Fréttatilkynning frá ÍBV - Matt Garner verður áfram hjá ÍBV

Fréttatilkynning frá ÍBV - Matt Garner verður áfram hjá ÍBV

Matt Garner verður áfram hjá ÍBV en hann skrifaði undir árs samning við félagið í dag. Matt er 32 ára vinstri bakvörður og spilaði 206 leiki með ÍBV frá árinu 2004 -2014 og skoraði 5 mörk áður en hann fótbrotnaði illa í leik á móti Keflavík undir lok tímabilsins 2014. Síðast liðið sumar var Matt lánaður til KFS í 3. deildinni til þess að koma sér í gang aftur eftir meiðslin og telur hann sig vera kominn í gott form aftur og á mikið inni. Mikil ánægja er að samningar náðust við þennan reynda leikmann við berum við miklar væntingar til hans á komandi tímabili. Áfram ÍBV! 

Hlakka til að fara inn í nýtt tímabil með okkar frábæra fólki

Arnar Pétursson, þjálfari karlaliðs ÍBV í handbolta, kvaðst spenntur og jafnframt bjartsýnn fyrir komandi leiktíð þegar blaðamaður settist niður með honum fyrir helgi. Liðinu er spáð sigri í Olís-deildinni í ár en deildin hefur sjaldan verið eins sterk og einmitt nú. „Strákarnir eru búnir að vera flottir og duglegir á undirbúningstímabilinu, menn eru búnir að leggja vel inn þannig að mér líst bara vel á þetta. Deildin verður skemmtileg í ár, það er fullt af öflugum mönnum að koma heim sem gerir þetta enn áhugaverðara,“ segir Arnar.   Ánægður með hópinn Í sumar bætti ÍBV við sig tveimur nýjum leikmönnum fyrir tímabilið og segir Arnar þá viðbót nauðsynlega. „Kolbeinn tók þá ákvörðun að fara í bæinn sem við skiljum alveg, stundum þurfa menn aðeins að breyta til. Fyrir vikið þurftum við að ná okkur í markmann og við náðum í Aron Rafn sem er frábært. Svo þurftum við að styrkja miðjuna í vörninni okkar þannig við náðum í Róbert í þá stöðu, hann er frábær kostur, ungur strákur sem er viljugur og flottur. Svo erum við með fullt af ungum strákum hjá okkur sem þurfa að fá sinn tíma og eiga það skilið. Í fyrra vorum við með átta 3. flokks leikmenn sem voru að spila og sjö af þeim skoruðu en í heildina skoruðu þeir yfir 150 mörk í deildinni fyrir okkur sem er náttúrulega bara frábært og maður er stoltur af því. Við viljum vera með blandað lið, byggt upp af okkar heimastrákum með nokkra afburðarleikmenn ofan af landi og okkur finnst það hafa tekist vel núna.“   Markmið liðsins að fá heimaleikjarétt fyrir úrslitakeppnina Er markmið liðsins að vinna titil eða titla í ár? „Nei ekki til að byrja með. Auðvitað dreymir okkur alla um að ná árangri og uppskera en við sem lið horfum meira í það að bæta okkur sem íþróttamenn, verða betri með hverjum leik, það er okkar stærsta markmið. En auðvitað viljum við ná topp fjórum eins og öll önnur lið og fá heimaleikjaréttinn og komast í sem besta stöðu þegar úrslitakeppnin byrjar,“ segir Arnar sem lætur titilspár ekki hafa mikil á sig. „Við þekkjum þetta alveg, við erum með mjög gott lið, það er engin spurning. Við lærðum mjög mikið á síðasta tímabili þar sem okkur var líka spáð titli en þetta hefur engin áhrif á okkur þannig séð.“ Aðspurður nánar út í síðasta tímabil segir Arnar það hafa verið svolítið sérstakt. „Fyrir áramót förum við í svolítinn meiðslapakka. Róbert Aron dettur út í fyrsta leik og kemur ekki inn fyrr en eftir áramót. Á hinn bóginn var ég ekkert ósáttur við tímann fyrir áramót, margir ungir strákar öðluðust mikilvæga reynslu. Frá 15. desember og þar til við mætum Val í úrslitakeppninni, töpum við ekki leik en það gerir einhverja fjóra mánuði. Við litum vel út og vorum að bæta okkar leik stanslaust. Svo mætum við Val og töpum hérna heima og það var sárt, maður var lengi að jafna sig eftir það en við töpuðum bara fyrir virkilega góðu Valsliði, hrikalega vel samstillt og flott lið. Þeir fóru síðan alla leið og kláruðu bæði bikar og deild. Þannig var þetta bara, svekkjandi en einnig mikill lærdómur sem við vonandi náum að nýta okkur.“ Æfingaferðina til Frakklands segir Arnar hafa verið mjög góða í alla staði þar sem allt hafi verið til alls. „Þarna var allt í göngufæri og aðstaðan til fyrirmyndar. Við sáum einnig að á okkar svæði hérna í Eyjum, sérstaklega varðandi lyftingar og styrktarþjálfun, að erum mjög framarlega og búum vel. En ferðin í heild sinni, æfingalega, félagslega og hóplega séð var mjög góð í alla staði.“   Deildin verður jöfn og spennandi Helstu keppinautar ÍBV í ár verða fjölmargir samkvæmt Arnari en eins og áður hefur verið komið inn á hefur deildin styrkst mikið. „Deildin er gríðarlega jöfn og mörg lið sem eru ótrúlega vel skipuð og öflug. Valsararnir eru Íslands- og bikarmeistarar en þeir bæta við sig einum besta leikstjórnanda íslensks handbolta fyrr og síðar, Snorra Steini Guðjónssyni. Þeir fá einnig úr atvinnumennsku Árna Sigtryggson sem hefur verið atvinnumaður í Þýskalandi í einhver tíu ár og Magnús Óla sem var atvinnumaður í Svíþjóð og gríðarlega öflugur leikmaður, þannig að þeir verða frábærir. Við erum einnig með FH-inga sem eru mjög vel skipaðir, Afturelding var sömuleiðis með mjög gott lið en þeir bæta við sig fjórum leikmönnum. Stjarnan fær landsliðshafsent til viðbótar við mjög öflugt lið og svo erum við með Haukana sem fá til sín landsliðsmarkvörð og okkar góðvin sem við þekkjum mjög vel, Pétur Pálsson. Svo eru líka önnur lið sem eru vel skipuð þannig að deildin verður frábær og við verðum að vera það líka ef við ætlum að keppa við þessi lið.“   Nýtt parket í stóra salnum tilbúið í október Af fyrstu sjö leikjum liðsins er einn heimaleikur en hann er um miðjan október. Ástæðan fyrir því er sú að verið er að skipta um gólf í stóra sal íþróttamiðstöðvarinnar en dúkurinn sem er löngu kominn til ára sinna mun víkja fyrir splunkunýju parketi. „Við erum spenntir fyrir því að byrja og komast heim til að spila fyrir okkar áhorfendur, þeir skipta okkur gríðarlegu máli en þessi stuðningur sem við höfum fengið undanfarin ár er partur af því að við getum stillt upp eins sterku liði og raun ber vitni og gert hlutina eins og við höfum verið að gera. Ég hlakka bara til að fara inn í nýtt tímabil með okkar frábæra fólki.“  

Viljum spila um stóra titilinn

Guðný Jenný Ásmundsdóttir, markmaður og fyrirliði kvennaliðs ÍBV, eða Jenný eins og hún er alla jafna kölluð, byrjaði að æfa handbolta níu ára gömul með ÍR en þar var hún í tvö ár. Þar hitti Jenný Hrafnhildi Skúladóttur fyrst en sú síðarnefnda var um skeið aðstoðarþjálfari í yngri flokkum félagsins. Eftir nokkurra ára dvöl hjá Fjölni í Grafarvoginum fór Jenný aftur í ÍR þar sem hún tók sín fyrstu skref í meistaraflokki. Blaðamaður settist niður með Jenný og ræddi komandi tímabil.   Hefur komið víða við á ferlinum Á ferlinum hefur Jenný einnig spilað með Haukum og norska úrvalsdeildarfélaginu Molde en þar spilaði hún í fjögur ár áður en hún tók sér pásu frá handbolta og einbeitti sér að barneignum og námi. „Ég byrjaði aftur hjá Val árið 2010 og var með þeim þar til ég eignaðist mitt þriðja barn árið 2014. Eftir það sá ég m.a. um markmannsþjálfun hjá Fylki og hjá yngri landsliðum og A-landsliðinu. Í janúar í fyrra langaði mig síðan til að byrja aftur og spilaði nokkrar leiki með Fylki áður en Hrafnhildur hringdi í mig og spurði mig hvort ég vildi ekki koma til Vestmannaeyja. Ég hafði áhuga á því og lét slag standa,“ segir Jenný í hraðri yfirferð. Jenný hefur sömuleiðis spilað yfir 50 leiki með íslenska landsliðinu og farið á tvö stórmót. „Ég fór bæði á HM 2011 og EM 2012 en HM var klárlega hápunktur ferilsins, það langflottasta sem ég hef tekið þátt í. Reyndar fór ég líka með U-20 landsliðinu á HM í Kína árið 1999 sem var mikið ævintýri en það var í fyrsta skipti sem íslenskt kvennalandslið komst í lokakeppni á stórmóti,“ segir hin 35 ára gamla Jenný sem hefur greinilega marga fjöruna sopið á löngum ferli.   Meiri breidd en í fyrra Eins og fyrr segir samdi Jenný við ÍBV fyrir síðasta tímabil og ekki löngu seinna var hún orðin fyrirliði liðsins en áður hafði Ester Óskarsdóttir borið bandið. „Það er útaf fyrir sig nóg álag að vera bara leikmaður þannig að þessi ákvörðun var tekin með það í huga að dreifa álaginu betur. Það er ekki eins og Ester hafi hætt að taka ábyrgð eftir að ég tók við bandinu, ég sinni bara ákveðnum hlutum og hún öðrum og það hefur gengið vel,“ segir Jenný og bætir við að stemningin í liðinu sé afar góð. „Við fórum í gegnum lærdómsríkt tímabil í fyrra og rétt misstum af sæti í úrslitakeppninni. Við vorum ákaflega svekktar með uppskeruna eftir veturinn en lærðum eins og ég segi mjög mikið. Leikmenn sem höfðu ekki verið að spila stór hlutverk fengu tækifæri til að spreyta sig og vera 60 mínútna leikmenn. Einnig vorum við líka með leikmenn sem voru að stíga upp úr meiðslum og fyrir vikið var breiddin kannski ekki mikil. Mér finnst breiddin hafa aukist núna og það er mikill hugur í leikmönnum, það vilja allir gera betur og komast í úrslitakeppnina.“   Nokkrar mannabreytingar Eftir síðasta tímabil fór portúgalski línumaðurinn Telma Amado aftur til heimalandsins eftir nokkurra ára dvöl á Íslandi. Hin unga Þóra Guðný Arnarsdóttir færði sig einnig um set en hún mun spila með Gróttu á komandi tímabili. „Á móti kemur Díana Kristín, sem spilaði með Fjölni í fyrra, til okkar, hún er örvhent skytta og það er virkilega góður liðsstyrkur í henni. Einnig fáum við línumann frá Spáni sem heitir Asun. Við vissum ekki beint mikið um hana áður en hún kom en hún hefur komið flott inn í hópinn, bæði sem leikmaður og sem karakter. Svo eru ungir leikmenn eins og Eva Aðalsteinsdóttir, sem var í Fylki í fyrra, að koma sterk inn í þetta sem eykur bara breiddina í liðinu enn frekar,“ segir Jenný.   Jákvæð æfingaferð til Hollands Þið voruð í æfingaferð í Hollandi fyrir skemmstu, stóð hún undir væntingum? „Þetta var mjög flott ferð, við fengum fullt af góðum æfingum og tvo góða leiki. Við æfðum með hollensku meisturunum þar sem var hátt tempó og mikil keyrsla. Daginn eftir spiluðum við svo æfingaleik við þær sem endaði með jafntefli en hefði hæglega getað endað með sigri hjá okkur. Strax morguninn eftir spiluðum við svo við lið sem endaði í sjötta sæti í hollensku deildinni í fyrra og unnum þær með níu marka mun. Þetta gaf okkur góða sýn á hlutina og margt mjög jákvætt við þessa tvo leiki,“ segir Jenný.   Vill gera heimavöllinn að gryfju ÍBV er spáð þriðja sætinu í ár en svo lengi sem liðið kemst í úrslitakeppnina þá er fyrirliðinn sáttur. „Það skiptir ekki öllu hvort við endum í þriðja eða fjórða sæti. Svona spár eru ekki mjög áreiðanlegar þar sem margt getur breyst á skömmum tíma. Mér finnst við hins vegar vera lið sem á að geta verið í topp fjórum sætunum, hvort sem það númer eitt, tvö, þrjú eða fjögur. Maður vill bara komast í úrslitakeppni og eiga möguleika á því að spila um stóra titilinn,“ segir Jenný sem að lokum hvetur alla til að mæta á leiki í vetur. „Við viljum spila hraðan bolta og skemmta áhorfendum, þannig að ég hvet alla til að mæta og hjálpa okkur að gera þetta að gryfju og erfiðum heimavelli. Þegar við finnum að við höfum stuðninginn á bak við okkur þá er allt hægt í þessu.“  

Ekkert skemmtilegra en að spila fyrir framan þessa ÍBV áhorfendur

Hrafnhildur Skúladóttir var að vonum bjartsýn fyrir komandi tímabili þegar blaðamaður hitt hana sl. mánudag en daginn áður lagði ÍBV nýliðana í Fjölni að velli með 11 marka mun. „Þetta lítur rosalega vel út núna, svo gott sem allir heilir en Eva Aðalsteins var að koma úr liðþófaaðgerð þannig að það eru þrjár til fjórar vikur í hana. Annars eru allir reynsluboltar heilir,“ segir Hrafnhildur og bætir við að nýi línumaður liðsins, Asun Batista, hafi komið skemmtilega á óvart en ásamt því að spila hefðbundinn handbolta spilar Asun strandhandbolta og er heimsmeistari með spænska landsliðinu í íþróttinni. „Hún lítur mjög vel út, við renndum alveg blint í sjóinn með hana, hún hefði alveg eins getað verið hræðileg en hún er mjög flott. Hún tekur allt sumarið í strandhandbolta en er á veturna í venjulegum handbolta en síðast var hún að spila í efstu deild á Spáni. Hún er í þrusuformi þessi stelpa, mjög snögg og með geggjaðan stökkkraft.“ Skyttan Díana Kristín Sigmarsdóttir gekk einnig til liðs við ÍBV fyrir tímabilið og er ekki annað að heyra en að Hrafnhildur sé afar sátt við viðbæturnar á liðinu. „Díana Kristín var með tvö mörk í leiknum í gær en þurfti að fara útaf. Svo fengu bara ungu stelpurnar að spreyta sig helling þegar við vorum komnar einhverjum 13 mörkum yfir og það var flott að ná því. En Díana var alveg frábær á Selfoss mótinu og mun klárlega koma til með að styrkja okkur mjög mikið.“   Ánægð með að vera spáð þriðja sætinu En hver eru markmið liðsins? „Okkur var spáð þriðja sætinu og við erum bara ánægðar með það, markmið okkar er að komast í úrslitakeppnina og þegar þangað er komið setjum við okkur ný markmið. Við misstum af úrslitakeppninni síðast og ætlum okkur í hana núna. Við vitum ekkert hvernig hópurinn verður þá, ef við verðum með þrjá lykilleikmenn í meiðslum er kannski ekki raunhæft að stefna á titil en ef allir eru heilir og við erum í svipuðu standi og í dag þá er það alveg raunhæft, alveg klárlega,“ segir Hrafnhildur og svara því játandi aðspurð hvort henni þykir liðið samkeppnishæfara í ár en í fyrra. „Markmennirnir okkar hafa verið rosa flottir og það munar miklu. Erla spilaði reyndar ekki leikina úti en Jenný var alveg rosaleg, tók þessa hollensku meistara og snýtti þeim og er bara búin að vera svaðaleg upp á síðkastið. Í gær [sunnudag] var hún með 11 bolta varða og sex mörk fengin á sig. Ég meina ef við erum með svona markvörslu þá er titill alveg eitthvað sem við getum stefnt að, engin spurning.“   Hausinn skiptir öllu máli Stjarnan og Fram munu að öllum líkindum verða aðalkeppinautar ÍBV á komandi leiktíð ef marka má spár og telur Hrafnhildur sitt lið ekki vera neinn eftirbát liðanna tveggja. „Hausinn skiptir gríðarlega miklu máli í þessu og erum við alltaf að stefna að því að verða sterkari þar. Breiddin er sömuleiðis meiri og svo eru margar sem eru búnar að æfa sjúklega vel í sumar, tekið mikið af aukaæfingum og eru í formi lífs síns. Ég myndi aldrei segja að við værum með slakara lið á pappírunum heldur en Fram og Stjarnan, frekar bara jafn sterkt.“   Undir okkur sjálfum komið hvort áhorfendur mæti Nú er verið að setja parket á stóra salinn, er það ekki mikið gleðiefni? „Þetta verður geðveikt og skiptir ótrúlega miklu máli því hitt gólfið var bara ónýtt, ekki hægt að æfa á því. Það var bara ávísun á að tveir leikmenn myndu meiðast ef maður þurfti að vera þarna eina æfingu. Sem betur fer hef ég bara æft tvisvar sinnum inni í þessum sal á þessum tveimur árum sem ég hef verið hérna. Þetta varð að gerast og það er frábært að vera núna með þrjá geggjaða sali,“ segir Hrafnhildur sem vonast eftir góðum stuðningi í vetur frá áhorfendum. „Þetta verður svolítið undir okkur komið, hvort við verðum frábært lið sem spilar með mikilli gleði og stendur sig vel, þá mun fólk koma og horfa á okkur. Þetta helst í hendur, það nennir enginn að horfa á einhverja leiðindapésa sem eru í fýlu inni á vellinum þannig að við verðum bara að sjá til þess að það verði gaman til að trekkja fólk á völlinn, við ætlum okkur að gera það. Það er náttúrulega ekkert skemmtilegra en að spila fyrir framan þessa ÍBV áhorfendur þannig að því fleiri því betra.  

Ómetanlegar minningar sem við munum lifa með lengi

Blaðamaður sló á þráðinn til Sóleyjar Guðmundsdóttur, fyrirliða ÍBV, í gær en þá var hún staðsett í Reykjavík. Aðspurð hvernig henni fannst leikurinn hafa spilast sagði fyrirliðinn ÍBV liðið hafa byrjað vel en gefið aðeins eftir sem varð til þess að Stjarnan náði góðum tökum í lok fyrri hálfleiks. „Við byrjuðum mjög vel og vorum yfir í allri baráttu fyrstu 30 mínúturnar en svo duttum við niður og það nýttu Stjörnustelpur sér mjög vel og skoruðu tvö mörk rétt fyrir hálfleik. Það var eins og blaut tuska í andlitið og sem betur fer kom hálfleikur og við gátum rætt málin. Það gekk mjög vel og þegar við komum út í seinni hálfleik kom ekkert annað til greina en að gefa allt sem við áttum eftir til að snúa taflinu við. Í framlengingunni fannst mér við miklu sterkari og í raun bara spurning um hvenær sigurmarkið kæmi.“ Hvert var ykkar leikplan? „Við lögðum upp með að koma strax í veg fyrir að þær myndu ná takti í sitt spil og um leið og við myndum vinna boltann ætluðum við að keyra hratt á þær og komast á bakvið vörnina þeirra,“ segir Sóley sem viðurkennir að smá stress hafi gert vart við sig undir lok leiks. „Ég viðurkenni að þegar ég sá 85 mínútur á klukkunni hugsaði ég til bikarúrslitaleiksins í fyrra en ætli það hafi ekki bara gefið þennan auka kraft sem við fengum og skilaði okkur jöfnunarmarkinu. Þegar það kom þá var ég aldrei í vafa um að við myndum klára þetta.“ Það var mikið hlaupið í þessum leik, hversu erfitt er að halda út heila framlengingu? „Líkamlega var þetta einn erfiðasti leikur sem ég hef spilað, krampi gerði vart við sig óvenju snemma en við vorum með svo gott fólk í kringum okkur sem var við öllu búið með súkkulaði, banana og allt mögulegt til að halda okkur ferskum,“ segir Sóley. Vítaspyrnudómurinn var umdeildur, var þetta réttur dómur að þínu mati? „Já, mér fannst þetta vera víti. Snertingin var kannski ekkert rosalega mikil en þegar Cloé er komin á ferðina inni á teig þá þurfa varnarmennirnir að verjast mjög skynsamlega. Eins og í þessu tilfelli náði hún að skjóta sér á milli tveggja varnarmanna og eini sénsinn þeirra til að stoppa hana var að brjóta,“ segir Sóley. Hvernig var svo tilfinningin að lyfta bikarnum fyrir framan stuðningsmennina og koma síðan með hann heim til Eyja? „Að lyfta bikarnum með þessum frábæru stelpum fyrir framan alla geggjuðu stuðningsmennina okkar er ólýsanlegt. Ferðin heim til Eyja var ótrúleg! Biddý, ÍBV-ari og lögreglukona á Suðurlandi, fylgdi okkur til Landeyjahafnar með blikkandi ljós og þegar við komum í Landeyjahöfn tók á móti okkur flugeldasýning. Þetta var skemmtilegasta Herjólfsferð sem ég hef upplifað þar sem við fengum flugeldasýningu bæði á Elliðaey og Bjarnarey og svo þegar við sigldum inn innsiglinguna. Á bryggjunni voru móttökurnar fáránlega geggjaðar! Allur þessi fjöldi stóð þarna í rigningunni til að taka á móti okkur og syngja og fagna með okkur. Allir sem voru með okkur voru í sæluvímu og það var svo mikil gleði í hópnum. Þetta eru ómetanlegar minningar sem við munum lifa á lengi. Við erum allar svo ótrúlega þakklátar fyrir allan stuðninginn sem við fengum allt frá þjálfurum og stjórnarmeðlima til stuðningsmanna. Þetta er svo einstakt og við erum svo lánsamar að vera í ÍBV og búa í þessu samfélagi sem Vestmannaeyjar eru!“ segir Sóley að lokum.  

Ætlaði að slá Íslandsmetið

Þann 19. ágúst sl. fór fram árlegt Reykjavíkurmaraþon Íslandsbanka. Eyjamaðurinn Hlynur Andrésson gerði sér lítið fyrir og sigraði í hálfmaraþoni á tímanum 1:09:08, sem er jafnframt þriðji besti árangur sem Íslendingur hefur náð í Reykjavíkurmaraþoninu í vegalengdinni. Blaðamaður ræddi við Hlyn á dögunum um þetta mikla afrek. Aðspurður hvort hann væri ekki sáttur með tímann sagði Hlynur svo ekki vera og að hann ætti meira inni. „Satt að segja þá var ég ekkert himinlifandi yfir tímanum sem ég hljóp, því að ég veit að ég get hlaupið töluvert hraðar. Ég hafði verið að berjast við veikindi stuttu fyrir hlaup og þau háðu mér víst svolítið á keppnisdag.“ Ef þú ferð aðeins í gegnum hlaupið frá upphafi til enda, hvernig fannst þér það hafa verið? Gekk allt eftir plani? Ég byrjaði fremur hratt því að ég ætlaði að sjá hvort að ég gæti sótt að íslandsmetinu, en eftir fimm kílómetra fann ég að ég átti mun erfiðara með ad halda uppi hraðanum en venjulega. Ég vissi þar með að ég ætti fremur erfitt hlaup fyrir hendi en þó gerði ég nóg til þess að sigra,“ segir Hlynur en samkvæmt honum er það afar misjafnt hversu lengi maður er að jafna sig eftir svona hlaup. „Þad fer alveg eftir því hversu mikið þú reynir á þig og á hvaða stigi þú ert sem hlaupari. En það er góð þumalputtaregla að taka einn dag í hvíld fyrir hverja þrjá kílómetra sem þú keppir, þannig að maður þarf sirka viku til að ná sér alveg eftir hálfmaraþon (21,1km).“ Þegar talið barst að skóbúnaði segist Hlynur hlaupa flesta kílómetra sína í skóm frá Brooks. „Aðallega týpurnar Glycerin og Ghost. Á keppnisdag þarf maður samt léttari skó og því var ég í Brooks Ravenna í Reykjavíkurmaraþoninu. Skór skipta mjög miklu máli, bæði upp á það að halda sér heilum og meiðslalausum og til þess að ná sem bestum árangri.“   Langtímamarkmiðið Ólympíuleikar í Tókýó 2020 Hvað tekur núna við? „Nú tekur við síðasta ár mitt í Bandaríkjunum þar sem ég mun klára meistaranám í frumeinda- og sameindalíffræði næsta vor og samtímis mun ég vera að keppa fyrir skólann minn í frjálsum og cross country (víðavangshlaupum),“ segir Hlynur sem heldur ótrauður áfram í átt að markmiðum sínum. „Ég var grátlega nálægt því að verða fyrsti Íslendingur til þess að hlaupa 5 km undir 14 mínútum í fyrra þegar ég hljóp 14:00.83, þannig að það væri gaman að ná því markmiði loksins. Svo er ég einnig ad vonast eftir að ná lágmarki á Evrópumeistaramótið í frjálsum sem verður haldið í Berlín í júlí á næsta ári. Langtíma markmiðið er samt enn þá Ólympíuleikarnir í Tókýó 2020,“ segir Hlynur að lokum.  

Sáttur við tímabilið þó markiðið hafi verið sett á úrslitakeppnina

Eins og fram kom í síðasta tölublaði Eyjafrétta hefur KFS lokið keppni þetta tímabilið en liðið sigraði SR í lokaleiknum með sex mörkum gegn fjórum á heimavelli. Fyrir leikinn var ljóst að liðið kæmist ekki í úrslitakeppnina og væri sömuleiðis öruggt með þriðja sætið í B riðli 4. deildarinnar. Blaðamaður sló á þráðinn til Einars Kárasonar, þjálfara KFS, og ræddi við hann um tímabilið. Einar tók við liðinu af Hjalta Kristjánssyni fyrir sumarið eftir að hafa verið leikmaður þess um árabil. KFS endar í þriðja sæti B riðilsins á þínu fyrsta tímabili með liðið, ertu ánægður með árangurinn? „Ég er nokkuð sáttur við sumarið í heildina litið þrátt fyrir að markmiðið hafi verið sett á að ná úrslitakeppni, en við vissum að það væru sterk lið í þessum riðli og nánast öll lið gætu tekið stig í hvaða leik sem er,“ segir Einar sem telur þetta sumar hafa verið mjög lærdómsríkt fyrir hann sem þjálfara. „Algjörlega. Þetta er mitt fyrsta tímabil þar sem ég er að vinna með fullmótaða karlmenn innan um unga og spennandi leikmenn. Ég lærði eitthvað nýtt nánast vikulega og var fljótur að sjá hvað virkaði og hvað ekki.“ Tapleikirnir enda aldrei með meira en eins marks mun og virðist sem það hafi bara vantað herslumuninn í sumum leikjunum. „Það má segja það. Eins og ég sagði voru mörg sterk lið í þessum riðli og nokkuð ljóst að ekkert lið var að fara í gegnum þennan riðil án þess að tapa stigum. Til að mynda unnum við bæði liðin sem fara í úrslitakeppnina á heimavelli, tiltölulega sannfærandi, með eins marks mun en töpuðum að sama skapi báðum útileikjunum með eins marks mun.“ segir Einar.   Vel heppnað samstarf KFS og ÍBV KFS vann náið með ÍBV og fengu til að mynda margir ungir leikmenn að spreyta sig með liðinu. Fannst þér þetta samstarf hafa heppnast vel? „Frá mínu sjónarhorni séð fannst mér það ganga virkilega vel. Við höfum undanfarin ár verið í samstarfi við ÍBV en það voru allir sammála um að betur mætti fara að því. Ég var einnig ráðinn til að aðstoða Mick White með 2. flokk ÍBV og fannst mér við ná virkilega vel saman. Við æfðum saman, KFS/2.flokkur, sem gerði það að verkum að menn lærðu betur inn á hvern annan og urðu að einni heild. Það hjálpaði mér líka helling að ég var búinn að þjálfa marga af þessum peyjum frá því þeir voru í 4. flokki svo ég þekkti styrk þeirra flestra og galla. Ungu strákarnir fengu mikilvægan spiltíma og var byrjunarliðið hjá okkur í þó nokkrum leikjum að meðaltali 19.5 - 21.5 árs. Þessir strákar fengu traustið alveg frá fyrsta leik og ollu engum vonbrigðum,“ segir Einar, sáttur með sína menn. Aðspurður hvort hann haldi áfram með liðið segir Einar að hann hafi áhuga á því. „Áhuginn er klárlega til staðar frá mér séð. Ef aðstæður leyfa og allt gengur upp þá sé ég ekkert til fyrirstöðu. Eigum við ekki bara að segja já.“ Hvað tekur við núna, hvernig sérðu fyrir þér undirbúningstímabil og næsta sumar? „Góð spurning. Við stefnum á að byrja aftur að æfa saman eftir fríið sem tekur við þegar 2. flokkurinn klárar sitt tímabil. Við fengum ekkert alvöru undirbúningstímabil fyrir tímabilið í ár en stefnt er á að gera betur fyrir tímabilið 2018,“ segir Einar að lokum.  

Stuðningsmenn geta verið tólfti maðurinn

Blaðamaður settist niður með Ian Jeffs, þjálfara kvennaliðs ÍBV, fyrir helgi og ræddi við hann um úrslitaleikinn næsta laugardag. Sagði hann m.a að tapleikurinn í fyrra hefði verið góð reynsla fyrir leikmenn sem hafa lært mikið síðan þá. Jafnframt segir hann liðið í góðu standi og leikmenn fullir sjálfstrausts eftir góðan sigur á Þór/KA í deildinni. Aðspurður út í sína reynslu af úrslitaleikjum segir Jeffs bikarúrslitin í fyrra hafa verið hans fyrsta skipti. „Það er í raun fyrsta skiptið, ég komst aldrei sem leikmaður. Þetta var rosalega gaman og gaman að fá að vera partur af þessu. Þessir leikir eru stærstu leikir ársins í bæði karla- og kvennaboltanum og flott að fá að upplifa þetta.“   Nálgast alla leiki eins Hvernig eru svona leikir frábrugðnir öðrum leikjum fyrir þjálfara? „Það er svolítið öðruvísi stemning. En sem þjálfari þá verður þú að hafa undirbúninginn eins og þetta sé bara einn annar leikur, það er ekki gott ef leikmenn fara að hugsa of mikið í kringum leikinn. En þetta er vissulega öðruvísi. Allir bikarleikir eru þess eðlis að það þarf einhver að standa uppi sem sigurvegari og það eru engin jafntefli. Maður þarf að vera undirbúinn fyrir framlengingu og vítaspyrnukeppni. En það sem við höfum gert frá fyrstu umferð í bikarnum er að halda okkar rútínu daginn fyrir leik og það er engin breyting. Vonandi náum við bara að klára þetta á 90 mínútum og þurfa ekki að fara í hitt.“ ÍBV liðið var nokkuð öruggt á punktinum gegn Grindavík í undanúrslitunum en skiljanlega vill þjálfarinn komast hjá því að láta reyna á það aftur. „Maður veit aldrei hvernig vítaspyrnukeppnir fara og maður stefnir aldrei á að fara þangað. En maður er tilbúinn ef það kemur til þess og við erum búin að æfa það eins og allt annað,“ segir Jeffs. Hvernig mun reynslan frá leiknum í fyrra nýtast ykkur núna? „Fyrir mig og alla leikmennina var þetta í fyrsta skiptið sem við tókum þátt í úrslitaleik. Við fáum náttúrulega skell strax eftir eina og hálfa mínútu þegar við fáum mark á okkur, algjört skítamark. Svo fáum við annað mark á okkur eftir 20 mínútna leik og það var bara of mikið fyrir okkur á einum hálftíma. En við verðum bara að nýta þessar reynslu og byrja frá fyrstu mínútu og ekki láta völlinn og stuðningsmennina hafa neikvæð áhrif á spilamennskuna, heldur njóta þess og vera jákvæð og reyna að læra af leiknum í fyrra og ég er alveg viss um að leikmenn hafa gert það,“ segir Jeffs. Spennustigið er væntanlega betur stillt þegar maður hefur gengið í gegnum svona áður? „Já, það er bara þannig. Leikmenn sem spiluðu ekki leikinn í fyrra geta vonandi litið til þeirra sem spiluðu og lært eitthvað af þeim og fengið leiðsögn,“ segir Jeffs.   Þór/KA leikurinn gott búst fyrir úrslitin Eftir að hafa gert þrjú jafntefli í röð, sigraði ÍBV topplið Þór/KA í síðasta leik. Jeffs vill þó ekki meina að liðið hafi verið að spila illa heldur náð í stig í erfiðum leikjum. „Þó við höfðum ekki unnið þessa leiki þá getur maður samt horft á þetta sem góð stig. Stjarnan á útivelli er gott stig og erum við ánægð með það þrátt fyrir að stefna að sjálfsögðu alltaf á þrjú stig. Leikirnir gegn Grindavík heima og FH úti voru ekki nógu góðir leikir hjá okkur en við áttum skilið að vinna þá báða. Við gáfum þeim mörkin í þessum leikjum og það var ekki eins og þau væru að skapa sér mikið. Þetta var í raun bara okkur að kenna. Svo má ekki gleyma að við höfum ekki tapað í næstum þrjá mánuði þannig ég var ekkert að stressa mig á því að hafa ekki unnið þessa leiki. Við vorum að spila ágætlega á köflum,“ segir Jeffs sem var virkilega ánægður með sigurinn gegn Þór/KA. „Ég er ánægður með karakterinn í liðinu og ég held að fáir hafi séð þetta fyrir sérstaklega í stöðunni 0:2. Þetta sýnir bara að við vildum ekki gefa eftir og halda áfram að vera taplaus á heimavelli. Þetta var virkilega gott búst fyrir úrslitaleikinn.“ Bendir Jeffs jafnframt á að taflan í deildinni gefi ekki alveg rétta mynd af getu liðanna en þar er Þór/KA með gott forskot á toppnum. „Ég þekki þetta vel sem þjálfari og veit að það er lítill munur á fimm efstu liðunum. Þór/KA hefur að mínu mati verið með heppnina með sér þetta tímabilið, liðið hefði átt að tapa fleiri stigum en það hefur gert. Á góðum degi getur maður unnið öll þessi lið en á vondum degi getur maður líka tapað fyrir þeim öllum, það er rosalega lítill munur finnst mér.“   Þurfa að hafa góðar gætur á sterkum sóknarmönnum Stjörnunnar Það þarf að ganga upp hjá ykkur og hvað þurfið þið að stoppa í þeirra liði svo þið náið hagstæðum úrslitum? „Þær eru með gríðarlega sterka sóknarleikmenn í sínu liði og sækja oft á mörgum mönnum. Þær sækja mikið upp kantana og eru með sterka leikmenn frammi og svo Katrínu þarna í tíunni. Þær geta búið til færi upp úr engu þannig að við þurfum að spila mjög góðan varnarleik til að vinna þær og sömuleiðis nýta tækifærin okkar þegar þau gefast. Við þurfum að velja réttar sendingar en oft erum við að senda langt þegar við þurfum að senda stutt og öfugt. Við þurfum bara að eiga mjög góðan leik en ég held að þær hugsi nákvæmlega það sama og vita alveg að við getum refsað fyrir mistök. Þetta eru tvö jöfn lið og þetta verður bara 50/50 leikur,“ segir Jeffs.   Stuðningsmenn geta verið tólfti maðurinn Aðspurður út í stöðuna á hópnum segir þjálfarinn hana góða. „Ég veit ekki betur en að allir séu heilir og allir mjög spenntir fyrir verkefninu. Eins og ég segi þá gaf leikurinn gegn Þór/KA okkur mikið búst, að vera fyrsta liðið til að vinna þær. Leikmenn eru bara spenntir og held ég að þetta verði flottur fótboltaleikur fyrir áhorfendur sem verða vonandi fjölmennir eins og þegar strákarnir voru að spila. Ég hef fulla trú á að við getum unnið baráttuna á milli stuðingsmanna og að þeir verði eins og tólfti maðurinn á vellinum,“ segir Jeffs og ítrekar að í svona leikjum skipti stuðingurinn öllu máli. „Leikmenn karlaliðsins töluðu um það eftir leik að þetta hefði verið geggjuð upplifun, að hafa svona stemningu uppi í stúku og vonandi fær kvennaliðið bara það sama. Við viljum bara hafa þetta nákvæmlega eins og vonandi verður útkoman sú sama.“    

Heimir stoltur af strákunum eftir sigur gegn Úkraníu

„Fyrst og fremst er ég stolt­ur af strák­un­um,“ sagði Heim­ir Hall­gríms­son landsliðsþjálf­ari á blaðamanna­fundi eft­ir 2:0-sig­ur gegn Úkraínu í undan­keppni HM í knatt­spyrnu. Ísland er jafnt Króa­tíu í efsta sæti riðils­ins þegar tvær um­ferðir eru óleikn­ar.   „Það sýn­ir karakt­er­inn í strák­un­um hvað þeir koma sterk­ir í þenn­an leik. Við vor­um all­ir ósátt­ir við frammistöðuna gegn Finn­um,“ sagði Heim­ir og bætti við að karakt­er, skipu­lag og vinnu­semi hefðu lagt grunn­inn að góðum sigri í kvöld.   Jón Daði æst­ur í að sanna sig Spurður að því hvers vegna Jón Daði Böðvars­son hefði byrjað í kvöld sagði Heim­ir að hann hefði staðið sig vel á æf­ing­um og hefði verið æst­ur í að sanna sig. „Við viss­um að hann myndi ógna bak við varn­ar­lín­una þeirra þannig að Gylfi fengi aðeins meira pláss en í Finn­landi. Þetta voru taktísk­ar ástæður og lík­am­leg­ar ástæður,“ sagði Heim­ir.   Landsliðsþjálf­ar­inn sagði að tími Sverr­is Inga Inga­son­ar væri í raun löngu kom­inn með landsliðinu en Sverr­ir byrjaði í kvöld á kostnað Kára Árna­son­ar. „Hans tími var kom­inn fyr­ir löngu síðan en Kári og Raggi [Ragn­ar Sig­urðsson] hafa spilað svo ofboðslega vel. Hann hef­ur sjálf­ur sagt að hann er framtíðarmiðvörður og hef­ur ekk­ert verið að stressa sig á þessu. Síðasti leik­ur sat í miðvörðunum okk­ar og við töld­um að þetta væri rétti tím­inn.“   Vor­um meðvitaðir um þeirra styrk­leika Úkraínska liðið byrjaði leik­inn af mikl­um krafti en Heim­ir sagði að lagt hefði verið upp með að byrja af krafti. „Það fer ekki allt eins og maður ætl­ar sér,“ sagði Heim­ir og glotti.   „Planið var að falla aðeins aft­ur og reyna að nýta svæðið aðeins bak við þá. Þeir byrjuðu bet­ur og það kom okk­ur ekki á óvart. Við vor­um meðvitaðir um þeirra styrk­leika og viss­um að þetta yrði ekki leik­ur margra færa eða marka,“ sagði þjálf­ar­inn og bætti við að það hafi átt að passa upp á að þeir myndu ekki skora.   Heim­ir sagði að Emil Hall­freðsson fengi oft ekki það hrós sem hann ætti skilið en hann lék sér­stak­lega vel í seinni hálfleik í kvöld. „Við vit­um að þeir eru með væng­menn sem leita inn á miðju. Við héld­um okk­ur við tvo sitj­andi miðju­menn og haf­andi séð þetta þá var það hár­rétt ákvörðun,“ sagði Heim­ir en Aron Ein­ar Gunn­ars­son og Emil voru aft­ar­lega á miðjunni, með Gylfa Sig­urðsson þar fyr­ir fram­an.   Ræðst í loka­leikn­um „Ég hef sagt það frá fyrsta blaðamanna­fundi að riðil­inn mun ráðast í loka­leik,“ sagði Heim­ir en Ísland, Króatía, Úkraína og Tyrk­land eiga öll mögu­leika á því að kom­ast á HM í Rússlandi þegar tvær um­ferðir eru óleikn­ar.   „Það sem mun ráða því hverj­ir kom­ast áfram og hverj­ir verða í öðru sæti eru smá­atriði. Smá­atriði í síðasta leik ræður því hver fer á HM úr þess­um riðli og hverj­ir verða í öðru sæti. Það er mik­il­vægt að við séum með okk­ar smá­atriði á hreinu.“   Heim­ir sagði aðspurður að hann hefði ekki rætt við Lars Lag­er­bäck eft­ir að hans menn í Nor­egi töpuðu 6:0 fyr­ir Þýskalandi í undan­keppni HM. Hann var þá spurður að því hvort Lars hefði leitað meira til hans upp á síðkastið en öf­ugt. „Það hef­ur verið þannig frá upp­hafi,“ sagði Heim­ir og horfði al­var­leg­ur fram í sal­inn. Örfá­um sek­únd­um síðar skelli­hló hann og sagðist vera að grín­ast.   „Ef við kæm­umst á loka­keppni HM myndi ég segja að það væri mesta af­rek í ís­lenskri knatt­spyrnu­sögu. Það myndi ekki bara skipta máli fjár­hags­lega held­ur líka sál­fræðilega. Það væri stórt og mikið af­rek fyr­ir knatt­spyrnu­sam­bandið,“ sagði Heim­ir en næsti leik­ur Íslands í undan­keppn­inni er úti­leik­ur gegn Tyrklandi 6. októ­ber. Mbl.is greindi frá.  

Sigur og tap í Eyjum í dag

Kristján Guðmundsson: Ásættanleg úrslit gegn liðinu í öðru sæti

 Í samtali við blaðamann í gær sagðist Kristján Guðmundsson, þjálfari ÍBV, vera nokkuð sáttur með úrslit leikjanna tveggja og að rétti leikurinn hafi unnist. Jafnframt vildi hann ekki tjá sig um möguleg kaup ÍBV á miðjumanni sem hefur verið í ferli. Fyrirfram ásættanleg niðurstaða í þessum tveimur leikjum er það ekki? „Eigum við ekki að segja bara að við unnum rétta leikinn, þar sem það var ekki hægt að fá jafntefli þarna á fimmtudaginn. Við vissum alltaf að við myndum ekki tapa leiknum á sunnudeginum úr því sem komið var en það var algjörlega okkur að kenna að missa þetta frá okkur þó svo það hafi ekki hjálpað að fá mark ranglega dæmt af okkur. Jú, jú, fyrirfram hefðum við verið sáttir að slá út liðið í öðru sæti deildarinnar og ná jafntefli,“ sagði Kristján. Hvernig standa leikmannamál, þú talaðir um að vilja fá einn leikmann í viðbót og nú er glugginn að loka? „Eins og staðan er núna er það pappírsvinna í útlöndum sem er eftir, við höfum skilað af okkur öllu sem snýr að okkur. Ég vil svo sem ekki segja meira um það ef þetta gengur síðan ekki upp en þetta er sérkennileg staða,“ sagði Kristján sem kveðst vera nokkuð sáttur með hóp sinn eftir félagsskiptagluggann. „Já, já, við erum sáttir, við höfum minnkað hópinn svolítið þannig að svo lengi sem allir eru heilir þá er ég sáttur. Leikmaðurinn sem við erum í viðræðum um að fá er miðjumaður þannig við erum að leitast eftir því að styrkja það svæði fyrir komandi átök,“ sagði Kristján að endingu.  

Myndasafnið >>

Öldudufl við Landeyjahöfn

Öldudufl við Landeyjahöfn

Mannlíf >>

Vaxið ótrúlega hratt og næg verkefni framundan - myndir

Frá því Stefán Lúðvíksson stofnaði Eyjablikk fyrir 20 árum hefur fyrirtækið vaxið og dafnað. Það hefur yfir að ráða rúmgóðu húsnæði við Flatir. Þar vinna um 20 manns og er enginn skortur á verkefnum. Afmælisins var minnst á föstudaginn með fjölmennri veislu í húsnæði Eyjablikks þar sem boðið var upp á veitingar að hætti Sigurðar Gíslasonar á Gott og ljúfa drykki að hætti hússins.   Stefán sagði að aðaluppgangur fyrirtækisins hefði verið síðustu tíu árin og hefði haldist í hendur við mikil umsvif og uppbyggingu í sjávarútvegi í Vestmannaeyjum. „Já, það hefur verið nóg að gera hjá okkur og við erum með næg verkefni næstu tvö árin.“ Afmælisgleðin fór vel fram þar sem Jakkalakkarnir sungu og léku og maturinn eins og best verður á kosið. Og ekki var í kot vísað því í Eyjablikki er hátt til lofts og vítt til veggja og snyrtimennska í hávegum höfð. Og ekki annað að sjá en að fólk skemmti sér vel með Stefáni og hans fólki í Eyjablikki. Eyjablikk býður upp á fjölþætta þjónustu og vinnur bæði fyrir fyrirtæki og einstaklinga. „Fjölbreytni verkefna hefur verið með ólíkindum á þeim árum sem fyrirtækið hefur starfað. Má þar nefna loftræsikerfi, einangrun og klæðningar á hita- og frystilögnum, flasningar, rústfrí smíði, álsmíði, lagning koparþaka, smíði á handriðum ásamt smíði á allra handa færiböndum og körum fyrir sjávarútveginn. Þjónusta við einstaklinga hér í Eyjum er líka stór þáttur í starfsemi okkar. Við hjá Eyjablikk höfum kappkostað við að sinna þeim verkum sem okkur hefur verið treyst fyrir af kostgæfni og með bros á vör, því það skilar sér í ánægðum viðskiptavinum sem leita aftur og aftur til okkar með sínar þarfir,“ segir á heimasíðu fyrirtækisins. Hjá Eyjablikk ehf. starfa 19 manns þar af eru 2 með sveinspróf og 7 með meistarapróf í sinni iðngrein, blikksmíði, vélvirkjun og stálskipasmíðum. Fjórir starfsmenn eru með suðuréttindi ISO 9606-1. Kappkostað er að hafa vel menntaða og duglega einstaklinga í vinnu.   Óskar Pétur var að sjálfsögðu á staðnum með myndavélina og tók meðfylgjandi myndir.  

Stjórnmál >>

Eygló Harðardóttir hætti á Alþingi

Eygló Harðardóttir, þingmaður Framsóknarflokksins, gefur ekki kost á sér í næstu Alþingiskosningum. Þetta kemur fram í tilkynningu sem hún sendi frá sér í morgun. Eygló kveðst lengi hafa verið sannfærð um að þingmennskan eigi ekki að vera ævistarf og hefur talað fyrir stjórnarskrárbreytingum um að þingmaður skuli ekki sitja lengur en átta ár samfellt á Alþingi. Í nóvember næstkomandi verða komin níu ár hjá henni. „Því tel ég rétt á þessum tímapunkti að láta staðar numið og leita nýrra og skemmtilegra ævintýra á öðrum vettvangi,“ segir í tilkynningunni.   Eygló tók sæti á Alþingi árið 2008. Hún var félags- og húsnæðismálaráðherra og samstarfsráðherra Norðurlanda frá 2013 til 2017. Þá hefur hún verið ritari Framsóknarflokksins síðan 2009.   Eftirfarandi er tilkynning Eyglóar:   Í nóvember 2008 tók ég sæti á Alþingi fyrir hönd Framsóknarflokksins við erfiðar aðstæður í miðju bankahruni. Árin síðan hafa verið einstaklega viðburðarrík og árangurinn af vinnu við efnahagslega endurreisn íslensks samfélags hefur verið mikill.   Þar hef ég verið stolt af baráttu okkar framsóknarmanna gegn skuldum, hvort sem það eru skuldir heimilanna eða sá skuldaklafi sem erlendir kröfuhafar vildu hengja á þjóðarbúið. Ég er jafnframt einkar stolt af að hafa sem félags- og húsnæðismálaráðherra komið á nýju húsnæðiskerfi, bætt hag lífeyrisþega og unnið gegn ofbeldi í íslensku samfélagi.   Ég hef lengi verið sannfærð um að þingmennska á ekki að vera ævistarf og talað fyrir stjórnarskrárbreytingum um að hver þingmaður sæti ekki lengur en átta ár samfellt á Alþingi. Í nóvember 2017 verða þau ár orðin níu hjá mér. Því tel ég rétt á þessum tímapunkti að láta staðar numið og leita nýrra og skemmtilegra ævintýra á öðrum vettvangi.   Því mun ég ekki gefa kost á mér til þingstarfa fyrir Alþingiskosningarnar þann 28. október næstkomandi.   Ég vil þakka þeim fjölmörgu sem hafa stutt mig í mínum störfum í gegnum árin, kjósendum fyrir það traust og trúnað sem þeir hafa veitt mér til að starfa í þeirra þágu, góðum félögum út um allt land fyrir gott samstarf og síðast en ekki síst fjölskyldu minni.   Það er von mín að komandi kosningabarátta verði jákvæð og heiðarleg og að samvinnuhugsjón Framsóknarflokksins muni þar ná góðum hljómgrunni.   www.ruv.is greindi frá.  

Greinar >>

Kynslóðaskipti á Strandveginum

Það furða sig kannsk einhverjir á breyttu útliti blaðsins sem kom út i dag, breytt útlit þýðir nefnilega nýtt tímabil. Ómar Garðason ætlar hér með að létta af sér ábyrgðinni, fara að skrifa um það sem honum er hugleikið og setja keflið í hendurnar á mér. Ég vil kalla þetta kynslóðaskipti á Strandveginum, Ómar var allavega byrjaður sinn farsæla blaðamannaferil á Eyjafréttum þegar ég var að fæðast. Það er mikill heiður fyrir mig að fá tækifæri til að taka við og leiða Eyjafréttir inní nýtt tímabil, ég lít svo á að eigendur Eyjasýnar séu þar með að fjárfesta í framtíðinni. Það er nákvæmlega það sem Vestmannaeyjar þurfa, ungt og menntaðarfullt fólk sem er til í að keyra skipið áfram. Það er í raun magnað að í yfir 40 ár hefur verið gefið út bæjarblað í Vestmannaeyjum og það einu sinni í viku með fullt af efni og alltaf er reynt að hafa eitthvað fyrir alla. Planið er að halda þessu áfram ásamt því að stíga vel inní nútímann með nýrri og öflugri heimasíðu sem unnið er að. Vestmannaeyjar eru frábærar, hafa uppá svo margt að bjóða en ekkert er fullkomið. Við ætlum að taka á öllum þessum þáttum og skila til ykkar einu sinni í viku, blaði fullt af efni sem tengist Vestmannaeyjum beint og óbeint. Sumt efni verður á sínum stað ásamt ýmsum nýjungum. Einu sinni í mánuði verður aukablað með tilteknu þema sem við höfum verið að gera við góðar undirtektir. Við lofum skemmtilegu, lifandi og upplýsandi blaði inn um lúguna þína í hverri viku og minnum þig á kæri Eyjamaður að áskrift tryggir útgáfu.