Andrew Mwesigwa, fyrrum leikmaður ÍBV skrifar bréf sem birt er á heimasíðu ÍBV-íþróttafélags.  Andrew hafði leikið með ÍBV síðustu fjögur ár þar til leiðir skildu síðasta haust.  Hann lék 67 leiki fyrir félagið en samdi á dögunum við kínverska liðið Chongqing Lifan FC.  Pistil Andrew má lesa hér að neðan en eðli málsins samkvæmt skrifar hann á ensku.

 „Margrét Lára er kominn í sitt besta form á ný og ég hef satt að segja sjaldan séð hana betri en hún er einmitt um þessar mundir,“ sagði Elísabet Gunnarsdóttir, þjálfari sænska knattspyrnuliðsins Kristianstad, í samtali við Morgunblaðið.

Nú þegar aðeins fimm umferðir eru eftir í Íslandsmótinu í 1. deild karla í handbolta eru línur farnar að skýrast nokkuð.  Selfoss og Afturelding hafa verið í sérflokki í vetur og berjast nú um efsta sæti deildarinnar, sem gefur sjálfkrafa rétt á úrvalsdeildarsæti næsta vetur.  Liðin sem enda í 2., 3. og 4. sæti fara hins vegar í umspil um eitt sæti í úrvalsdeild ásamt því úrvalsdeildarliði sem endar í næst neðsta sæti í úrvalsdeildinni í ár.  Eins og stendur er ÍBV í þriðja sæti deildarinnar en með sigri í næsta leik, gæti ÍBV stigið mikilvægt skreft í að tryggja sér umspilssæti.  Umspilið fer svo fram í lok apríl og byrjun maí.

ÍBV sigraði Gróttu, 3:1, í deildabikar karla í knattspyrnu, Lengjubikarnum í Akraneshöllinni í dag. Fjarðabyggð sigraði Njarðvík, 3:2, í Reykjaneshöllinni.  Tonny Mawejje, Úgandamaðurinn í liði ÍBV, skoraði tvívegis í fyrri hálfleiknum. Tihomir Drobnjak minnkaði muninn fyrir Gróttu í þeim síðari áður en Kjartan Guðjónsson innsiglaði sigur Eyjamanna.

Leikmenn og stuðningsmenn enska úrvalsdeildarliðsins Portsmouth, sem Eyjamaðurinn Hermann Hreiðarsson leikur með, hafa ekki haft mikla ástæðu til að fagna í vetur.  Liðið er í neðsta sæti, vandræði utan vallar hafa loðað við félagið í allan vetur og nú síðast voru dregin níu stig af félaginu, sem veldur því að örlög liðsins eru nánast ráðin í ensku deildarkeppninni.  En annað er upp á teningnum í FA-bikarkeppninni þar sem Portsmouth er nú komið í undanúrslit sem verða leikin á þjóðarleikvanginum Wembley.

Hermann Hreiðarsson, varnarjaxlinn frá Vestmannaeyjum, kveðst staðráðinn í að komast á ný með Portsmouth á Wembley en liðið mætir Birmingham í átta liða úrslitum ensku bikarkeppninnar um hádegið á morgun, laugardag.  Hermann er einn af fimm sem eftir eru úr bikarmeistaraliði Portsmouth frá vorinu 2008. Hinir eru David James, Papa Bouba Diop, John Utaka og Nwankwo Kanu.

Karlalið ÍBV mætir í kvöld öðru úrvalsdeildarliði í Lengjubikarnum þegar Eyjamenn og Breiðablik leiða saman hesta sína.  Leikurinn fer fram í Kórnum í Kópavogi og eru stuðningsmenn ÍBV á höfuðborgarsvæðinu hvattir til að styðja við sitt lið.  Þeir hinir sem verða út í Eyjum í kvöld geta fylgst með leiknum á vefsíðunni SportTV.

Þeir Birkir Ívar Guðmundsson og Gunnar Berg Viktorsson urðu í dag bikarmeistarar með liði sínum, Haukum en Hafnafjarðarliðið vann Val 23:15 í úrslitaleik í Laugardalshöll.  Leikurinn var lengst af jafn og spennandi en í stöðunni 14:14, stungu Haukar af, skoruðu níu mörk gegn einu marki Valsmanna og fögnuðu sigri.  Gunnar Berg notaði tækifærið í sigurvímunni og skaut föstu skoti að fyrrum félaga sínum hjá Haukum, Arnari Péturssyni, sem færði sig frá Haukum til ÍBV fyrir veturinn.

Karlalið ÍBV í knattspyrnu náði ekki að fylgja eftir stórsigri sínum á ÍR í 1. umferð Deildarbikarsins þegar Eyjamenn léku gegn KR í 2.  umferð keppninnar.  Lokatölur urðu 4:1 en Eyjamenn léku ekki vel í leiknum og var sigur KR-inga fyllilega verðskuldaður.  Eina mark ÍBV gerði Eiður Aron Sigurbjörnsson úr vítaspyrnu en hann minnkaði muninn í 2:1 í fyrri hálfleik.

Kvennalið ÍBV tók á móti ÍR í 2. deildinni í handbolta í kvöld.  ÍR-ingar byrjuðu betur í leiknum, komust m.a. í 2:5 og var stuðningsmönnum ÍBV hætt að lítast á blikuna í upphafi leiks.  En stelpurnar náðu fljótlega áttum, sigldu fram úr og voru þremur mörkum yfir í hálfleik, 17:14.  Í síðari hálfleik náðu stelpurnar svo betri tökum á varnarleiknum og fengu fyrir vikið fjölmörg hraðaupphlaup sem skiluðu auðveldum mörkum.  Lokatölur urðu 34:25.

Í kvöld klukkan 21.00 leikur karlalið ÍBV gegn KR í Deildarbikarkeppninni.  Bæði lið fóru vel af stað í keppninni, ÍBV lagði ÍR 6:1 og KR lagði HK 5:1.  Stuðningsmönnum ÍBV gefst í fyrsta sinn kostur að fylgjast með leiknum í beinni útsendingu á vefnum en netsjónvarpsstöðin SportTV mun sýna leikinn.

Leikur ÍBV og KR í Deildarbikar karla í knattspyrnu, verður sýndur í beinni útsendingu á vefnum SportTV.is.  Leikurinn fer fram í Egilshöll á morgun, föstudag og hefst klukkan 21.00.  Bæði lið fóru vel af stað í keppninni, ÍBV lagði ÍR 6:0 og KR vann HK 5:1.  Það ætti því að vera forvitnilegur leikur sem boðið verður upp á í beinni á netinu.

Búið er að draga í fyrstu tvær umferðir í Bikarkeppni karla í knattspyrnu fyrir sumarið en í fyrstu umferðinni mætir Eyjaliðið KFS liði Bjarnarins.  Sigurvegari úr þeirri viðureign mætir svo sigurvegaranum úr viðureign Léttis og Víkings Ólafsvík í 2. umferð.  Lið í 2. og 3. deild leika í fyrstu umferð keppninnar en lið úr 1. deildinni bætast svo ið í 2. umferð.  Leikirnir fara fram laugardaginn 8. maí og þriðjudaginn 18. maí.  Úrvalsdeildarliðin koma svo inn í keppnina í 32ja liða úrslitum í byrjun júní.

Eins og áður hefur komið fram lögðu Eyjamenn Fjölni nokkuð auðveldlega af velli á laugardaginn en lokatölur urðu 36:20.  Eyjamenn fá hins vegar góðan tíma til að ná sér niður á jörðina því næsti leikur liðsins verður ekki fyrr en 13. mars eða þremur vikum eftir sigurinn gegn Fjölni.  Þá eiga Eyjamenn að sækja ÍR-inga heim í Breiðholtið.

Karlalið ÍBV var ekki í teljandi vandræðum með Fjölni sem kom í heimsókn til Eyja í dag.  Fjölnismenn byrjuðu reyndar ágætlega í leiknum, komust í 0:2 og jafnt var á með liðunum fyrstu mínúturnar.  En um miðjan fyrri hálfleikinn gáfu Eyjamenn í og náðu afgerandi forystu áður en flautað var til leikhlés.  Staðan í hálfleik var 22:11 og í raun ljóst hvar sigurinn endaði.  Lokatölur urðu svo 36:20.

Stelpurnar í ÍBV spiluðu líklega sinn besta leik í vetur þegar liðið tók á móti efsta liði 2. deildar, Gróttu sem hafði fyrir leikinn ekki tapað stigi í vetur.  Eyjastúlkur voru hins vegar ekkert smeykar gegn toppliðinu, byrjuðu af miklum krafti og voru sex mörkum yfir í hálfleik 22:16.  Mestur varð munurinn tíu mörk í seinni hálfleik en lokatölur urðu 38:30 ÍBV í vil.

Trausti Hjaltason hefur verið ráðinn fram­kvæmdastjóri knatt­spyrnu­deildar ÍBV en knattspyrnu­deild auglýsti stöðuna fyrir skömmu.  Fjórir sóttu um en Trausti er   fæddur og uppalinn Eyjapeyi, sonur Hjalta Kristjánssonar, heilsu­­gæslulæknis og Veru Bjarkar Einarsdóttur.  Trausti gekk upp í gegnum yngri flokka ÍBV áður en hann hóf að spila undir stjórn föður síns hjá litla bróður ÍBV, KFS.  Þar spilar Trausti enn og er jafnframt fyrirliði liðsins.

Á dögunum var kynnt riðlaskipting sumarins í knattspyrnunni fyrir 1. deild kvenna og 3. deild karla.  Kvennalið ÍBV leikur í 1. deild eftir að hafa orðið naumlega af sæti í úrvalsdeild á síðasta ári.  Eyjastúlkur lenda í B-riðli með Fjarðabyggð/Leikni, Fjölni, Fram, Hetti Egilsstöðum, ÍR, Selfossi, Sindra.  Sannarlega sterkur riðill og þrjú löng ferðalög austur á land.  KFS er svo í B-riðli 3. deildar með Afríku, Berserkjum, KFK, Vængjum Júpiters, Þrótti V. og Ægi.

Íslenska kvennalandsliðið í knattspyrnu tekur þátt í Algarve Cup í Portúgal í lok febrúar en Ísland leikur í A-deild mótsins og spilar fyrsta leikinn gegn gríðarsterku liði Bandaríkjanna 24. febrúar.  20 leikmenn hafa verið valdir til þess að leika fyrir hönd Íslands, þar af þrír framherjar en allar eiga þær það  sameiginlegt að vera fæddar og uppaldar í Eyjum.

Sindri frá Hornafirði reyndist lítil hindrun fyrir ÍBV en liðin mættust tvívegis í Eyjum um helgina.  Í gær vann ÍBV mjög auðveldan sigur en þegar upp var staðið skildu sextíu stig liðin að.  Leikurinn í dag var því nánast formsatriði enda voru Eyjamenn ekki í neinun vandræðum með að leggja Sindra aftur að velli.  Lokatölur í dag urðu 90:49.

Í dag átti karlalið ÍBV í handbolta að leika gegn Þrótti í Reykjavík.  Hins vegar reyndist ekki flugfært til Eyja í dag og því varð að fresta leiknum.  Nýr leiktími er á morgun, sunnudag klukkan 14.00.  Leikurinn fer fram í íþróttahúsinu Austurbergi í Breiðholtinu.

Hermann Hreiðarsson verður með Portsmouth í nágrannaslagnum á móti South­ampton í sextán liða úrslitum ensku bikarkeppninnar í dag.  Hermann hefur ekkert getað leikið með liði sínu síðan hann meiddist eftir aðeins 27 mínútur á móti Manchester City 31. janúar síðastliðinn. Hermann er hins vegar orðinn góður af meiðslunum og tilbúinn í nýtt bikarævintýri með Portsmouth.

Karlalið ÍBV í körfubolta var ekki í neinum vandræðum með Sindra frá Hornafirði þegar liðin mættust í C-riðli 2. deildar karla.  Eyjamenn höfðu fádæma yfirburði gegn slöku liði Hornfirðinga, en líklegt má teljast að einhverja leikmenn vanti í þeirra raðir.  Lokatölur urðu 108:48 fyrir ÍBV eftir að staðan í hálfleik hafði verið 80:32.  Tveir ungir leikmenn hjá ÍBV, þeir Sigurður Grétar Benónýsson og Aron Valtýsson skoruðu sín fyrstu stig fyrir ÍBV en þeir eru báðir á fjórtánda ári.

Karlalið ÍBV í körfubolta mætir Sindra frá Hornafirði í tveimur leikjum, annarsvegar í kvöld klukkan 20:15 og hins vegar á morgun, laugardag, klukkan 11:00.  Eyjamenn eru í öðru sæti í C-riðli með 12 stig á meðan Sindri er í næst neðsta sæti með 4.  Róðurinn ætti því að verða Eyjamönnum auðveldur í leikjunum tveimur en þó er aldrei hægt að bóka sigur fyrirfram.

Í Íslandsmótinu í 1. deild karla í handbolta er leikin þreföld umferð en í dag var raðað upp í þriðju umferðina.  Eyjamenn fá heimaleik gegn Selfyssingum, sem eru í efsta sæti deildarinnar en þremur dögum síðar sækir ÍBV Aftureldingu heim en Afturelding er í öðru sæti á meðan ÍBV er í því þriðja.  Það gæti því margt breyst í lok mars þegar leikirnir fara fram en hér að neðan má sjá hvernig 3. umferðin raðast upp.