Eyjafréttir

Nú er knattspyrnusumarið rétt handan við hornið en klukkan 18:00 í dag mun ÍBV mæta nýliðum Selfoss á Selfossvelli.  Selfyssingum er í flestum spám spáð falli á meðan ÍBV er yfirleitt spáð um miðja deild.  Það verður því mikilvægt fyrir bæði lið að byrja vel í Íslandsmótinu því bæði lið ætla sér meira en spárnar sýna.  Herjólfur sigrlir aukaferð í dag, frá Eyjum 14:30 og því ekki úr vegi fyrir Eyjamenn að skella sér í sunnudagsbíltúr á fastalandinu, fara svo á leikinn og komast heim samdægurs.

ÍBV endaði í þriðja sæti, bæði í fyrra og sumarið 2011 og var í raun aðeins hársbreidd frá Íslandsmeistaratitlinum 2011. En betur má ef duga skal og flestir eru á því að leikmannahópur liðsins sé breiðari nú en síðustu tvö ár. En það eru ekki bara nýir leikmenn hjá ÍBV því búið er að skipta um karlinn í brúnni. Heimir Hallgrímsson hefur snúið sér að því að hífa íslenska landsliðið upp úr öldudalnum og við stjórntaumunum hjá ÍBV tekur Magnús Gylfason. Magnús þekkir vel til í Eyjum enda þjálfaði hann liðið árin 2003 og 2004 en síðara árið endaði ÍBV í öðru sæti Íslandsmótsins. Magnús segir að lið hans sé tilbúið í átökin í sumar.

„Við erum klárir í slaginn, eða verðum það á sunnudaginn. Það eru auðvitað einhverjir sem eiga við smávægileg meiðsli að stríða en þeir verða klárir fyrir leikinn á Selfossi. Við erum auðvitað með þrjá sterka menn í meiðslum, Tryggvi Guðmundsson, Andri Ólafsson og Gunnar Már Guðmundsson. Við höfum vitað í langan tíma að Tryggvi og Andri yrðu frá þannig að í raun eru það bara meiðsli Gunnars Más sem eru ný þannig séð. Allir aðrir eru hins vegar klárir.“

 

Gengi Eyjamanna í leikjum á undirbúningstímabilinu hefur verið upp og ofan og stuðningsmönnum liðsins finnst ÍBV hafa tapað full mörgum leikjum í vetur. Magnús segir hins vegar vandann nokkuð landlægan í Eyjum. „Við höfum ekki stillt upp okkar sterkasta liði í einum leik í vetur og í raun aldrei með sama liðið á milli leikja. Auk þess eru leikmenn að týnast til okkar alveg fram að móti, tveir í þessari viku og jafnvel tveir þar til viðbótar. Ég er alveg sáttur við spilamennsku liðsins með þetta í huga. Það var ekkert lið með sýnilega yfirburði gegn okkur þótt við unnum ekki alla leiki.“

 

„Já það má segja að liðið sé svolítið óskrifað blað. Fyrst og fremst held ég að menn séu að horfa í þessa þrjá, Tryggva, Andra og Gunnar Má, sem verða ekki með okkur í fyrstu leikjunum. Við höfum líka verið að tapa leikjum í vetur en svo má ekki gleyma því að liðið hefur tekið gríðarlega miklum breytingum frá því síðasta sumar. Kelvin Mellor, Eiður Aron Sigubjörnsson, Finnur Ólafsson, Andri Ólafsson og Tryggvi Guðmundsson verða ekki með til að byrja með en þetta voru allt byrjunarliðsmenn síðasta sumar. En við teljum okkur samt sem áður vera búnir að þétta hópinn og ef þessi meiðsli væru ekki hjá áðurnefndum þremenningum, þá tel ég leikmannahóp ÍBV sterkari nú en í fyrra. Við höfum fengið sterka og fljóta leikmenn sem auka möguleikana í leikmannahópnum.“

 

„Að einhverju leyti er búið að gera það en ég hefði viljað bæta við varnarleikinn líka, fá einn sterkann varnarmann í viðbót. Við ætluðum að fá Sverri Garðarsson en það gekk ekki upp.“

 

„Ekki opinbert markmið en við höfum okkar markmið innan hópsins. Ég get þó sagt sem svo að við förum inn í þetta mót til að bæta árangur liðsins frá því síðasta sumar. Það er markmiðið í grófum dráttum. Það getur tekið tíma og kostað þolinmæði en við stefnum klárlega á að tryggja okkur Evrópusæti.“

 

Margir tala um að línur taki að skýrast eftir svokallað hraðmót í maí, þegar sex umferðir eru leiknar. Magnús tekur undir það og segir mikilvægt fyrir lið sem ætli sér að berjast á toppnum, að halda dampi í upphafi móts. „Það gefur kannski tóninn fyrir sumarið, hvort menn verði við botninn, um miðja deild eða í toppbaráttunni. Það er því mikilvægt fyrir öll lið að byrja vel, líka okkur.“

 

ÍBV leikur í forkeppni Evrópudeildarinnar í sumar en Magnús segir að þátttaka í Evrópukeppninni sé ekki síst tilbreyting fyrir leikmenn. „Þetta er ótrúlegt happadrætti því þú getur fengið auðveldan mótherja eða mjög erfiðan. Auk þess kemur ferðakostnaður inn í þetta en auðvitað er Evrópukeppnin skemmtilegt verkefni fyrir bæði liðið og bæjarfélagið. En auðvitað stefnum við á að gera okkar besta og það væri gaman að komast áfram en það helgast svolítið af því hversu heppnir við erum með dráttinn.“

 

„Það er yfirleitt vont að mæta nýliðum á útivelli í fyrsta leik. Það er örugglega mikil stemmning á Selfossi fyrir sumrinu. En við eigum ekkert að láta það hafa áhrif á okkur heldur einbeita okkur að okkar leik. Þetta verður eflaust skemmtilegur leikur enda ekki á hverju ári sem við fáum suðurlandsslag í efstu deild í fótboltanum. Selfossliðið hefur fengið marga nýja leikmenn og ég er nokkuð spenntur að sjá hvernig Selfoss liðið kemur út í sumar.“