Eyjamenn hafa samið við suður-afrísku knattspyrnukonuna Noko Matlou sem kjörin var besti leikmaður Afríku í febrúar 2009. Hún er þegar komin með leikheimild og má því leika með 1. deildarliðinu gegn Fjölni á fimmtudagskvöld.  Matlou hefur áður verið í fréttum hér á landi því í fyrra reyndi KR að fá hana til sín. Ekkert varð úr því en talið er að umboðsmaður Matlou hafi samið við KR án vitundar félagsins sem hún var þá hjá, Brazilian Ladies FC.

Hermann Hreiðarsson landsliðsmaður í knattspyrnu er að hefja viðræður við enska 1. deildarfélagið Portsmouth um nýjan samning og vonast til að vera áfram hjá félaginu á komandi leiktíð. Hermann sleit hásin í mars og missti því af síðustu vikum Portsmouth í ensku úrvalsdeildinni í bili, en er á réttri leið með að jafna sig á þeim meiðslum.

KFS vann góðan sigur á KFK í B-riðli 3. deildar á laugardaginn.  Heil tólf mörk voru skoruð í leiknum, þar af sjö í síðari hálfleik en lokatölur urðu 8:4 eftir að staðan í hálfleik hafði verið 3:2.  Hreint ótrúlegar lokatölur eftir 90 mínútna leik.  Stefán Björn Hauksson skoraði þrennu fyrir KFS, Einar Kristinn Kárason tvö og þeir Sæþór Jóhannesson, Anton Rafn Jónasson og Ingólfur Einisson eitt mark hver.

ÍBV hafði betur gegn Val í dag á Hásteinsvellinum en lokatölur urðu 3:1.  Leikurinn var afar kaflaskiptur, Valsmenn voru sterkari í fyrri hálfleik og voru verðskuldað yfir 0:1 í hálfleik.  En Eyjamenn sýndu sparihliðarnar í seinni hálfleik, skoruðu tvö gullfalleg mörk, fyrst varamaðurinn Damien Justin Warlen þegar hann þrumaði boltanum inn af 25 metra færi og svo markahrókurinn Tryggvi Guðmundsson sem lagði boltann glæsilega upp undir samskeytin og nýtti sér vindinn glæsilega.  Tryggvi bætti svo við þriðja markinu úr vítaspyrnu og innsiglaði sigurinn.

Í blíðskaparveðri á Hásteinsvelli í dag, þurftu ÍBV stúlkur að sætta sig við tap í  undanúrslitum Visa bikarsins. Þær fundu ofjarla sína í Stjörnustúlkum sem unnu verðskuldað og sem  leika þá til úrslita við Val um bikarmeistaratitlinn. En árangur ÍBV stelpanna í bikarkeppninni hefur samt verið afar góður, að komast í undanúrslitin.

Það er mikið um að vera á knattspyrnusviðinu í Eyjum í dag. Auk bikarleiks ÍBV og Stjörnunnar kl. 14.00 verður einnig leikur KFS og KFK á Helgafellsvelli og hefst sá leikur einnig kl. 14.00. Þessi tvö lið berjast um laust úrslitasæti í  B-riðli 3. deildar.

Í dag klukkan 14:00 leikur kvennalið ÍBV stærsta leik liðsins í áraraðir þegar liðið tekur á móti úrvalsdeildarliði Stjörnunnar í undanúrslitum bikarkeppninnar.  ÍBV leikur sem kunnugt er í 1. deild Íslandsmótsins en leikurinn fer fram á Hásteinsvellinum.  Í hinni viðureign undanúrslitanna mætast svo úrvalsdeildarliðin Valur og Þór/KA.

Edda María Birgisdóttir miðvallarleikmaður hefur verið lánuð til ÍBV frá Stjörnunni og mun leika með Eyjakonum í 1. deildinni í fótbolta í sumar. Edda María er með góða reynslu úr úrvalsdeildinni en þar hefur hún leikið með Fjölni og Stjörnunni. Hún lék 16 leiki í úrvalsdeildinni í fyrra og 18 leiki þar áður, en hefur aðeins náð sex leikjum í ár sem orsakast að hluta til af meiðslum.

Í Morgunblaðinu í dag er greint frá því að enska félagið Charlton vilji skoða Eyjamanninn Gunnar Heiðar Þorvaldsson betur en Gunnar Heiðar var hjá félaginu til reynslu fyrr í mánuðinum.  Gunnar segist vera á leið til félagsins í lok vikunnar en hann lék einn æfingaleik síðast þegar hann var til skoðunar en meiddist strax í upphafi og náði ekki að láta ljós sitt skína.  Forráðamenn félagsins vilja því sjá hann aftur í leik.

Hallgrímur Júlíusson varð annar í Íslandsmótinu í höggleik unglinga sem fór fram á golfvellinum í Vestmannaeyjum um helgina.  Hallgrímur varð aðeins tveimur höggum á eftir Bjarka Péturssyni, GB sem varð Íslandsmeistari í flokki 15-16 ára en keppni þeirra tveggja var æsispennandi.  Þannig voru þeir jafnir í efsta sæti fyrir síðasta daginn en að lokum hafði Bjarki betur.  Úrslit mótsins má sjá hér að neðan.

Kvennalið ÍBV lagði Fjarðabyggð/Leikni að velli í dag þegar liðin mættust á Hásteinsvellinum.  Lokatölur urðu 5:1 og var sigur Eyjastúlkna nokkuð öruggur.  Gestirnir skutu þó skelk í bringu stuðningsmanna ÍBV með því að minnka muninn í 2:1 í fyrri hálfleik en Eyjastúlkur svöruðu með þremur mörkum og þar við sat.

Hallgrímur Júlíusson, nýkrýndur Vestmannaeyjameistari í golfi, er í harðri baráttu um Íslandsmeistaratitilinn í flokki kylfinga 15-16 ára. Mótið fer fram í Eyjum og er þriðji og síðasti dagurinn runninn upp núna. Hallgrímur sagðist fyrir mótið stefna að titlinum og til þessa, hefur hann staðið við það.

Danien Justin Warlen er nafn sem stuðningsmenn ÍBV verða að leggja á minnið en þessi s-afríski sóknarmaður tryggði ÍBV sigurinn á Fram í dag.  Danien var að spila sinn fyrsta leik í byrjunarliðinu og í annað sinn sem hann er í leikmannahópnum.  Hann nýtti tækifærið vel, spilaði vel framan af og skoraði sigurmarkið í 1:0 sigri ÍBV.  Um leið skaut hann ÍBV á topp Pepsídeildarinnar, tímabundið í það minnsta en Eyjamenn þekkja þá stöðu orðið mjög vel.

Eyjamenn þóttu taka stórt upp í sig í vor, þeir sögðust stefna á efri hlutann.  Skrifari á heimasíðu Fram, var svo brattur að hafa nokkra trú þeim orðum Eyjamanna og spáði þeim 6. sæti.  Frammistaða ÍBV hefur gert það að svartsýnisspá!  -  ÍBV hefur farið á kostum og er efst ásamt Blikum með 23 stig. Þeirra helsta viðbót í ár er Tryggvi Guðmundsson sem sneri heim eftir langa dvöl í FH. Eins hafa Eyjamenn verið heppnir með útlendinga, þeirra helst James Hurst, lánsmaður frá Portsmouth.
 

Íslandsmótið í höggleik unglinga hófst í morgun á golfvellinum í Vestmannaeyjum.  161 kylfingur er skráður til leiks en keppt er í þremur aldursflokkum, karla og kvenna, 16-17 ára, 15-16 ára og 14 ára og yngri.  Leiknar verða 54 holur, 18 hvern keppnisdag en mótinu lýkur á sunnudagskvöld.  Ef veðurspáin rætist, verður algjör bongóblíða í Eyjum um helgina og virkilega gaman að spila golf við þær aðstæður.

„Það leggst ágætlega í mig.  Ég sóttist eftir heimaleik og fékk hann.  En hvað andstæðinginn varðar, þá segi ég sem minnst um það. Þetta eru allt saman frábær lið. Það skiptir engu máli á þessu stigi hverjum þú ert að mæta.  Aðalatriðið er að fá heimaleik,“ sagði Jón Ólafur Daníelsson eftir bikardráttinn í hádeginu á vefsíðunni Fótbolti.net. 

Nú rétt í þessu var verið að draga í undanúrslitum Visabikars kvenna en 1. deildarlið ÍBV var í pottinum ásamt þremur af bestu úrvalsdeildarliðunum. Eyjastúlkur fengu heimaleik og munu taka á móti Stjörnunni úr Garðabæ. Í hinni viðureigninni mætast Valur og Þór/KA á Hlíðarenda.  Leikirnir fara báðir fram laugardaginn 24. júlí klukkan 14.00.

Í hádeginu í dag verður dregið í undanúrslitum í Visabikar karla og kvenna.  ÍBV er í pottinum í kvennakeppninni en liðið lagði úrvalsdeildarlið Hauka að velli í 8-liða úrslitum síðasta föstudag.  Þrjú af fjórum efstu liðum úrvalsdeildarinnar eru í pottinum með ÍBV en það eru Valur, Þór/KA og Stjarnan.  Hlíf Hauksdóttir, miðjumaður ÍBV sagði eftir sigurinn gegn Haukum að óskadrátturinn væri að fá heimaleik gegn Val, sem hún lék með um tíma.

Karlalið ÍBV situr í öðru sæti Pepsídeildarinnar í knattspyrnu þegar Íslandsmótið er hálfnað en fyrir mótið áttu fæstir von á því að liðið yrði í þessari stöðu.  Knattspyrnuvefurinn Fótbolti.net gerir upp fyrri umferðina í dag en vefurinn valdi Heimi Hallgrímsson, þjálfara ÍBV þjálfara fyrri umferðarinnar.  Þá var enski bakvörðurinn James Hurst valinn besti ungi leikmaðurinn en fjórir leikmenn ÍBV eru svo í liði fyrri umferðarinnar og á ekkert lið jafn marga leikmenn í liðinu.

Kvennalið ÍBV vann sannfærandi sigur á Sindra austur á Hornafirði í gær en liðin leika í B-riðli 1. deildar.  Lokatölur urðu 1:6 en staðan í hálfleik var 0:3.  Eyjastúlkur komust í 0:5 áður en heimastúlkur náðu að svara á 87. mínútu en ÍBV tókst svo að skora síðasta mark leiksins.  Kristín Erna Sigurlásdóttir skoraði þrennu í leiknum, Bryndís Jónsdóttir, Rose Madillo Jijana og Þórhildur Ólafsdóttir eitt mark hver.  Þá vann KFS einnig sigur á Þrótti Vogum í gær í 3. deildinni.

Þeir verða sjálfsagt hissa þeir sem renna yfir verðlaunahafa Vestmannaeyjamótsins í golfi en eins og áður hefur komið fram, varð hinn 16 ára gamli Hallgrímur Júlíusson meistari í fyrsta sinn.  En þegar rennt er yfir listann yfir verðlaunahafa mótsins kemur í ljós að Hallgrímur Júlíusson vann einnig í öldungaflokki.  Hvernig stendur á því?  Jú í öldungaflokknum er það afinn en alnafni hans og barnabarn sá um meistaraflokkinn.

Hallgrímur Júlíusson var nú fyrir stundu krýndur Vestmannaeyjameistari í golfi en Hallgrímur er aðeins 16 ára gamall og eftir því sem næst verður komist, er hann yngsti klúbbmeistari GV frá upphafi.  Hallgrímur endaði með sex högga forystu á vallarstjórann margreynda Örlyg Helga Grímsson en Hallgrímur lék hringina fjóra á 74, 72, 70 og 70, sem er sex högg yfir pari vallarins.  Örlygur lék hringina fjóra á 75, 73, 73 og 71.  Rúnar Þór Karlsson endaði svo í þriðja sæti en hann lék á 18 höggum yfir pari.

Tryggvi Guðmundson ætlaði að fljúga með Keflavíkurliðinu í land eftir 2-1 sigur ÍBV á fimmtudaginn. Hann hætti þó snarlega við þar sem Keflvíkingar voru brjálaðir út í Tryggva. Ástæðan er sú að hann var viðriðinn atvik sem lauk með því að Guðjón Árni Antoníusson fékk rautt spjald áður en ÍBV tryggði sér sigur.

KFS tekur í dag á móti Þrótti Vogum í B-riðli 3. deildar en leikur liðanna fer fram á Helgafellsvelli og hefst klukkan 13.00.  Eyjamenn hafa verið á mikilli siglingu undanfarið, eftir slaka byrjun en KFS tapaði fyrstu tveimur leikjum Íslandsmótsins með markatölunni 1:10.  En síðan þá hefur KFS unnið þrjá leiki og gert eitt jafntefli.  Ef miðað er við leiki KFS það sem af er sumars, er nokkuð ljóst að mikið af mörkum verður skorað á Helgafellsvellinum í dag.

ÍBV er komið í undanúrslit Visabikarkeppninnar en liðið lagði úrvalsdeildarlið Hauka að velli í dag 2:0 en Eyjastúlkur leika í 1. deild.  Sigur ÍBV var síst of stór en Eyjastúlkur voru mun sterkari í síðari hálfleik, eftir frekar jafnan fyrri hálfleik.  Hinir þrír leikirnir í átta liða úrslitum bikarkeppninnar fara svo fram í kvöld og þá kemur í ljós hvaða þrjú lið verða í pottinum auk ÍBV.  Dregið verður í næstu umferð næstkomandi mánudag.

Danski miðvörðurinn Rasmus Steenberg Christiansen skrifaði nú fyrir skömmu undir rúmlega árs samning hjá ÍBV.  Christiansen hefur verið í láni hjá ÍBV í sumar frá danska úrvalsdeildarliðinu Lyngby en lánssamningurinn átti að renna út 18. júlí næstkomandi.  Danska félagið riftir hins vegar samningi sínum við leikmanninn og kemur hann því til Eyjamanna án greiðslu.

Árni Stefánsson, handknattleiksþjálfari hefur verið ráðinn til ÍBV.  Árni gerir tveggja ára samning við Eyjamenn en hann kemur til með að vera yfirþjálfari yngri flokka, þjálfa 3., 4. og 5. flokk karla og starfa sem forstöðumaður íþróttaakademíu ÍBV og Framhaldsskólans í Vestmannaeyjum sem komið verður á fót í vetur.  Árni er þrautreyndur þjálfari, hefur m.a. þjálfað hjá HK og á Akureyri.