefur átt í vök að verjast og skerðing orðið á ýmsum þjónustuþáttum og þjónustustigi undanfarin ár.   Það er verk að vinna þótt margt hafi færst til betri vegar Þrátt fyrir að staðan sé ekki sú sem við vildum og þrátt fyrir að við verðum aldrei sátt á meðan hér er ekki full fæðingaþjónusta þá er vert að horfa til þess sem færst hefur til betri vegar.     Aftur boðið upp á ómskoðanir Í langan tíma var ekki boðið upp á ómskoðun hér í Eyjum. Nú hefur aftur ræst úr hvað það varðar og ómskoðanir á meðgöngu eru aftur í boði. Þjónustuleysið hvað þennan þátt varðar hafði ekkert með fjármögnun, yfirvinnubann eða annað slíkt að gera, en skapaðist af óviðráðanlegum aðstæðum vegna veikinda starfsmanns.   Búsettum læknum fjölgar Um tíma höfðum við Eyjamenn miklar áhyggjur af læknamönnun hér í Vestmannaeyjum og bentum á að eingöngu einn læknir væri búsettur í Vestmannaeyjum. Með átaki hefur tekist að tryggja að nú eru þrir fastir læknar við heilsugæsluna í Vestmannaeyjum.   Þá má geta þess að lítið álag hefur verið á sjúkradeildinni síðustu vikur og þar eru nokkur laus rúm þrátt fyrir sumarlokun (fækkun opinna sjúkrarúma á sumarleyfistíma).     Enn er verk að vinna - Fæðingaþjónusta verður ekki gefin eftir Nú sem fyrr er mikilvægast að tryggja öryggi sjúklinga og annarra skjólstæðinga heilbrigðisþjónustunnar. Upp geta komið óviðræðanlegar aðstæður sem því miður valda oft óþægindum og óhagræði fyrir fólk og að sjálfsögðu ber að harma slíkt. Flestum ber saman um að við fæðingarþjónustuna liggi sársaukamörk heilbrigðisþjónustunnar í Vestmannaeyjum. Þar er verk að vinna og fráleitt að ætlast til að við sættum okkur við núverandi ástand.   Birtist   

Fyrsta lagið kom eins og þruma úr heiðskíru lofti

Guðrún Erlingsdóttir, fyrrum bæjarfulltrúi, varaþingmaður og formaður Verslunarmannafélags Vestmannaeyja og síðar starfsmaður VR í Eyjum hefur ekki setið auðum höndum eftir að hún og Gylfi Sigurðsson, maður hennar fluttu héðan árið 2013. Í vor lauk hún BA prófi í norsku og atvinnulífsfræði frá Háskóla Íslands. Á laugardaginn stefnir hún svo á tónleika í Salnum í Kópavogi þar sem Kór Ástjarnarkirkju flytur tónlist eftir Guðrúnu ásamt hljómsveit og einsöngvurum. Sjálf er Guðrún í hópi einsöngvara en auk hennar syngja Áslaug Fjóla Magnúsdóttir, Bryndís Eva Vilhjálmsdóttir, Kristjana Þórey Ólafsdóttir, Kolbrún Shalini Árnadóttir og Svava Halldórsdóttir. Hljómsveitina skipa Matthías Baldursson kórstjórn og píanó, Friðrik Karlsson gítar, Þorbergur Ólafsson slagverk og Þórir Rúnar Geirsson bassi. „Við erum fjögur frá Eyjum í kórnum, mágkona mín Bjartey Sigurðardóttir, Kristjana Þórey Ólafsdóttir og S. Árni Ingimarsson,“ sagði Guðrún. „Kórstjórinn okkar Matthías útsetur lögin en hann er ættaður úr Eyjum. Það eru fleiri í kórnum með tengingu til Eyja.“ Ástjarnarkirkja er á Völlunum í Hafnarfirði og segir Guðrún að kórinn njóti vinsælda fyrir gospelsöng sinn og léttleika. „Það verða flutt 15 lög eftir mig og ég hef samið bæði lögin og textana. Svo tökum við fjögur vinsæl erlend gospellög þar sem textarnir eru í minni þýðingu.“ Flest lögin eru með trúarlegum textum og önnur eru á persónulegum nótum. m.a. lag sem hún samdi um Noregsferðina 1973 og flutti í Höllinni með Blítt og létt 2013. Sjálf var hún ein af um 1000 krökkum frá Vestmannaeyjum sem fóru til Noregs í tvær vikur gossumarið 1973. Um þessa ferð fjallar BA ritgerð hennar og er á norsku. Þrettán af lögunum eru samin í Eyjum og tvö á höfuð- borgarsvæðinu þar af kom annað lagið eftir heimsókn til Eyja. „Sköpunarkraftinn fæ ég úr náttúrunni heima. Við Gylfi stöndum fyrir þessum tónleikum og ákváðum að nota tækifærið til þess að fagna BA prófinu mínu úr Háskólanum með þessum hætti. Fyrsta lagið samdi ég 2011 og kom það eins og þruma úr heiðskíru lofti, ég tel lögin mín séu frá Guði komin, og ég er eins konar kanall og er stolt af því að hafa hlýtt og þorað að koma þessu á framfæri. Ég byrjaði á því að flytja lögin mín í Aglow í Eyjum 2011. Ég lærði einn vetur á gítar þegar ég var tólf ára og kann vinnukonugrip en kann ekki að skrifa nótur. Ég get hljómasett lögin mín en svo þarf ég að syngja þau fyrir þá sem meira kunna svo hægt sé að skrifa við þau nótur.“ Þarna sýnir Guðrún á sér nýja hlið, bæði er það tónlistarsköpunin og svo hvað trúin skipar stóran sess í lífi hennar. „Já, lífið tekur stundum óvæntar stefnur Ómar, ekki allt sem sýnist og konur leyna á sér. Þar sem Guð gaf mér þessa náðargjöf þá get ég ekki selt inn á þessa tónleika, þetta verður mitt þakklæti fyrir gjöfina. Tónleikarnir verða teknir upp bæði hljóð og mynd og ég veit að mér verður sýnd leið til þess að gefa tónlistina út í fyllingu tímans. Ég veit að lögin mín og textarnir hafa snert við fólki sem er markmiðið,“ sagði Guðrún að endingu. Tónleikarnir verða í Salnum í Kópavogi í dag kl. 16.00. Allir er velkomnir og frítt er inn, Guðrún vonast til þess að sem flestir Eyjamenn brottfluttir og búandi í Eyjum mæti á tónleikana.  

Góðgerðarmótið Ufsaskalli Invitational haldið í dag

Golfmótið Ufsaskalli Invitational verður haldið í dag, laugardag á golfvellinum í Vestmannaeyjum. Mótið, sem er góðgerðarmót, hefur fest sig í sessi sem eitt af skemmtilegustu golfmótum ársins enda er mest lagt upp úr skrautlegum búningum og fjöri en árangurinn í mótinu er í öðru sæti. Þetta er áttunda árið í röð sem Ufsaskallamótið er haldið en það verður glæsilegra og glæsilegra með hverju árinu. ,,Allur ágóði Ufsaskalla rennur í gott málefni en í fyrra naut mæðrastyrksnefnd góðsaf því sem safnaðist á mótinu og keypt var sjónvarp upp á Heilbrigðisstofnun með góðri hjálp frá Geisla. Einnig gefum við ætíð minni peningaupphæðir til fjölskyldna hér í Eyjum sem eru hjálpaþurfi,“ segir Valtýr Auðbergsson einn af aðalskipuleggjendum mótsins. Fjölmargir leggja hönd á plóg en hitann og þungann af mótshaldinu bera þeir Valtýr Auðbergsson, Magnús Steindórsson, Friðrik Sæbjörnsson og Kristján Georgsson. Þeir eiga þó góða að og fjölmörg fyrirtæki styrkja mótið með glæsilegum vinningum. „Það eru 46 golfarar skráðir á mótið í ár og um tíu kaddýar og við erum ansispenntir fyrir helginni eins og alltaf. Við verðum svo með uppboð á Togarabjórnum á mótinu, sem var valinn besti bjór ársins um helgina. Ufsaskalli keypti eina flösku af bjórnum á uppboði í Höllinni um síðustu helgi á 300.000 krónur og allur sá peningur fer að sjálfsögðu í góðgerðamál,“ sagði Valtýr. 

Myndasafnið >>

Öldudufl við Landeyjahöfn

Öldudufl við Landeyjahöfn

Mannlíf >>

Hvað segja Eyjamenn um nýja Þjóðhátíðarlagið ?

Á hverju ári bíða Eyjamenn ætíð með eftirvæntingu eftir nýju Þjóðhátíðarlagi. Lag hvers árs er ómissandi hluti af hátíðinni sjálfri og fólk hefur ávallt miklar skoðanir á hverju lagi. Sumir eru ánægðir við fyrstu hlustun á meðan aðrir þurfa nokkrar hlustanir til þess að venjast lögunum. Þjóðhátíðarlag Vestmannaeyja 2016, Ástin á sér stað, var frumflutt í morgun. Að því tilefni fórum við á stúfana og fengum álit nokkurra Eyjamanna á laginu í ár.   Leó Snær Sveinsson Það fyrsta sem við gerðum í Landsbankanum í morgun varð að hlusta á Þjóðhátíðarlagið 2016 öll saman. Við vorum öll sammála um að þetta er frábært lag. Lagið er grípandi og þægilegt. Það fangar stemminguna sem ríkir í dalnum á þjóðhátíð. Það ver klárlega gæsahúðarstund þegar Herjólfsdalur tekur undir þetta lag allur lýstur upp í blysum á sunnudagskvöldinu.   Guðbjörg Helgadóttir  ,,Þetta er náttúrulega bara alveg dásamlegt eins og allt sem Dóri gerir. Hann nær alltaf að snerta mann í hjartastað og framkalla gæsahúð á stöðum sem maður er ekkert endilega meðvitaður um. Hann hefur undanfarin ár smollið inní Eyjasamfélagið og hann skilur hvað það er sem þjóðhàtíð gerir fyrir okkur, þessi upplifun og tilfinning sem aðeins þeir sem hafa upplifað fallegu hátíðina okkar skilja, og einhvernveginn nær hann ásamt Magnúsi Þór að koma þessum ólýsanlegu tilfinningum og þessari fallegu sögu frá sér í þessu dásamlega lagi."    Laufey Andersen Ég hef aðeins þrisvar sinnum í gegnum tìðina fìlað þjóðhátíðarlag við fyrstu hlustun, Lìfið er yndislegt, La Dolche Vita og Þar sem hjartað slær. Í þetta sinn er sagan sú sama og má alveg fylgja með að gæsahùðin varð svo mikil að ég fann til. Svona eins og gerðist með Þar sem hjartað slær. Sverrir Bergmann er svo ì þokkabòt minn uppàhalds ìslenski söngvari svo ég er kannski ekki hlutdræg og svo auðvitað elska ég Þjòðhàtið svo mikið að ég fæ kvíða við tilhugsunina að ég verði ekki í dalnum í ár.  Það sem ég elska mest við þjòðhàtìðarlag 2016 er að þeir vinirnir fara svo hàtt upp og krafturinn gerir næstum útaf við mann. Svo góður partur til að hvetja brekkuna með í söng. Mikið sem það verður erfitt að vera ekki í Dalnum í ár.     Elliði Vignisson  Mér finnst þetta lag stór fínt. Reyndar er ég svo hrifnæmur þegar kemur að Þjóðhátíð og nánast öllu sem tengist Vestmannaeyjum. Fæ tá í augun í innsiglingunni í hvert skipti sem ég sigli með Herjólfi þannig að það er ekki alveg að marka mig. Það er í raun stórkostlegt að við Eyjamenn sem erum 1,3% þjóðarinnar skulum megna að halda þessa stórkostlegu hátíð ár eftir ár og það með þessum stórkostlegu gæðum og metnaði sem koma til að mynda fram í þessu frábæra lagi Halldórs Gunnars. Ekki spillir að myndbandið er kitlandi og vekur eftirvæntingu. Í mínum huga er ljóst að samfélagslegt mikilvægi Þjóðhátíðar fyrir okkur Eyjamenn er gríðalegt. Hún er að mörgu leiti andlit okkar út á við, sameiningartákn okkar og sameinandi gleðistund. Þjóðhátíðin er hinsvegar einnig búinn að skipa sér í sess stærstu menningarviðburða þjóðarinnar þar sem tónlistin er rauðiþráðurinn. Þetta lag og gæði þess er gott dæmi um hversu alvarlega þessu hlutverki er tekið.   Símonía Helgadóttir Ég veit nú ekki hvað ég á að segja annað en mér finnst það æði, myndbandið frábært og svo mikil gleði, ást, rómantík og hamingja í laginu. Er alsæl með þetta. Yndislegt lagi við fyrstu hlustir og sýn. Hlakka til að heyra þetta í brekkunni. Sonja Ruiz Martines Við hlustun í morgun fékk ég gæsahúð og er það næg vísbending á það að þetta verður eitthvað magnað. Það verður sko koss og knús í brekkunni. Sverrir og Frikki eru svo með þetta William Tómas Möller  Geðveikt! Nákvæmilega eins og ef ég hefði gert það!   Þjóðhátíðarlag Vestmannaeyja 2016 má hlusta á hér.     

Stjórnmál >>

Forsetakosningar 2016 | Forseti Íslands á ekki að taka þátt í pólitísku dægurþrasi

Vestmannaeyjar eru fyrir margt sérstakar og Eyjamenn einstakir. Svo ég noti orð Baltasars Kormáks þá eru Eyjamenn eins og tálgaðir íslendingar, bara það besta er eftir. Sérstaða Vestmannaeyja er mikil. Byggð þar á ekki endilega að þrífast í Vestmannaeyjum þrátt fyrir sérstöðuna heldur einmitt og sérstaklega vegna hennar. Ég hef aldrei migið í saltan sjó, hef bara unnið eitt sumar við að verka trjónukrabba úti á Granda en annars er ég kannski dæmigerður nútíma Íslendingur, alinn upp í úthverfi á tímum þegar sveitir landsins hættu að taka á móti börnum og unglingum og vélvæðing í fiskvinnslu gerði það að verkum að störfum fækkaði og pláss á skipum urðu enn sjaldgæfari. Ég hef hitt fleiri börn í Vestmannaeyjum heldur en fullorðna, sem rithöfundur hef ég stundum komið í heimsókn og lesið verkum mínum og leikfélagið setti einu sinni upp Bláa hnöttinn. Ég hef fengið að fylgjast með Eldheimaævintýrinu frá upphafi en ég var í dómnefndinni sem tók þátt í að velja aðalhönnuð verksins. Vestmannaeyjar hafa heillað mig frá því ég var barn. Ég er jafn gamall gosinu og afi sagði mér oft frá dvöl sinni í Eyjum við björgunarstörf. Ég sá lengi fyrir mér kvikmynd byggða á björgunarafreki Skaftfellings, þegar þeir björguðu áhöfninni á þýska kafbátnum. Páll Þorbjörnsson afabróðir minn var skipstjóri. Að mínu mati er þetta einn af atburðum seinni heimsstyrjaldar sem sýnir hvað mennskan ristir djúpt.   Þekking okkar dugir skammt Ísland er að mörgu leyti öfgafullt land og Eyjar eru eins og öfgafull útgáfa af Íslandi. Ég hélt fyrirlestur í Eyjum þegar Draumalandið kom út fyrir 10 árum. Þar sem ég stóð uppi á sviði til að ræða um hugmyndir og náttúruvernd horfði ég yfir salinn hugsaði. Hvað er ég að vilja upp á dekk? Óvíða í heiminum er önnur eins nálægð við ógnarkrafta náttúrunnar og oftar en ekki hefur náttúran haft yfirhöndina. Hvað hef ég að segja við fólk sem býr með Eldfell í bakgarðinum með útsýni yfir Eyjafjallajökul með svarrandi brimið allt í kring? Staðreyndin er samt sú að maðurinn í heild sinni er orðinn afl sem bræðir jökulinn og getur hækkað sjálft sjávarmálið. Hvarf lundastofnsins sýnir hversu hratt heimurinn er farinn að breytast og hvað þekking okkar dugir skammt. Við sem erum í beinni snertingu við þessar breytingar eigum að láta rödd okkar heyrast og hvetja heimsbyggðina til nýta hugvit sitt og tækni til að fara vel með þessa jörð. Það á að vera eitt mikilvægasta hlutverk forseta Íslands. Reynsla og bakgrunnur Ég býð mig fram í embætti forseta Íslands með reynslu mína og bakgrunn í farteskinu. Forseti Íslands á ekki að hafa staðið utan fylkinga, hann á að hafa reynslu af því að starfa með fylkingum sem hafa sett mikilvæg mál á dagskrá á síðustu árum. Hann á að greina tækifæri til að bæta samfélagið. Ég fer fram með reynslu mína af því að örva lestaráhuga barna, áhuga á eflingu lýðræðis, reynslu úr nýsköpun þar sem ég hef starfað í Toppstöðinni í Elliðaárdal og innsýn í mennta og menningarmál. Bækur mínar eru komnar út í 35 löndum og ég hef langa reynslu af því að vera fulltrúi Íslands um allan heim.   Byggðamál mikilvægustu málin Forseti Íslands kíkir ekki í heimsókn heldur dvelur meðal landsmanna og hlustar á það sem fólk hefur að segja. Hann er í þjónustuhlutverki og tekur hlutverk sitt alvarlega. Forseti Íslands á að fara á ,,Aldrei fór ég suður" en um leið og hann lofar Mugison fyrir framtakið þá spyr hann augljósrar spurningar: Ef einn strákur með gítar hringir í vini sína og skapar allt þetta, hvað gætu 200 stærstu fyrirtæki landsins gert fyrir Ísafjörð? Ef hópur af hugsjónafólki hefur breytt heilu hraðfrystihúsi í skapandi miðstöð á Stöðvarfirði - af hverju getur heill banki ekki haldið úti hraðbanka í bænum? Forseti Íslands á ekki að taka þátt í pólitísku dægurþrasi en hann má gjarnan ávarpa stóru myndina. Forseti Íslands á að hafa reynslu af því að fá ólíka hópa til að vinna saman. Byggðamál eru eitt af okkar mikilvægustu málum og við þurfum og viljum halda uppi byggð um allt land. Byggðamál eru mál sem er ekki aðeins á framfæri alþingis og ráðherra heldur mál sem snertir okkur öll og við verðum að bera ábyrgð á sem þjóð. Á ferð minni um landið hef ég kynnst þeim málum sem brenna hvað mest á þjóðinni, í Vestmannaeyjum eru það samgöngurnar og sjálfsagður réttur manneskju til að fæðast í Vestmannaeyjum. Forseti Íslands á að hafa reynslu af skapandi starfi vegna þess að framtíðin byggir í auknum mæli á skapandi greinum eða bættri nýtingu á hráefni sem fellur til hérlendis. Í einni af ferðum mínum til Vestmannaeyja sá ég lifandi steinbít í fyrsta sinn. Í kjölfarið kafaði ég ofan í fiskabækur og furðaði mig á því hversu fáar bækur eru til á Íslensku sem gæti örvað áhuga barna á fiskum. Það er ekki talin sjálfsögð þekking að þekkja nytjafiska okkar, hvað þá allar ófrenjunar og kjaftaglennurnar sem koma upp af djúpmiðum.   Hafið á að vera innblástur Í fyrirlestrum fyrir kennara spyr ég stundum hvort menntakerfið okkar sé miðað við umhverfi okkar og framtíðarmöguleika. Hafa börn okkar áhuga á fiskum? Hvernig eigum við að tengja börn við hafið, þegar þau alast upp í úthverfum með litla snertingu við sjóinn, sjómennsku eða sjávarútveg? Hafið ætti að vera börnum landsins innblástur, þau eiga að hafa æði fyrir fiskum, þau eiga að fyllast löngun til að verða kafarar, sjómenn og sjávarlíffræðingar. Það væri andlega örvandi og hvetjandi námslega en líka mikilvægt fyrir sjávarbyggðir, vegna þess að þær þurfa að laða til sín börnin sem nú alast upp í Kórahverfi. Þegar landhelgi Íslands var færð út þá varð Ísland miklu meira haf heldur en land. Landhelgin er nefnilega sjö sinnum stærri en sjálft Ísland. Þess vegna er spurningin ,,hefurðu migið í saltan sjó?" alveg gjaldgeng, börnin okkar munu nefnilega ekki aðeins erfa landið - heldur munu þau erfa hafið. Forsetinn er ekki bara forseti Íslands, hann er forseti hafsins. Við Íslendingar veiðum 1% af öllum fiski í heiminum og líklega höfum við aðeins nýtt 1% af öllum þeim tækifærum sem búa í hafinu kringum Ísland. Tækniframfarir leysa af hólmi vinnu-afl á sjó og landi en vöxturinn í framtíðinni verður að mestu leyti gegnum aukna verðmætasköpun með rannsóknum og markaðsvinnu.    Vestmannaeyjar í lykilstöðu  Börnin sem munu erfa hafið munu taka við fiskveiðistjórnun og veiðiflotanum en þau þurfa líka að berjast gegn mengun, plasti í höfum, súrnun sjávar og öðrum mikilvægum hagsmunamálum. Hvað kemur það forsetanum við? Jú forsetinn getur tengt saman fólk innanlands og utan og getur tekið þátt í að móta framtíðarsýn. Hann getur tengt saman fyrirtæki, stofnanir og skóla vegna þess að hann er þjóðkjörinn og hann má og á að tala við alla. Hann getur jafnvel farið með skólahópum í köfun eða á skak og vakið athygli á því að störfin sem börnin munu vinna í framtíðinni gætu verið gamalgróin eða falin í einhverju sem þau munu sjálf finna upp. Þau munu byggjast á því sem kveikir áhuga þeirra og hugmyndum þeirra í framtíðinni. Þorskastríðum er lokið en þroskastríðið felst í því að útvíkka landhelgina innra með okkur og skynja tækifærin sem uppgötvast einungis með því að beina hæfileikum framtíðarinnar í réttan farveg. Það væri metnaðarmál að sjá 50 - 100 manna alþjóðlega hafrannsóknarstofnun byggjast upp í Vestmannaeyjum á næstu árum. Vestmannaeyjar eru í lykilstöðu hvað þetta varðar, sérstakt samfélag og mikilvægt í menningarflóru Íslands sem má ekki verða einsleitni að bráð. Vestmannaeyjar eru útvörð- ur Íslands gagnvart hafinu sem er fullt af tækifærum til nýtingar, nýsköpunar vaxandi verðmætasköpunar. Vestmannaeyingar hljóta alltaf að vera í fararbroddi á landsvísu hvað þetta varðar, annars vegar við að verja hafið gegn mengun og ofnýtingu, hins vegar við að skapa ný tækifæri.  

Greinar >>

Halla Tómasdóttir - Samstaða og kraftur

Kæru Vestmanneyringar Við Björn maðurinn minn áttum ánægjulega daga í Eyjum í lok apríl. Eyjurnar, sem eiga sérstakan stað í hjarta mér, skörtuðu sínu fegursta, fólkið var bjartsýnt og ekki spillti fyrir að sjá Eyjastelpur spila á Hásteinsvelli. Á síðustu dögum hef ég fundið aukinn meðbyr úr öllum áttum og sérlega skemmtilegt að fá fjölmargar kveðjur og stuðningsyfirlýsingar frá Eyjamönnum. Ég hef ekki farið leynt með að ég mun láta til mín taka á Bessastöðum, vinna fyrir fólkið í landinu, hvetja og opna tækifæri. Ég trúi á mátt áhrifavaldsins. Þó forseti fari ekki með framkvæmdavald getur hann sannarlega haft áhrif. Talað fyrir jafnrétti og heiðarleika, lagt áherslu á að efla frumkvöðlastarf og nýsköpun, lagt áherslu á að hlustað sé á fólkið í landinu. Ég mun sem forseti leggja mig fram um að hafa jákvæð áhrif á samfélag, atvinnulíf, mannlíf og náttúru.     Framganga íslensku landsliðana í knattspyrnu síðustu daga og vikur hefur sýnt mér hversu auðvelt við Íslendingar eigum með að sýna samstöðu þegar við sameinumst um ákveðið markmið. Ég var afskaplega stolt af því að sjá stelpurnar okkar sigra 8-0 á Laugardalsvelli nú í byrjun júní. Það var einstök upplifun að vera viðstödd eftirminnilegan opnunarleik strákanna okkar á EM í Frakklandi og að komast í úrslit er ævintýri líkast. Jákvæðni og samstaða íslenska stuðningsmannahópsins hefur vakið heimsathygli. Þetta getum við þegar við stöndum saman. Ég býð mig fram sem fyrirliða í því verkefni að sameina Íslendinga um uppbyggilega framtíðarsýn og leiða samtal byggt á jákvæðni og bjartsýni.     Ég hef menntun, reynslu og manngerð í starf forseta og er reiðubúin að bretta upp ermar og gera gagn. Ég hef mikla reynslu af því að leiða saman fólk og sætta sjónarmið og hef beitt mér fyrir samfélags og jafnréttismálum á alþjóðavettvangi með góðum árangri. Ég trúi á samtal og sættir til að leysa úr málum. Ég veit af reynslunni að átök og ágreiningur skila ekki árangri, en ég er með bein í nefinu og get tekið erfiðar ákvarðanir ef á þarf að halda.   Eyjamenn eru miklir keppnismenn, ég veit að þið viljið keppniskonu sem hefur sterkar taugar til Eyja á Bessastaði. Ég hvet ykkur kæru Eyjamenn til að kynna ykkur vel það sem frambjóðendur hafa fram að færa, mæta á kjörstað, nýta atkvæðisréttin og nota bæði hugvit og hjarta til að velja ykkar frambjóðanda.     HALLA TÓMASDÓTTIR – FORSETAFRAMBJÓÐANDI.