ÍBV og Víkingur R. skildu jöfn

ÍBV og Víkingur R. skildu jöfn

 ÍBV og Víkingur R. mættust í 14. umferð Pepsi-deildar karla í dag þar sem lokastaða var 1:1 en mark Eyjamanna gerði Mikkel Maigaard. Eftir leikinn er ÍBV enn í næst síðasta sæti, með jafn mörg stig og Víkingur Ó. sem á leik til góða.

Kristján Guðmundsson: Ásættanleg úrslit gegn liðinu í öðru sæti

 Í samtali við blaðamann í gær sagðist Kristján Guðmundsson, þjálfari ÍBV, vera nokkuð sáttur með úrslit leikjanna tveggja og að rétti leikurinn hafi unnist. Jafnframt vildi hann ekki tjá sig um möguleg kaup ÍBV á miðjumanni sem hefur verið í ferli. Fyrirfram ásættanleg niðurstaða í þessum tveimur leikjum er það ekki? „Eigum við ekki að segja bara að við unnum rétta leikinn, þar sem það var ekki hægt að fá jafntefli þarna á fimmtudaginn. Við vissum alltaf að við myndum ekki tapa leiknum á sunnudeginum úr því sem komið var en það var algjörlega okkur að kenna að missa þetta frá okkur þó svo það hafi ekki hjálpað að fá mark ranglega dæmt af okkur. Jú, jú, fyrirfram hefðum við verið sáttir að slá út liðið í öðru sæti deildarinnar og ná jafntefli,“ sagði Kristján. Hvernig standa leikmannamál, þú talaðir um að vilja fá einn leikmann í viðbót og nú er glugginn að loka? „Eins og staðan er núna er það pappírsvinna í útlöndum sem er eftir, við höfum skilað af okkur öllu sem snýr að okkur. Ég vil svo sem ekki segja meira um það ef þetta gengur síðan ekki upp en þetta er sérkennileg staða,“ sagði Kristján sem kveðst vera nokkuð sáttur með hóp sinn eftir félagsskiptagluggann. „Já, já, við erum sáttir, við höfum minnkað hópinn svolítið þannig að svo lengi sem allir eru heilir þá er ég sáttur. Leikmaðurinn sem við erum í viðræðum um að fá er miðjumaður þannig við erum að leitast eftir því að styrkja það svæði fyrir komandi átök,“ sagði Kristján að endingu.  

Sigur og jafntefli gegn Stjörnunni í síðustu viku

Karlalið ÍBV og Stjörnunnar mættust tvívegis í síðustu viku, fyrst í Borgunarbikarnum á fimmtudeginum þar sem Eyjamenn höfðu betur 1:2 og svo í Pepsi-deildinni á sunnudeginum þar sem lokatölur urðu 2:2. Bresku varnarmennirnir, David Atkinson og Brian Stuart McLean, sem gengu til liðs við ÍBV í félagsskiptaglugganum komu báðir inn í byrjunarliðið í undanúrslitaleiknum en með Hafsteini Briem mynduðu þeir hjarta varnarinnar. Fyrsta hættulega færi Eyjamanna kom ekki fyrr en á 36. mínútu en þá átti Mikkel Maigaard skot fyrir utan teig sem Haraldur í marki Stjörnunnar þurfti að hafa sig allan við til að verja. Fyrsta mark leiksins leit dagsins ljós á 60. mínútu en þar var að verki Stjörnumaðurinn Hilmar Árni Halldórsson en fyrirgjöf hans utan af kanti fór yfir Derby Carillo og endaði í netinu. Nokkrum mínútum síðar jafnaði Hafsteinn Briem metin fyrir ÍBV en þá fylgdi hann eftir skoti Kaj Leó í Bartalstovu sem hafði gert vel í aðdragandanum. Kaj Leó var síðan aftur á ferðinni á 73. mínútu en eftir leiftursókn Eyjamanna þrumaði Færeyingurinn boltanum í fjærhornið, óverjandi. Þetta mark reyndist lokamark leiksins og Eyjamenn því á leið í úrslit annað árið í röð. Á laugardaginn kemur síðan í ljós hver mótherji ÍBV verður í úrslitaleiknum en þá mætast FH og 1. deildar liðið Leiknir R. í Kaplakrika í hinum undanúrslitaleiknum. Úrslitaleikurinn sjálfur fer síðan fram á Laugardalsvelli laugarinn 12. ágúst kl. 16:00.   Misstu niður forystu á móti tíu Stjörnumönnum ÍBV og Stjarnan mættust síðan aftur í fjörugum leik í Pepsi-deild karla sl. sunnudag þar sem lokatölur urðu 2:2 eins og fyrr segir. Mikkel Maigaard kom heimamönnum yfir eftir um 13 mínútna leik en gestirnir úr Garðabænum jöfnuðu metin fimm mínútum síðar úr vítaspyrnu sem Eyjamenn voru ósáttir með en Brian McLean átti þá að hafa handleikið boltann inni í teig. Á 22. mínútu leiksins féll McLean síðan í vítateig gestanna og var þá aftur vítaspyrna dæmd. Steig Gunnar Heiðar Þorvaldsson á punktinn og skoraði af miklu öryggi og kom ÍBV aftur í forystu. Það dró strax til tíðinda á upphafsmínútum síðari hálfleiks en þá fékk Stjörnumaðurinn Eyjólfur Héðinsson sitt annað gula spjald fyrir klaufalegt brot og þar með rautt. ÍBV tókst hins vegar ekki að nýta sér liðsmuninn og voru það gestirnir sem náðu að gera jöfnunarmark þegar um stundarfjórðungur lifði leiks en þá fylgdi Guðjón Baldvinsson eftir vítaspyrnu sem Derby Carillo varði í marki ÍBV. Jafntefli því niðurstaðan í leik sem hefði þurft að vinnast.  

EM 2017 :: Landsliðkonur sátu fyrir svörum - Berglind Björg Þorvaldsdóttir

 Það hefur væntanlega ekki farið framhjá mörgum að EM kvenna í knattspyrnu er komið á fullt en í gær spilaði íslenska liðið sinn fyrsta leik á mótinu, þá gegn Frakklandi. Í riðlakeppninni á Ísland næst leik gegn Sviss á laugardaginn og síðan Austurríki á miðvikudaginn í næstu viku. Eftir það skýrist svo hvort liðið mun komast upp úr riðlinum í 16 liða úrslit. Í hópnum að þessu sinni eru þó nokkrar Eyjastelpur en af þeim leikur aðeins ein með ÍBV en það er Sigríður Lára Garðarsdóttir. Þær Berglind Björg Þorvaldsdóttir og Fanndís Friðriksdóttir, leikmenn Breiðabliks, eiga báðar rætur að rekja til Vestmanneyja sem og systurnar Elísa og Margrét Lára Viðarsdætur en þær eru báðar frá vegna meiðsla og taka ekki beinan þátt í mótinu. Blaðamaður hafði samband við landsliðskonurnar fimm, sem þrátt fyrir annir, gáfu sér tíma til að svara nokkrum spurningum fyrir Eyjafréttir. Hér eru svör Berglindar Bjargar.   Aldur: 25 ára. Gælunafn: Begga, Bebba, Bergie, Beggz er svona helst. Helsta áhugamál fyrir utan fótbolta: Er algjör kvikmyndanörd og svo er golfið aðeins byrjað að kitla núna. Eftirlætis matur: Steiktur fiskur og kjúklingavængir. Versti matur: Reyktur matur. Uppáhalds drykkur fyrir utan vatn: Kristall. Fallegasti staður sem þú hefur komið á: Vestmannaeyjar. Uppáhalds tónlistarmaður/hljómsveit: Er algjör alæta á tónlist. En svona helst Radiohead, Hjálmar og Fleetwood Mac. Gætir þú verið án snjallsíma í heila viku: Já, ég held ég gæti það. Fyrsti leikur í meistaraflokki: 2007 á móti Þór/KA. Rútína á leikdegi: Engin ákveðin rútína en ég fer oftast á Nings í hádeginu. Hlusta á tónlist og fæ mér góðan kaffibolla. Grófasti leikmaður í landsliðinu: Sísí Lára, a.k.a. sláttuvélin. Besti samherji í landsliði og félagsliði: Það er geggjað að spila með þeim öllum. Hver er fyndnust í landsliðinu: Hallbera fær þennan titil. Erfiðasti mótherji sem þú hefur mætt á ferlinum: Hope Solo. Besta minning frá yngri flokkum: Þær eru mjög margar. Ætli það séu ekki bara allir titlarnir sem ég hef unnið með ÍBV og Breiðabliki. Svo varð ég einnig Dana Cup meistari með Breiðabliki. Besta minning á ferlinum: Bandaríkjameistari með Florida State háskólanum og Bikarmeistari með Breiðabliki 2016. Mestu vonbrigði á ferlinum: Þegar ég reif vöðva aftan í læri árið 2014. Er ennþá að díla við þau meiðsli. Draumalið til að spila með: Barcelona. Hefur þú fengið spjald fyrir dýfu: Nei, er ekki mikið að vinna með dýfurnar. Fylgist þú mikið með fótbolta? Ef svo er hvert er þitt uppáhaldslið: Já, mjög mikið. Manchester United er mitt lið. Fyrir utan fótbolta, fylgist þú með öðrum íþróttum: Já, ég fylgist með handbolta og aðeins amerískum fótbolta. Besti íþróttalýsandinn: Gummi Ben. Uppáhalds íþróttamaður í sögunni: Ruud van Nistelrooy. Ef þú mættir breyta einhverju við fótbolta, hvað væri það: Engu held ég bara. Hver mun skora fyrsta mark íslenska landsliðsins á EM í Hollandi: Kemur í ljós.

EM 2017 :: Landsliðkonur sátu fyrir svörum - Sigríður Lára Garðarsdóttir

Það hefur væntanlega ekki farið framhjá mörgum að EM kvenna í knattspyrnu er komið á fullt en í gær spilaði íslenska liðið sinn fyrsta leik á mótinu, þá gegn Frakklandi. Í riðlakeppninni á Ísland næst leik gegn Sviss á laugardaginn og síðan Austurríki á miðvikudaginn í næstu viku. Eftir það skýrist svo hvort liðið mun komast upp úr riðlinum í 16 liða úrslit. Í hópnum að þessu sinni eru þó nokkrar Eyjastelpur en af þeim leikur aðeins ein með ÍBV en það er Sigríður Lára Garðarsdóttir. Þær Berglind Björg Þorvaldsdóttir og Fanndís Friðriksdóttir, leikmenn Breiðabliks, eiga báðar rætur að rekja til Vestmanneyja sem og systurnar Elísa og Margrét Lára Viðarsdætur en þær eru báðar frá vegna meiðsla og taka ekki beinan þátt í mótinu. Blaðamaður hafði samband við landsliðskonurnar fimm, sem þrátt fyrir annir, gáfu sér tíma til að svara nokkrum spurningum fyrir Eyjafréttir. Hér eru svör Sigríðar Láru.     Aldur: 23 ára. Gælunafn: Sísí. Helsta áhugamál fyrir utan fótbolta: Golf og útivera. Eftirlætis matur: Allt sem mamma eldar, en ef ég á að velja eitt þá er það fiskur. Versti matur: Kjötfars er ekki í miklu uppáhaldi. Uppáhalds drykkur fyrir utan vatn: Kristall. Fallegasti staður sem þú hefur komið á: Það toppar ekkert sumarkvöld í Vestmannaeyjum. Uppáhalds tónlistarmaður/hljómsveit: Á engan uppáhalds tónlistarmann, hlusta eiginlega á flest allt. Gætir þú verið án snjallsíma í heila viku: Já, ég held ég gæti gert það! Fyrsti leikur í meistaraflokki: Það var árið 2009, þá 15 ára gömul. Rútína á leikdegi: Þegar ég spila með ÍBV þá reyni ég að hafa svipaða rútínu á leikdegi, en hann byrjar á góðum morgunmat, fer í vinnu til hádegis, borða orkuríkan hádegismat, eftir það tek ég mér stutta lögn og síðan er það fundur með liðinu og svo er ég mætt rúmlega einum og hálfum tíma fyrir leik inn í klefa að undirbúa mig. Grófasti leikmaður í landsliðinu: Sara Björk fær þennan titil. Besti samherji í landsliði og félagsliði: Ég get ekki gert upp á milli bæði hjá landsliðinu og með ÍBV. Þær eru allar frábærir samherjar. Mér finnst mjög gott að spila með Söru Björk á miðjunni með landsliðinu, hún er algjör baráttujaxl og mikill leiðtogi. Hver er fyndnust í landsliðinu: Berglind Björg kemur mér alltaf til að hlægja. Erfiðasti mótherji sem þú hefur mætt á ferlinum: Spánn og Brasilía. Besta minning frá yngri flokkum: Öll mótin sem ég fór á með ÍBV. Besta minning á ferlinum: Það er margt sem kemur upp í hugann, en undanúrslitaleikur í bikar á móti Þór/KA í fyrra, sumarið 2011 þegar við lentum í 2. sæti á fyrsta tímabilinu í Pepsi-deildinni og svo var fyrsti landsleikurinn á Laugardalsvelli á móti Brasilíu núna í júní, ógleymanleg minning. Mestu vonbrigði á ferlinum: Tap í bikarúrslitaleiknum í fyrra á móti Breiðablik. Draumalið til að spila með: Draumurinn er að fara út í atvinnumennsku í lið í Svíþjóð eða Þýskalandi. Hefur þú fengið spjald fyrir dýfu: Nei, aldrei. Fylgist þú mikið með fótbolta? Ef svo er hvert er þitt uppáhaldslið: Já, er dugleg að fylgjast með fótbolta bæði hér heima og erlendis. ÍBV, Manchester United og Barcelona eru mín lið. Fyrir utan fótbolta, fylgist þú með öðrum íþróttum: Já, fylgist með handbolta, körfubolta og golfi. Besti íþróttalýsandinn: Gummi Ben. Uppáhalds íþróttamaður í sögunni: Michael Jordan. Ef þú mættir breyta einhverju við fótbolta, hvað væri það: Ég myndi ekki vilja breyta neinu, hann er fullkominn. Hver mun skora fyrsta mark íslenska landsliðsins á EM í Hollandi: Dagný Brynjars.  

EM 2017 :: Landsliðkonur sátu fyrir svörum - Elísa Viðarsdóttir

Það hefur væntanlega ekki farið framhjá mörgum að EM kvenna í knattspyrnu er komið á fullt en í gær spilaði íslenska liðið sinn fyrsta leik á mótinu, þá gegn Frakklandi. Í riðlakeppninni á Ísland næst leik gegn Sviss á laugardaginn og síðan Austurríki á miðvikudaginn í næstu viku. Eftir það skýrist svo hvort liðið mun komast upp úr riðlinum í 16 liða úrslit. Í hópnum að þessu sinni eru þó nokkrar Eyjastelpur en af þeim leikur aðeins ein með ÍBV en það er Sigríður Lára Garðarsdóttir. Þær Berglind Björg Þorvaldsdóttir og Fanndís Friðriksdóttir, leikmenn Breiðabliks, eiga báðar rætur að rekja til Vestmanneyja sem og systurnar Elísa og Margrét Lára Viðarsdætur en þær eru báðar frá vegna meiðsla og taka ekki beinan þátt í mótinu. Blaðamaður hafði samband við landsliðskonurnar fimm, sem þrátt fyrir annir, gáfu sér tíma til að svara nokkrum spurningum fyrir Eyjafréttir. Hér eru svör Elísu.   Aldur: 26 ára. Gælunafn: Sumir kalla mig Ellu, ég er ekki hrifin af því. Helsta áhugamál fyrir utan fótbolta: Ég hef ótrúlega gaman af því að elda góðan mat og fá gesti í heimsókn, góðar samverustundir með vinum og fjölskyldu eru dýrmætar stundir. Eftirlætis matur: Ég elska fisk. Versti matur: Enginn sérstakur. Uppáhalds drykkur fyrir utan vatn: Americano. Fallegasti staður sem þú hefur komið á: Vestmannaeyjar slær öllu við. Uppáhalds tónlistarmaður/hljómsveit: Coldplay hefur alltaf verið uppáhalds annars er ég hrifin af íslenskri stuð tónlist. Gætir þú verið án snjallsíma í heila viku: Ég gæti það en það væri erfitt. Fyrsti leikur í meistaraflokki: 2007 í bikarkeppni með ÍBV. Rútína á leikdegi: Ég borða hollan en orkuríkan mat jafnt og þétt yfir daginn, ég reyni líka að safna jákvæðri orku með því að fara í göngutúr og að lokum stunda ég hugarþjálfun þar sem ég fer yfir leikinn í huganum. Grófasti leikmaður í landsliðinu: Engin leiðinlega gróf en margar ákveðnar, Sif Atla lætur finna fyrir sér. Besti samherji í landsliði og félagsliði: Ég er í frábæru landsliði og félagsliði og með marga góða leikmenn í kring um mig en Margrét Lára hefur gæði sem enginn annar hefur. Hver er fyndnust í landsliðinu: Arna Sif og Berglind Björg eru eitt grillað gengi. Erfiðasti mótherji sem þú hefur mætt á ferlinum: Það var erfitt að spila við Mörtu da Silva, hún er ótrúlega hröð, teknísk og með mikinn leikskilning. Besta minning frá yngri flokkum: Ég var heppin að fá að vera í frábæru liði upp alla yngri flokka. Við vorum mjög sigursæll flokkur og unnum flest allt sem hægt var að vinna, það er mjög eftirminnilegt ásamt öllum ferðalögunum upp á land. Besta minning á ferlinum: Fyrsti A-landsleikurinn. Mestu vonbrigði á ferlinum: Krossbandaslit núna í apríl 2017. Draumalið til að spila með: Ég væri mikið til í að spila fyrir Barcelona. Hefur þú fengið spjald fyrir dýfu: Nei. Fylgist þú mikið með fótbolta? Ef svo er hvert er þitt uppáhaldslið: Já, Manchester United. Fyrir utan fótbolta, fylgist þú með öðrum íþróttum: Já, ég hef mikið gaman af handbolta. Besti íþróttalýsandinn: Gummi Ben er bæði skemmtilegur og kemur með flottar athugasemdir. Uppáhalds íþróttamaður í sögunni: Michael Jordan var mjög módiverandi. Ef þú mættir breyta einhverju við fótbolta, hvað væri það: Ég hef aldrei skilið af hverju undirbuxur og teip þurfi að vera í sama lit og stuttbuxurnar og sokkarnir. Hver mun skora fyrsta mark íslenska landsliðsins á EM í Hollandi: Sif Atla úr föstu leikatriði.    

EM 2017 :: Landsliðkonur sátu fyrir svörum - Margrét Lára Viðarsdóttir

Það hefur væntanlega ekki farið framhjá mörgum að EM kvenna í knattspyrnu er komið á fullt en í gær spilaði íslenska liðið sinn fyrsta leik á mótinu, þá gegn Frakklandi. Í riðlakeppninni á Ísland næst leik gegn Sviss á laugardaginn og síðan Austurríki á miðvikudaginn í næstu viku. Eftir það skýrist svo hvort liðið mun komast upp úr riðlinum í 16 liða úrslit. Í hópnum að þessu sinni eru þó nokkrar Eyjastelpur en af þeim leikur aðeins ein með ÍBV en það er Sigríður Lára Garðarsdóttir. Þær Berglind Björg Þorvaldsdóttir og Fanndís Friðriksdóttir, leikmenn Breiðabliks, eiga báðar rætur að rekja til Vestmanneyja sem og systurnar Elísa og Margrét Lára Viðarsdætur en þær eru báðar frá vegna meiðsla og taka ekki beinan þátt í mótinu. Blaðamaður hafði samband við landsliðskonurnar fimm, sem þrátt fyrir annir, gáfu sér tíma til að svara nokkrum spurningum fyrir Eyjafréttir. Hér eru svör Margrétar Láru Viðarsdóttur.   Aldur: 31 árs. Gælunafn: Ekkert gælunafn, bara kölluð Margrét. Helsta áhugamál fyrir utan fótbolta: Aðrar íþróttir, fjölskyldan og ferðalög. Eftirlætis matur: Nautakjöt með öllu tilheyrandi. Versti matur: Humar. Uppáhalds drykkur fyrir utan vatn: Kaffi. Fallegasti staður sem þú hefur komið á: Vestmannaeyjar, á fallegu sumarkvöldi. Uppáhalds tónlistarmaður/hljómsveit: Ég er mikið fyrir allt sem er íslenskt þannig að Kaleo, Bubbi og Sálin eru í miklu uppáhaldi. Gætir þú verið án snjallsíma í heila viku: Já, ekkert mál. Fyrsti leikur í meistaraflokki: Það var með ÍBV árið 2002, minnir mig. Rútína á leikdegi: Engin sérstök rútína þannig ég passa bara alltaf upp á að sofa og nærast vel nokkrum dögum fyrir leik. Svo finnst mér hjálpa mikið að stunda hugarþjálfun kvöldi fyrir leik. Grófasti leikmaður í landsliðinu: Sigríður Lára og Sara Björk mega deila þessum titli sín á milli. Þær gefa ekkert eftir. Besti samherji í landsliði og félagsliði: Ég hef verið heppin að spila með mörgum af bestu leikmönnum heims, hins vegar á ég Olgu Færseth mikið að þakka og elskaði að spila með henni á sínum tíma. Hún fær þann titil ásamt Elísu systur. Það er eitthvað sérstakt að spila með systur sinni. Hver er fyndnust í landsliðinu: Það eru margir skemmtilegir karakterar í hópnum en Elísa og Gugga eru með góðan húmor. Erfiðasti mótherji sem þú hefur mætt á ferlinum: Þýska landsliðið eins og það leggur sig. Besta minning frá yngri flokkum: Ég á margar frábærar minningar frá tímum mínum í Tý og ÍBV. Við unnum alltaf öll mót í öllum flokkum sem var mjög skemmtilegt. Besta minning á ferlinum: Að vera valin íþróttamaður ársins 2007, ógleymanleg stund. Mestu vonbrigði á ferlinum: Krossbandaslitin mánuði fyrir EM. Draumalið til að spila með: Landsliðið er alltaf draumalið mitt. Hefur þú fengið spjald fyrir dýfu: Nei. Fylgist þú mikið með fótbolta? Ef svo er hvert er þitt uppáhaldslið: Já, alltof mikið örugglega. Ég missi varla af leik hjá mínum liðum ÍBV, Val og United. Fyrir utan fótbolta, fylgist þú með öðrum íþróttum: Já, ég fylgist mikið með handbolta og nánast öllum íþróttum. Besti íþróttalýsandinn: Gummi Ben. Uppáhalds íþróttamaður í sögunni: Michael Jordan. Ef þú mættir breyta einhverju við fótbolta, hvað væri það: Að það megi fagna með því að fara úr treyjunni. Hver mun skora fyrsta mark íslenska landsliðsins á EM í Hollandi: Sara Björk með skalla eftir fast leikatriði.        

Ungir Eyjapeyjar tóku þátt í N1 mótinu síðustu helgi

Árlegt N1 mót fór fram um helgina en það er ætlað drengjum í 5. flokki í knattspyrnu. Að þessu sinni mætti ÍBV með sex lið til leiks. Árangur liðanna var misjafn eins og við mátti búast en reynslan sem leikmenn taka frá mótinu jafn dýrmæt. Fyrirkomulagið á mótinu er þannig að spilað er í riðlum í deildum sem nefnast eftir eftirfarandi löndum: Argentína, Brasilía, Chile, Danmörk, England, Frakkland og Grikkland. Blaðamaður ræddi við Guðmund Tómas Sigfússon, þjálfara ÍBV á mótinu, en hann var heilt yfir ánægður með ferðina norður.    „Þetta gekk nokkuð ágætlega, fyrir utan það að ÍBV 5 náði ekki að sigra leik, en þeir hefðu hæglega getað unnið Fram 6, sem unnu einmitt ensku deildina. Þeir voru virkilega óheppnir í sínum leikjum,“ sagði Guðmundur Tómas og hélt áfram á svipuðum nótum. „ÍBV 2 var á leiðinni í undanúrslit í brasilísku deildinni en KA 2 jafnaði þegar það voru 15 sekúndur eftir og þá fór leikurinn í vító þar sem við töpuðum í þreföldum bráðabana. ÍBV 3 tapaði síðustu tveimur leikjum sínum í vítakeppni og hefðu því getað verið ofar í töflunni. Þeir unnu til að mynda Dalvík 1 sem enduðu í 9. sætinu.“   Gáfu sterkum liðum ekkert eftir ÍBV 1 spilaði mjög vel að sögn Guðmundar og gáfu sterkum liðum á mótinu ekkert eftir. „Þeir spiluðu betur og betur þegar á leið á mótið og voru óheppnir að tapa næst síðasta leiknum í vítakeppni. Margir strákar þar tóku miklum framförum þegar leið á mótið. ÍBV 4 átti mjög erfitt uppdráttar til að byrja með en þeim óx ásmegin þegar leið á mótið. Þeir fóru að spila aðeins harðar og fengu trú á eigin hæfileikum sem skilaði þeim tveimur sterkum sigrum og t.a.m. sigri í lokaleiknum sínum. ÍBV 6 kom skemmtilega á óvart og sigraði tvo leiki og gerði eitt jafntefli. Þeir voru óheppnir að tapa fyrir KR 8, 1:0 í fyrsta leiknum, sem unnu síðan riðilinn og enduðu í 6. sæti mótsins. Þeir unnu Hauka í næst síðasta leik sínum og spiluðu virkilega vel allt mótið.“    „Heilt yfir var mjög skemmtilegt að vera með strákunum og mótinu og alltaf gaman að fylgjast með þeim í leikjunum. Leikskilningur leikmanna eykst alltaf gríðarlega á mótum eins og þessu. Nú vona ég að allir þeir leikmenn sem komu með á mótið leggi hart að sér út sumarið til þess að vaxa enn meira í knattspyrnunni. Þá vil ég nota tækifærið og þakka öllum þeim foreldrum sem fylgdu sínum strákum á mótið og einnig frábærum fararstjórum,“ sagði Guðmundur Tómas að lokum.    

Stjarnan Orkumótsmeistari eftir sigur í vítaspyrnukeppni - myndir

Hið árlega Orkumót fór fram í þar síðustu viku með öllu tilheyrandi en Orkumótið er knattspyrnumót fyrir 6. flokk drengja. Í ár voru það 112 lið frá 37 félögum sem tóku þátt og voru í heildina spilaðir 560 leikir. Mótið hófst á fimmtudag og síðustu leikir spilaðir á laugardaginn. Í ár var það Stjarnan 1 sem hampaði Orkumótsbikarnum eftir að hafa lagt Gróttu 1 að velli í vítaspyrnukeppni en staðan var 0:0 eftir venjulegan leiktíma. Lið ÍBV 1spilaði til úrslita um Heimaeyjarbikarinn en þar töpuðu Eyjamenn Þrótti 1, lokastaða 1:3. ÍBV 2 hlaut sömu örlög í úrslitum um Helgafellsbikarinn en þar tapaði liðið líka 1:3 fyrir Snæfellsnesi 1.   Úrslit mótsins:   Heimaeyjarbikarinn: 1. Þróttur R. 2  2. ÍBV 1    Eldfellsbikarinn: 1. Grótta 2  2. Vestri 2    Álseyjarbikarinn:  1. KA 3  2. HK 3    Elliðaeyjarbikarinn:  1. HK 1  2. KR 1    Stórhöfðabikarinn:  1. Höttur 1  2. Dalvík 1    Heimaklettsbikarinn: 1. HK 2  2. Þróttur R. 3    Surtseyjarbikarinn:  1. Breiðablik 5  2. Álftanes    Bjarnareyjarbikarinn: 1. Valur 1  2. FH 1    Helliseyjarbikarinn:  1. Stjarnan 4  2. Þróttur V    Suðureyjarbikarinn:  1. Stjarnan 2  2. Þór 3    Ystaklettsbikarinn: 1. Þór 4  2. Valur 4    Helgafellsbikarinn: 1. Snæfellsnes 1  2. ÍBV 2    Orkumótsbikarinn:  1. Stjarnan 1  2. Grótta 1  Háttvísi KSÍ:  ÍR, Þróttur R., Skallagrímur og IFK Aspudden-Tellus    Prúðustu liðin:  ÍA og Fjarðabyggð   Orkumótsliðið 2017:   Tómas Óli Kristjánsson (Stjarnan),    Thomas Ari Arnarsson (Breiðablik),    Atli Hrafn Hjartarson (Stjarnan),    Andri Erlingsson (ÍBV),    Benedikt Jóel Elvarsson (Valur),    Björgvin Brimi Andrésson (Grótta),    Dagur Már Sigurðsson (ÍR),    Daníel Erick Clarke (Keflavík),    Viktor Nói Viðarsson (FH),    Örn Bragi Hinriksson (Þróttur Reykjavík),    Tómas Johannessen (Grótta),    Andri Kári Unnarsson (HK).     Óskar Pétur Friðriksson, ljósmyndari Eyjafrétta, var að sjálfsögðu á staðnum á meðan á mótinu stóð og tók meðfylgjandi myndir.    

Íslandsmót í holukeppni fór fram í Eyjum: Egill og Guðrún fögnuðu sigri

Íslandsmótið í holukeppni, KPMG - bikarinn, fór fram í Vestmannaeyjum um helgina. Þar sem 32 karlar og 16 konur tóku þátt. Eins og kom fram í Eyjafréttum í síðustu viku var ákveðið, vegna ástands nokkurra flata vallarins, að leika einungis á 13 af 18 holum vallarins. Á fyrstu stigum mótsins réðust leikirnir á 13 holum en í undanúrslitum sem og úrslitum voru leiknir tveir hringir eða 26 holur. Óhætt er að segja að veðrið hafi spilað stóra rullu á mótinu en keppendur fengu allt frá roki og rigningu yfir í sól og blíðu. Kylfingarnir sem börðust um Íslandsmeistaratitilinn létu þó hvorki holufjölda né úrhelli ekki slá sig út af laginu og Í karlaflokki bar Egill Ragnar Gunnarsson, frá GKG, sigurorð af Alfreð Brynjari Kristinssyni eftir að hafa haft forystu allan leikinn. Í kvennaflokki áttust við þær Guðrún Brá Björgvinsdóttir og Helga Kristín Einarsdóttur en báðar eru þær úr golfklúbbnum Keili. Eftir harða baráttu var það Guðrún Brá sem stóð uppi sem sigurvegari en hún hafði þriggja holu forskot þegar einungis tvær voru eftir. Í samtali við golf.is á sunnudaginn sagðist hinn tvítugi Egill Ragnar hafi notið þess að spila þrátt fyrir erfiðar aðstæður. „Þetta var æðislegt ég naut þess virkilega að spila. Það var mjög blautt í morgun og svolítið erfitt að kljást við þungan völlinn en veðrið skánaði eftir hádegið og svo var þetta orðið mjög gott í endann.“ Guðrún Brá tók í svipaðan streng. „Við fengum sýnishorn af því sem íslensk veðrátta býður upp á á þessu Íslandsmeistaramóti. Grenjandi rigningu í dag, sjúklega gott verður á laugardaginn og meira að segja haglél á föstudaginn. Þetta slapp þó í morgun af því að það var enginn vindur.“  

Cloé Lacasse tryggði ÍBV sigur á KR

 ÍBV og KR mættust í tíundu umferð Pepsi-deildar kvenna í gær þar sem Eyjakonur unnu góðan 0:2 sigur á heimakonum.   Fyrir leikinn voru KR-ingar í sjöunda sæti deildarinnar með sex stig en ÍBV í fjórða sæti með 19 stig. Eins og kannski flestir vita voru Eyjakonur að spila á föstudaginn í Borgunarbikarnum og því hvíldin af skornum skammti miðað við lið KR-inga sem fékk viku til að skríða saman eftir fimm marka tap gegn Valskonur í umferðinni á undan.   Fyrsta mark leiksins leit dagsins ljós á 25. mínútu leiksins en þar var að verki hin kanadíska Cloé Lacasse eftir sendingu frá Katie Kraeutner. Fram að þessu að hafði verið mikið jafnræði með liðunum. Fimm mínútum áður en flautað var til hálfleiks komst Kristín Erna Sigurásdóttir í upplagt marktækifæri en skot hennar geigaði. Staðan var því 0:1 þegar gengi var til búningsherbergja í hálfleik.   Strax á 53. opnuðu liðsmenn ÍBV vörn KR-inga upp á gátt en tilraun Kristínar Ernu rataði framhjá markinu. Nokkrum mínútum síðar þurfti Adelaide Gay að taka á honum stóra sínum í marki ÍBV en þá slapp Sigríður María Sigurðardóttir ein í gegn. Undir lok leiks voru heimamenn í KR komnir framarlega á völlinn til að freista þess að ná jöfnunarmarki en í staðinn  tvöfaldaði Cloé forystuna fyrir ÍBV og úrslitin ráðin og fjórði deildarsigur ÍBV í röð staðreynd.   Næsti leikur liðsins er á sunnudaginn en þá koma Valskonur í heimsókn.

Breiðablik sigraði TM mótið eftir úrslitaleik við Val

TM mótið eða Pæjumótið eins og það er oft kallað fór fram í þar síðustu viku en það er knattspyrnumót ætlað stelpum í 5. flokki. Mótið hófst á fimmtudag og lauk á laugardaginn með úrslitaleikjum. Að þessu sinni voru 84 lið frá 26 félögum sem tóku þátt í mótinu en það er aukning um átta lið. Í ár varð Breiðablik 1 TM móts meistari eftir sigur á Val 1 sem einmitt vann mótið í fyrra. Leikurinn fór 1-1 en þar sem að mark Breiðabliks kom fyrr urðu þær grænklæddu sigurvegarar. ÍBV 1 náði ágætis árangri á mótinu og spilaði um þriðja sætið en tapaði fyrir Stjörnunni 1, lokastaða 0:3.   Mótstjórinn hæst ánægður með útkomuna Þegar blaðamaður ræddi við Sigríði Ingu Kristmannsdóttur, mótstjóra, eftir helgina sagði hún mótið hafa gengið snurðulaust og vel fyrir sig, hvert sem á var litið. „Í dag er nær allt starf í kringum mótið orðið fjáraflanir fyrir iðkendur félagsins, sem rennur beint í ferðasjóð þeirra,“ sagði Sigríður Inga en á annað hundrað manns komu með einum eða öðrum hætti að þessari fjáröflun. „Svo erum við með í kringum 40 dómara sem fyrirtæki í bænum lána okkur yfir mótið og viljum við koma á framfæri innilegu þakklæti til þeirra. Mótið gekk í alla staði mjög vel, ef við horfum framhjá veðrinu á föstudaginn. Við fengum mikið hrós frá félögunum fyrir dagskrána, matinn, dómarana og að allar tímasetningar hafi staðist.“ Þrátt fyrir að Pæjumótið snúist fyrst og fremst um fótbolta þá er hæfileikakeppnin ávallt einn af hápunktum helgarinnar. „Í hæfileikakeppninni koma öll félög með atriði. Það er ýmist söngur eða dans, og allt frá einni stelpu upp í 30 stelpur í atriðunum. Í ár fengu KA stelpur verðlaun fyrir frumlegasta atriðið og Víkings stelpur fyrir flottasta atriðið. Ingó Veðurguð átti síðan að sjá um ball eftir hæfileikakeppnina en varð veðurtepptur í Reykjavík þar sem það var ekki flug á föstudag og hann rétt missti af Herjólfi. En við vorum svo heppin að Hreimur Örn var hérna sem foreldri og gátum við dobblað hann í að redda okkur. Það var mikið stuð á ballinu, dansað og sungið með,“ sagði Sigríður Inga. Á mótinu voru spilaðir 415 leikir allt í allt en öll úrslit eru inni á tmmotid.is. Sunna Daðadóttir, dóttir Þóru Hrannar Sigurjónsdóttur og Daða Pálssonar, var fulltrúi ÍBV í landsleiknum og var hún var einnig kosin í lið mótsins á lokahófinu.  

Myndasafnið >>

Öldudufl við Landeyjahöfn

Öldudufl við Landeyjahöfn

Mannlíf >>

Ástarljóð til Vestmannaeyja og sorgarsöngur yfir Tyrkjaráninu - myndband

 Ólafur F Magnússon fyrrverandi borgarstjóri hefur sent frá sér nýtt lag sem ber titilinn Við Ræningjatanga. Myndband við lagið er komið í spilun á Youtube en Ólafur samdi sjálfur bæði lag og texta.   Höfundur samdi ljóðið í mars árið 2014 og lagið skömmu síðar. Það var hljómsett og hljóðritað af Vilhjálmi Guðjónssyni, árið 2015. Ólafur syngur lagið sjálfur en Gunnar Þórðarson sér um gítarútsetninguna og gítarleikinn. Myndbandið má finna hér að ofan.   Ólafur sendi lagið Fjallkonan í undankeppni Eurovision árið 2014 og gaf einnig út lögin Gott og göfugt hjarta og Ferðabæn. Myndbandið við lagið Við Ræningjatanga var tekið upp fyrr í sumar í Vestmannaeyjum við Ræningjatanga, þar sem ráðist var inn í Heimaey í Tyrkjaráninu. Friðrik Grétarsson sá um bæði kvikmyndatöku og klippingu. Ólafur segir hafa flutt lagið með tár á hvarmi, hryggur yfir örlögum síns fólks í Eyjum.   Í samtali við Vísi segir Ólafur að lagið sé bæði „Ástarljóð til Vestmannaeyja og sorgarsöngur yfir Tyrkjaráninu.“   Ljóðið Við ræningjatanga hljóðar þannig:      Hunsuð voru hædd og kvalin,    hneppt í þrældóm yfir sæ.    Örlög margra ætíð falin,    ég aldrei þetta skilið fæ.    Munum þessa menn og hrundir,    máttur gleymsku rammur er.    Um Vestmannaeyja víðu grundir,    varðveit þjáning; fólksins ber.  Vísir.is greindi frá.

Stjórnmál >>

Greinar >>

Páll Magnússon: Stoltur!

 Fyrir viku ætlaði ég að skrifa stutta grein hér í Eyjafréttir um hvað ég væri stoltur af íþróttafélaginu mínu, ÍBV, fyrir stærstu og glæsilegustu Þjóðhátíð sem haldin hefur verið. Það fer a.m.k. ekkert á milli mála að Brekkan á sunnudagskvöldinu hefur aldrei verið stærri en nú; kíkið bara á myndirnar hans Óskar P. Friðrikssonar í síðustu Eyjafréttum. Það var líka fullyrt við mig að hvítu tjöldunum hefði fjölgað mikið á milli ára, sem eru enn betri fréttir ef réttar reynast. Um þetta átti sem sé greinin að fjalla, sem EKKI var skrifuð í síðustu viku. Síðan þá hefur ÍBV orðið bikarmeistari í meistaraflokki karla í fótbolta og meistaraflokkur kvenna komist í úrslit í bikarkeppninni annað árið í röð. Ekki minnkaði stoltið við þetta.   Glæsileg Þjóðhátíð Fyrst aðeins meira um Þjóðhátíð. Það er út af fyrir sig ekkert markmið að fjölga stöðugt gestum á Þjóðhátíð og það má leiða að því býsna sterk rök að af ýmsum ástæðum sé hátíðin nú þegar komin að einhverjum efri mörkum í fjölda - miðað við inntak og innviði. Og síst af öllu viljum láta fjöldann sliga þau stórmerkilegu menningarsögulegu verðmæti sem hátíðin felur í sér fyrir okkur bæjarbúa sjálfa. En þjóðhátíðarhaldið sjálft er alltaf að verða betra og betra í höndunum á ÍBV. Aðbúnaður gesta er alltaf að batna; öryggið er að aukast; þrif og hreinlæti er stöðugt að færast í betra horf; gæslan er að styrkjast og svona mætti áfram telja. Og síðan er mér skapi næst að halda að Þjóðhátíðin sé stöðugt að laða til sín prúðari og betri gesti! Sjálfur hef ég staðið sömu vaktina í hliðinu í Dalnum mörg undanfarin ár; 16 til 19 á föstudeginum. Á föstudeginum núna fóru sjálfsagt einhver þúsund manna fram og til baka um hliðið á þessum tíma. Ég sá áfengi á tveimur. Aðeins tveimur. Þannig háttar líka til að frá útidyrum heima hjá mér í Áshamrinum eru bara nokkrir metrar að tjaldstæði þar sem mikill fjöldi aðkomandi þjóðhátíðagesta heldur til. Þarna átti ég auðvitað leið um margoft meðan á hátíðinni stóð - á öllum tímum sólarhrings. Aldrei sá ég annað en glaðværa hópa af ungu fólki að skemmta sér vandræðalaust. Nú er ég ekki svo einfaldur að halda að ekki séu skuggahliðar þar sem 15.000 til 18.000 manns koma saman til að skemmta sér í þrjá til fjóra sólarhringa, en ég fullyrði að þeir skuggar eru á undanhaldi og bragurinn á hátíðinni nú er á margan hátt betri en hann var t.d. á meðan ég var á þeim aldri sem flestir aðkomandi gestir eru nú. Af þessu öllu er ég óskaplega stoltur af ÍBV, stjórn félagsins og starfsmönnum en síðast en ekki síst öllum þeim sjálfboðaliðum sem vinna þrekvirki fyrir félagið sitt á hverju einasta ári. Ekki bara við þjóðhátíðarhaldið heldur alla þessa stóru viðburði sem félagið stendur fyrir þar fyrir utan; pæju- og pollamót, Þrettándagleðina og fleira. Ætli megi ekki fullyrða að meirihluti allra innlendra gesta, sem sækja Eyjarnar heim á hverju ári, geri það í tengslum við viðburði á vegum ÍBV?   Ótrúlegt afrek Um helgina fengum við svo staðfesta sterka stöðu ÍBV á íþróttasviðinu þegar meistaraflokkur karla í fótbolta varð bikarmeistari með sigri á gríðarsterku liði Íslandsmeistara FH í úrslitaleik. Daginn eftir tryggði kvennaliðið sér svo sæti í bikarúrslitunum annað árið í röð. Þegar hér var komið sögu var ég um það bil að rifna af stolti! Meistaraflokkar karla og kvenna í handbolta líta síðan afar vel út nú í aðdraganda keppnistímabilsins. Í þessum afreksflokkum er síðan auðvitað að finna fyrirmyndirnar sem börnin og unglingarnir sækja sér í öflugu yngriflokkastarfi félagsins - og eru þeim hvati til þátttöku í íþróttum. Þessi staða - að íþróttafélag í rúmlega fjögur þúsund manna til þess að gera einangruðu bæjarfélagi eigi sér fjögur keppnislið í fótbolta og handbolta karla og kvenna í hópi þeirra bestu á Íslandi - er ekkert minna en ótrúlegt afrek! Að öllu samanlögðu fullyrði ég að ekkert íþróttafélag á Íslandi, og jafnvel þótt víðar væri leitað, er jafn mikilvægt sínu samfélagi og ÍBV er í Vestmannaeyjum. Langflestar fjölskyldur í Eyjum eiga sér einhvern snertiflöt við félagið nánast á hverjum einasta degi. ÍBV og allt sem félagið stendur fyrir er snar þáttur af sjálfsmynd Eyjamanna - og sennilega verðmætasta vörumerki þeirra, ef menn vilja leggja mat á slíkt. Að lokum þetta. Ég hvet alla forsvarsmenn þeirra góðu fyrirtækja og félaga í Eyjum sem leitað er til með að styrkja starfsemi ÍBV undir ýmsum formerkjum að taka eftirfarandi pól í hæðina: Það er ekki verið að sníkja af ykkur aur í einhvern óþarfa. Það er verið að hvetja ykkur til að styrkja íþrótta- og æskulýðsstarf og efla þannig þá samfélagslegu innviði sem þarf til að hæfileikaríkt og dugmikið fólk vilji búa og ala upp börnin sín í bænum; sem aftur er nauðsynleg forsenda fyrir ykkur til að fá gott fólk í vinnu! Með sama hætti vil ég segja við bæjaryfirvöld: Stuðningur við ÍBV er ekki bara stuðningur við íþróttastarf í þrengstu merkingu þess orðs heldur við miklu víðtækara og afar mikilvægt samfélagslegt hlutverk sem félagið hefur með höndum. Það hlutverk snýr t.d. að sjálfsmynd Eyjamanna í gegnum viðburði eins og Þjóðhátíð og íþróttaafrek á borð við bikarmeistaratitilinn um daginn - en einnig að hreinum hagrænum atriðum eins og að standa fyrir verulegum hluta af komum innlendra ferðamanna til Eyja. Og bæjaryfirvöld mega aldrei falla í þá gryfju að nota tekjur sem ÍBV hefur af Þjóðhátíð til réttlætingar fyrir minni stuðningi en tíðkast í öðrum bæjarfélögum. Þjóðhátíðartekjurnar gera nefnilega ekki meira en að vega upp þann umframkostnað sem hlýst af því að reka íþróttafélag í Vestmannaeyjum samanborið við höfuðborgarsvæðið. Ef þær þá ná því.   Áfram ÍBV! Páll Magnússon