Neyðarbrautin - Meirihluti borgarstjórnar sýnir klærnar

Neyðarbrautin - Meirihluti borgarstjórnar sýnir klærnar

Til­laga Fram­sókn­ar og flug­vall­ar­vina í borg­ar­stjórn um að haf­in yrði sam­ræða við inn­an­rík­is­ráðuneytið um opn­un NV-SV flug­braut­ar, oft nefnd neyðarbraut, á Reykja­vík­ur­flug­velli að nýju fram á vor var ekki tek­in til at­kvæðagreiðslu í borg­ar­stjórn í gær. Þetta kemur fram á mbl. is.
 
Þar segir að þess í stað var breyt­ing­ar­til­laga Dags. B. Eggerts­son­ar borg­ar­stjóra um að hvetja inn­an­rík­is­ráðuneytið til að hraða opn­un flug­braut­ar í sömu stefnu í Kefla­vík lögð fram til at­kvæðagreiðslu og var hún samþykkt með at­kvæðum meiri­hlut­ans en minni­hlut­inn sat hjá.
 
Full­trú­ar minni­hlut­ans voru ósátt­ir við meðferð Líf­ar Magneu­dótt­ur, for­seta borg­ar­stjórn­ar, á mál­inu þar sem þeir töldu breyt­ing­ar­til­lög­una í raun nýja til­lögu og því bæri að taka báðar til­lög­ur til at­kvæðagreiðslu. Þeim varð hins veg­ar ekki að ósk sinni, að því er fram kem­ur fram á mbl.is og Morgunblaðinu í dag.
 

Mikil vonbrigði að gengið var framhjá oddvita flokksins

Oddvitar meiri- og minnihluta settust niður og komust að niðurstöðu um stærstu málin

 Í lok nýliðins árs samþykkti bæjarstjórn með sjö samhljóða atkvæðum fjárhagsáætlun fyrir árið 2017. Breyta varð fjárhagsáætluninni vegna nýgerðra samninga við kennara en í sameiginlegri bókun áréttaði bæjarstjórn að breytingin hefði ekki áhrif á ákvarðanir um þjónustuaukningu svo sem frístundastyrk, heimagreiðslur og fjölgun leikskólaplássa. Kom þetta á óvart því venjan er að minnihlutinn láti finna fyrir sér þegar kemur að afgreiðslu fjárhagsáætlunar.   Samkvæmt áætluninni verða tekjur sveitarsjóðs 3,8 milljarðar og gjöld alls fyrir fjármagnsliði 3,75 milljarðar. Rekstrarniðurstaða er jákvæð um 53 milljónir, veltufé frá rekstri 482 milljónir, afborganir langtímalána 26,75 milljónir og handbært fé í árslok verður 2 milljarðar og 867 milljónir. Í fjárhagsáætlun samstæðunnar er gert ráð fyrir að tekjur verði alls 4 milljarðar og 625 milljarðar, gjöld alls 4 milljarðar og 128 milljónir, rekstrarniðurstaða er jákvæð um 93 milljónir, veltufé frá rekstri 623 milljónir, afborganir langtímalána 56 milljónir og handbært fé í árslok verður 2 milljarðar og 867 milljónir króna. „Það eru ekki mörg sveitarfélög sem geta státað sig af betri stöðu en við en rekstrarniðurstaðan, 93 milljónir hjá samstæðunni veldur áhyggjum,“ sagði Stefán Jónasson, oddviti minnihluta Eyjalistans í bæjarstjórn. „Svo á eftir að koma í ljós hvort áætlunin stenst eða ekki. Nú stendur yfir verkfall sjómanna og á meðan fáum við ekki tekjur. Við gerum ráð fyrir einhverri loðnuveiði en útlitið þar ekki bjart,“ bætti Stefán við. Það vakti athygli að fjárhagsáætlunin var samþykkt samhljóða og að minnihlutinn sleppti því að bóka athugasemdir við áætlunina. Stefán segir að ástæðan fyrir þessu sé einföld. „Þetta er í fyrsta skipti sem ég og Elliði bæjarstjóri setjumst yfir áætlunina saman til þess að komast að niðurstöðu um stærstu málin. Það hafði sitt að segja og líka að ýmis mál sem við höfum barist fyrir hlutu náð fyrir augum meirihlutans.“ Stefán segir að hann og Elliði hafi átt saman vinnufundi þar sem þeir lögðu fram sínar hugmyndir sem oddvitar flokkanna í bæjarstjórn. „Að sjálfsögðu vorum við ekki alltaf sammála en við töluðum okkur niður á lausn.“ Af málum sem minnihlutinn lagði áherslu á og hefur fengið í gegn var að byggð verði sorpbrennslustöð. „Það hefur verið unnið í því máli og er ákveðið að sorpbrennslustöð verði tekin í notkun árið 2019. Það er verið að vinna í fráveitumálum, stækka Hraunbúðir þar sem verða fimm íbúðir sem bærinn byggir. Svo er það stóra málið okkar, frístundakortin sem fólk getur nýtt sér frá og með nýliðnum áramótum. Málefni fatlaðra eru líka eitt af okkar hjartans málum og nú er ákveðið að byggja fjórar til sex íbúðir fyrir fatlaða. Þegar við horfum á þessar framkvæmdir og rekstur bæjarins án þess að þurfa að taka krónu að láni er maður sáttur,“ sagði Stefán. „Þetta er ánægjulegi hlutinn en það er ekki eins skemmtilegt að þurfa að hækka útsvarið en það gefur okkur 15 milljónir. Hærri fasteignagjöld á atvinnuhúsnæði hækka tekjur um 9 milljónir en þau hækka ekki á íbúðarhúsnæði. Einnig urðum við að hækka skólamat, gjald í frístundaverið og í sundlaugina.“ Stefán segir að rekstur hafnarsjóðs gangi ágætlega og á að skila 30 milljóna hagnaði. „Það eru engar stórframkvæmdir fyrirhugaðar en eðlilegt viðhald verður á bryggjuþiljum.“ Að lokum segir Stefán að því fylgi ábyrgð að vera í minnihluta ekki síður en í meirihluta. „Þó maður sé í minnihluta vill maður ábyrga vinnu við gerð fjárhagsáætlunar. Það er því ákveðinn léttir þegar þeirri vinnu er lokið með þetta góðri útkomu en svo er það alltaf óvissan hvort peningarnir skila sér eða ekki.“

Framsókn - Góð heilsa er gulli betri

 …segir máltækið og annað sem segir: „Heilsan er fátækra manna fasteign.“ Já, heilsan er óumdeilanlega eitt það verðmætasta sem við eigum og að henni þarf að hlúa. Við berum ábyrgð á eigin heilsu en þegar slysin verða eða heilsan brestur, þá vill Framsóknarflokkurinn að á Íslandi sé góð heilbrigðisþjónusta sem allir hafi aðgang að, óháð efnahag. Til að það megi ganga eftir vill Framsóknarflokkurinn byggja nýjan Landspítala á nýjum stað, efla heilsugæsluna og heilbrigðisstofnanir um land allt. Aukin framlög til heilbrigðismála Ríkisstjórnin, undir forystu Framsóknarflokksins hefur aukið framlög til heilbrigðiskerfisins um tæpa 40 milljarða á kjörtímabilinu og útgjöld til tækjakaupa hafa sjöfaldast. Útgjöld til heilbrigðismála hafa verið stærsti liður ríkissjóðs á kjörtímabilinu, en á síðustu fjárlögum voru 162 milljarðar settir í heilbrigðiskerfið. Framsóknarflokkurinn vill efla heilbrigðiskerfið enn frekar en einnig að frekari greiningar og gæðamælingar verði gerðar á heilbrigðiskerfinu svo þeir fjármunir sem settir eru í málaflokkinn nýtist sem best. Eyðum biðlistum Heilbrigðisstofnanir á landsbyggðinni eru margar hverjar vannýttar. Með því að nýta þessi sjúkrahús betur þá væri hægt að eyða biðlistum með einföldum aðgerðum og um leið að styrkja rekstur þessara stofnana, sem hafa margar hverjar verið fjársveltar um árabil. Um leið værum við að létta álaginu af Landspítalanum. Við þurfum að eiga gott hátæknisjúkrahús og Framsóknarflokkurinn leggur áherslu á að reisa nýjan Landspítala á nýjum stað. Múhammed til fjallsins Framsóknarflokkurinn vill bæta aðgengi fólks á landbyggðinni að sérfræðingum– fjallið á ekki að fara til Múhammeds. Við viljum líka efla fjarlækningaþjónustu en verkefnið á Kirjubæjarklaustri hefur gefist afar vel og því tilefni til að nýta þá reynslu til frekari uppbyggingar. Framsókn vill að komið sé til móts við þá sem þurfa að fara að heiman til að sækja sér heilbrigðisþjónustu, s.s. vegna fæðinga þar sem fæðingarstöðum hefur fækkað verulega hin síðari ár og vegna eftirlits eða eftirfylgni sem ekki er hægt að veita í heimabyggð. Réttlætismál Verðandi foreldrar á landsbyggðinni þurfa t.d. oft að hefja töku fæðingarorlofs fyrr, þar sem þeir þurfa að fara tímanlega á fæðingarstað. Þá dregst. biðtíminn eftir barninu, frá orlofinu. Barn og foreldrar njóta því styttri samveru þegar barnið kemur loksins í heiminn. Með því að breyta lögum um fæðingarorlof gætum við tryggt rétt barna til að njóta jafnlangs tíma með foreldrum sínum eftir fæðingu eins og þau börn sem eiga heima í nágrenni við fæðingarþjónustu, en annar greinarhöfunda lagði fram frumvarp þess efnis á Alþingi. Hár dvalarkostnaður Annað atriði sem þarf að huga betur að er dvalarkostnaður þeirra sem þurfa að fara að heima vegna barnsfæðinga og eiga ekki ættingja eða vini sem geta hýst þá á meðan á biðinni stendur. Ein leið væri að útvega fólki dvalarstað eða með fjárstyrk vegna dvalarkostnaðar í nágrenni við fæðingarstað. Verðandi foreldrar eiga ekki að gjalda þess að búa fjarri fæðingarstöðum og fjarri heilbrigðisþjónustu almennt.   Silja Dögg Gunnarsdóttir, þingmaður Framsóknarflokksins og Ásgerður Kristín Gylfadóttir, hjúkrunarstjóri HSU og í 3. sæti lista Framsóknarflokksins í Suðurkjördæmi.  

Börnin okkar

Ég hef setið á Alþingi þetta kjörtímabil sem fulltrúi ykkar, kjósenda í Suðurkjördæmi. Það hefur verið mikil reynsla, oft erfið, en alltaf áhugaverð og lang oftast ánægjuleg. Árið 2014 hlotnaðist mér sá heiður og ábyrgð að vera útnefndur sem einn af sérstökum talsmönnum barna á Alþingi af hagsmunafélögum sem starfa í þágu barna. Ég tók þetta hlutverk strax mjög alvarlega og hef styrkst í sannfæringu minni fyrir mikilvægi þessa verkefnis. Ég hef kynnt mér vel stöðu barna á Íslandi og sett mig inn í mál sem varða þau sérstaklega og hef séð svo margt aðfinnsluvert sem verður að bæta. Því miður er það ömurleg staðreynd að stór hópur barna hér á landi býr ekki við sömu tækifæri og önnur börn. Sum þeirra verða undir strax í leikskóla og grunnskóla, vegna félagslegra aðstæðna, fátæktar, fötlunar og skerðinga og fá ekki þann stuðning sem við getum sem samfélag svo vel veitt þeim. Að verða undir hefur gríðarleg áhrif á lífsgæði þessara barna og tækifæri í öllu lífinu og vegur að hamingju foreldra þeirra og annarra aðstandenda. Það er þyngra en tárum taki, er algjörlega óásættanlegt og óþarft í velmegunarsamfélagi okkar. Skólakerfið gegnir lykilhlutverki við að tryggja börnum tækifæri til að þroska sig og gera þeim kleift að njóta lífsins á sínum forsendum. Skólinn á að vera án aðgreiningar og mismununar. Hann á að laga sig að einstaklingnum, þörfum hans og hæfileikum. Börn eiga ekki að þurfa að laga sig að skólanum. Ég veit, af eigin reynslu, að skólastjórnendur, kennarar og annað starfsfólk skólanna vilja sinna þeim vel. Þetta góða fólk þarf hins vegar að fá fleiri og margbreytilegri úrræði og stuðning til þess að geta sinnt öllum börnum, þörfum þeirra og forsendum. Sem talsmaður barna á Alþingi hef ég skrifað margar greinar, flutt margar ræður og lagt fram fyrirspurnir sem lúta að málefnum barna. Í september s.l. hlotnaðist mér sá heiður að vera verðlaunaður fyrir að standa mig best þingmanna í að vekja athygli á og berjast fyrir réttindum barna, ekki síst þeirra sem eru í erfiðri stöðu. Þessi viðurkenning er mér meira virði en nokkuð annað sem mér hefur hlotnast á lífsleiðinni. Hún er mér líka mikil hvatning til að halda áfram að vinna í þágu barna. Ég veit hins vegar að staða þingmanns færir mér bestu tækifærin til að berjast fyrir þessu mikilvæga málefni. Að bæta stöðu og réttindi barna og jafna tækifæri þeirra til að njóta lífsins og vera virkir og hamingjusamir þátttakendur í samfélaginu. Þess vegna bið ég þig ágæti kjósandi að veita mér stuðning til að halda áfram á sömu braut.    

Helga Tryggvadóttir - VG og Vestmannaeyjar

Í upphafi vikunnar sat ég fund ásamt frambjóðendum af fjórum öðrum listum hjá félagasamtökum í Vestmannaeyjum þar sem við svöruðum nokkrum spurningum sem sneru beint að Vestmannaeyjum. Svörin sem ég gaf eru út frá stefnu VG og mun ég hér stikla á stóru og bæta við í sumum tilfellum.  Heilbrigðismál Spurt var um stefnu VG í heilbrigðisþjónustu í Vestmannaeyjum. Hreyfingin hefur ekki birt sérstaka stefnu fyrir Vestmannaeyjar umfram önnur sveitarfélög. En VG leggur áherslu á að ókeypis aðgangur að heilbrigðisþjónustu eru almenn mannréttindi og heilbrigðis- og velferðarþjónusta á að vera fjármögnuð með skattfé og starfrækt á opinberum grunni. Við höfnum einkarekstri í ágóðaskyni og á heilbrigðiskerfið að þjóna öllum óháð aðstæðum, efnahag og búsetu. VG styður að 11% af vergri þjóðarframleiðslu fari í heilbrigðismálin. Við viljum lækka lyfjakostnað, spýta verulega í lófana hvað varðar geðvernd og fjölga hjúkrunarrýmum. Hvað varðar Vestmannaeyjar þá sjá allir að ástandið er langt því frá í lagi og það þarf að efla sjúkrahúsið og heilsugæsluna. Fæðingarþjónustu þarf að setja aftur á, það þarf örari heimsóknir sérfræðinga, fleiri fasta lækna til starfa, sjúkraflutningar þurfa að vera í lagi og erum við opin fyrir öllum leiðum þar. Það þarf einfaldlega að gera það sem þarf svo að Vestmannaeyingar verði öruggir í sinni heimabyggð.  Herjólfur Eins og í öðrum málum þá leggur VG áherslu á jöfnuð og réttlæti, líka þegar kemur að samgöngum. Hvað varðar gjaldtöku í Herjólf þá á sama verð að gilda fyrir siglingar í báðar hafnir á meginlandinu. Það á að greiða fyrir bíla, en ekki farþega, eins og gert er t.d. í Hvalfjarðargöngin. Reksturinn á að vera á hendi opinberra aðila og sjáum við því ekkert til fyrirstöðu að ríkið og bærinn geri með sér þjónustusamning þar sem heimamenn sjá um reksturinn. Þjónustustig ferjunnar á að vera í samræmi við þarfir notenda, ferðafjöldi á að vera í takt við eftirspurn og svo er ekki galin hugmynd að gámaflutningar fari fram að nóttu til á mestu álagstímum. Niðurgreiðsla kyndingarkostnaðar Eins og með samgöngurnar þá kemur niðurgreiðsla kyndingarkostnaðar á köldum svæðum inn á stefnu VG hvað varðar jöfnuð og réttlæti. Um 10% af heimilum í landinu eru að greiða að meðaltali 24.000 krónur í kyndingarkostnað með rafmagni, en íslenskt heimili greiðir að meðaltali um 7.000 krónur. Við vitum að Vestmannaeyingar eru í fyrri flokknum. Það á að vera borðleggjandi fyrir orkuríka Ísland að geta klárað þetta og útrýma þessari augljósu og óréttlátu mismunun eftir búsetu.  Sorpbrennslumál Vestmannaeyjar hafa sérstöðu þegar kemur að sorpbrennslumálum. Það er líka óhagkvæmt, bæði fjárhagslega og út frá umhverfissjónarmiðum að flytja sorp langan veg á sjó og landi. Ef sorpbrennsla stenst allar nýjustu kröfur, þ.e. umhverfismat, mengunarstaðla, heinsun o.fl. þá má ræða sorpbrennslu. Hér þarf náttúruvernd að skipa háan sess og umhverfissjónarmið ráða miklu um allar lausnir. Meginmálið er endurvinnsla og gildir einu þótt hún verði ekki fjárhagslega hagkvæm í öllum tilvikum. Ríkið er samt væntanlega ekki að fara að taka yfir sorpmál á landinu en þar sem Vestmannaeyjar eru með sérstöðu hvað varðar flutning á sorpi eða aðrar lausnir sé ég ekkert því til fyrirstöðu að samstarfsverkefni ríkis og bæjar komi til greina. Aðalatriðið er að sorpmeðferð sé í lagi alls staðar á Íslandi og í samræmi við kröfur um hreina náttúru og sjálfbærni.   Auðlindagjald Stefna VG er að við nýtingu náttúruauðlinda í eigu þjóðarinnar verði að tryggja að arður af þeim renni til þjóðarinnar og á þjóðin að ráða hversu mikið hún lætur af hendi til þeirra sem nýta auðlindirnar. VG er opið fyrir ýmsum lausnum en það þarf að leggja áherslu á að hlutdeild ríkisins í auðlindarentunni verði stóraukinn en þess jafnframt gætt að nýtingin verði sjálfbær og jafnræði í byggðum landsins. Svo virðist vera að eftir því sem auðlindagjald á sjávarútveginn lækkar þá hækkar útgreiddur arður til eigenda. Árið 2015 greiddu 17 stærstu útgerðarfyrirtækin sér rúmlega 10 milljarða króna í arð en rúmlega 5 milljarða í veiðigjöld. Þarna finnst okkur skakkt gefið. Þess ber að geta að allar breytingar á þessu kerfi taka langan tíma, þurfa að gerast í sátt og taka þarf tillit til allskonar flækjumála. T.d. stærðar og tegundar útgerða, hvort um er að ræða svokallaðan gjafakvóta eða hvort útgerðir hafa keypt kvóta og ótal margt annað. Mikil vinna er framundan sem verður að fara fram í samráði við alla hagsmunaaðila, en aðalpunkturinn er að þjóðin á að njóða arðs af auðlindum sem eru í sameign þjóðarinnar.  Helga Tryggva, frambjóðandi VG í Suðurkjördæmi    

Ingunn Guðmundsdóttir - Krónan er eins og korktappi

Stöðugleiki skilar tugþúsunda kjarabót fyrir almenningEinhver líkti krónunni okkar einhverju sinni við korktappa í ólgusjó fjármálaumhverfisins og stóru gjaldmiðlunum við stórskip með siglingarhæfni til að mæta mismunandi veðrum. Á Íslandi upplifum við núna ágæta tíma með þokkalegum kaupmætti og lágri verðbólgu. En ef við lítum út fyrir túnfótinn sjáum við að krónan hefur risið óþægilega mikið gagnvart erlendum gjaldmiðlum og það veldur útflutnings atvinnugreinunum vanda eins og staðfest var í fréttum fyrir nokkrum dögum. Framkvæmdastjóri hátæknifyrirtækisins Nox Medical lýsti því að fyrirtækið glímdi við 20% verðbólgu vegna stöðu krónunnar gagnvart erlendum gjaldmiðlum. Keppinautar fyrirtækisins í öðrum löndum búa við allt annað og betra rekstrarumhverfi. Ísland er ekki samkeppnishæft vegna þess hvað krónan sveiflast. Lækkum greiðslubyrði um tugi þúsundaSveiflurnar tengjast líka fjármálum einstaklinga og birtast í vaxtaokrinu. Verðtryggingin er séríslenskt fyrirbæri. Samanburður við önnur lönd verður að miðast við óverðtryggð lán. Fyrir skömmu skrifaði ungur íslendingur grein um breytta stöðu sína eftir að hafa flutt til Svíþjóðar. Húsnæðislánið sitt fékk hann í venjulegum banka á 2% vöxtum án verðtryggingar. Sá sem tekur óverðtryggt lán á Íslandi greiðir næstum fjórfalda þá vexti. Ég tek dæmi af íslenskum banka sem býður óverðtryggt húsnæðislán með 7,3% vöxtum. Sá sem tæki 20 milljóna lán á þeim kjörum til 25 ára með jöfnum mánaðargreiðslum væri að greiða 145 þúsund krónur á mánuði. Á sama tíma væri skuldarinn í Svíþjóð að greiða 85 þúsund. Munurinn er 60 þúsund! Miðað við lægra skattþrep á Íslandi þyrfti launatekjur uppá 90 þúsund til að fjármagna þennan mun. Þetta er eitthvað sem alla munar um. Myntráð virkarViðreisn vill festa krónuna við annan gjaldmiðil til að hún hætti að sveiflast eins og korktappi. Það fyrirkomulag byggir á tillögu Seðlabankans um Myntráð sem hann telur að virki til að ná stöðugleika og í beinu framhaldi lægri vöxtum. Núverandi stjórnarflokkar hafa ekki sýnt áhuga á að fara þessa leið og bæta kjör almennings og fyrirtækja í landinu. Það hlýtur því að vera öllum fyrir bestu að þeir fái frí. Viðreisn er XC. Ingunn Guðmundsdóttir viðskiptafræðingurEr búsett á Selfossi og skipar þriðja sæti fyrir Viðreisn í Suðurkjördæmi 

Heilbrigðismál í Vestmannaeyjum og á Suðurlandi: Aðeins Páll Valur, Ari Trausti og Páll Magnússon svöruðu

Eyjafréttir sendu Sigurði Inga Jóhannssyndi forsætisráðherra og formanni Framsóknarflokksins, Páli Magnússyni Sjálfstæðisflokki, Oddnýju Harðardóttur Samfylkingu, Ara Trausta Guðmundssyni Vinstri grænum, Páli Val Björnssyni Bjartri framtíð, Smára MacCarthy Pírötum, Jónu Sólveigu Elínardóttur Viðreisn, Guðmundi Sighvatssyni Alþýðufylkingunni og Sturlu Hólm Jónssyni Dögun sem öll eru oddvitar framboðanna í Suðurkjördæmi nokkrar spurningar um stöðu heilbrigðismála á Suðurlandi og í Vestmannaeyjum. Heimtur voru rýrar og aðeins svöruðu þrír, Páll Valur, Ari Trausti og Páll Magnússon. Páll Valur: Það er staðreynd að rekstur HSU á Suðurlandi er vanfjármagnaður og fari sem horfir verður stofnunin að skerða þjónustu á næsta ári. Hvar sjáið þið helst möguleika á niðurskurði? - Ég hreinlega hef ekki svar við því hvar það ætti að gerast enda tel ég að ekki verði lengra gengið í niðurskurði hjá stofnuninni. Ef hún á að standa undir lögbundnum skyldum sínum þá verður öllum niðurskurði að ljúka nú þegar og auknu fjármagni veitt til hennar.   Finnst þér ásættanlegt að sjúkraflug verði með óbreyttu fyrirkomulagi? Ein flugvél staðsett á Akureyri sem þjóna á öllu landinu? - Nei, það finnst mér alls ekki og hef reifað þá hugmynd að Landhelgisgæslan sjái um sjúkraflugið allavega sunnan og vestanlands. Hún gæti síðan gert þjónustusamning við t.d Mýflug um að sinna sjúkraflugi norðan og austanlands. Þetta er gífurlega mikilvægt öryggisatriði fyrir fólk á landsbyggðinni ekki síst fyrir íbúa Vestmannaeyja sem ekki búa við tryggar samgöngur allan sólarhringinn.   Telur þú það ofverk ríkisins að halda úti skurðlæknaþjónustu í Vestmannaeyjum? - Nei, það tel ég ekki og myndi halda að nýta ætti skurðlækni sem staðsettur yrði í Eyjum til þess að sjá um einhvern hluta þeirra aðgerða sem gerðar eru á Landspítalanum. Nú bíða um 6000 manneskjur eftir aðgerðum að öllu tagi og að minni hyggju ætti að nýta stærri heilbrigðisstofnanir landsins sem búnar eru skurðstofum til þess að sinna þessum aðgerðum. Það segir sig sjálft að Landspítalinn nær ekki að sinna þessu.   Finnst þér í lagi að konur í Vestmannaeyjum þurfi að fæða börn sín uppi á landi með tilheyrandi óhagræði og miklum kostnaði? - Alls ekki og þetta er eitthvað sem hreinlega verður að breyta, það er algerlega óásættanlegt að mismuna fólki eftir því hvar það er búsett.     Ari Trausti:   Það er staðreynd að rekstur HSU á Suðurlandi er vanfjármagnaður og fari sem horfir verður stofnunin að skerða þjónustu á næsta ári. Hvar sjáið þið helst möguleika á niðurskurði?   - Við sjáum engan raunhæfan möguleika á niðurskurði. Nóg er komið. VG hafa lagt fram þá stefnu að endurskipuleggja og eða auka starfsemi sjúkrahúsanna úti á landi eins og sagt er. Meðal annars er gert ráð fyrir að safna saman 51 milljarði króna með álögum á þá sem hæstar hafa tekjur og t.d. með auknum auðlindagjöldum - á næsta ári. Þar af eiga 18 milljarðar að ganga til heilbrigðismála. HSU, á öllu þjónustusvæðinu, færi ekki varhluta af því handabandi.   Finnst þér ásættanlegt að sjúkraflug verði með óbreyttu fyrirkomulagi? Ein flugvél staðsett á Akureyri sem þjóna á öllu landinu? - Sjúkraflug er afar kostnaðarsamt. Það er hægt og rétt að minnka álagið á það með aukinni þjónustu helstu heilbrigðisstofnana utan Reykjavíkur og Akureyrar. Vissulega væri farsælt að hafa tvo upphafsflugvelli sjúkraflutninga að þessu gerðu - og raun þyrfti líka að hafa neyðar- og hjálparþyrlur staðsettar í tveimur landshlutum og þá einmitt á sömu stöðum og tvíhreyflurnar.   Telur þú það ofverk ríkisins að halda úti skurðlæknaþjónustu í Vestmannaeyjum? - Nei - án þess að skilgreina hvað rétt og fært er að hafa af slíku í Vestmannaeyjum - þ.e. hvers konar aðgerðir skulu þar gerðar. Vonandi tekst að endurlífga nauðsynlega þjónustu þar.   Finnst þér í lagi að konur í Vestmannaeyjum þurfi að fæða börn sín uppi á landi með tilheyrandi óhagræði og miklum kostnaði? - Nei, að sjálfsögðu ekki og löngu kominn tími til að reikna út heildar samfélagskostnað af þessu sérstæða ráðslagi. Inni í tölunni er raunkostnaður foreldra og fjölskyldna o.fl. Búast má við að samfélagskostnaðurinn opinberaði að sparnaðartölur á reikningum ríksins af fæðingum utan Eyja dygðu ekki til að réttlæta þessa skerðingu sjúkrahúsþjónustu og það annað sem fylgt hefur nákvæmlega niðurskurði á fæðingarþjónustunni.   Páll Magnússon:   Það er staðreynd að rekstur HSU á Suðurlandi er vanfjármagnaður og fari sem horfir verður stofnunin að skerða þjónustu á næsta ári. Hvar sjáið þið helst möguleika á niðurskurði? - Það eru engir möguleikar á frekari niðurskurði, þvert á móti þarf að auka fjárveitingar stofnunarinnar og bæta þjónustu. Finnst þér ásættanlegt að sjúkraflug verði með óbreyttu fyrirkomulagi? Ein flugvél staðsett á Akureyri sem þjóna á öllu landinu? - Óbreytt fyrirkomulag í sjúkraflugi er ótækt. Tillaga sem lögð hefur verið fram, m.a. af Vilhjálmi Árnasyni þingmanni Sjálfstæðisflokksins, Styrmi Sigurðarsyni yfirmanni sjúkraflutninga á HSU, um sjúkraþyrlur er hugmynd sem vert er að skoða alvarlega. Sjúkraþyrla, skipuð bráðatækni og bráðalækni á vakt allan sólarhringinn gerir það að verkum að viðbragðstími myndi styttast verulega. Slíkt getur skipt sköpum, því við vitum það að hver mínúta getur skipt máli þegar alvarleg veikindi eða slys ber að garði. Telur þú það ofverk ríkisins að halda úti skurðlæknaþjónustu í Vestmannaeyjum? - Nei, þetta er skilyrðislaus og sanngjörn krafa. Finnst þér í lagi að konur í Vestmannaeyjum þurfi að fæða börn sín uppi á landi með tilheyrandi óhagræði og miklum kostnaði? - Það er með öllu ótækt. Að sjálfsögðu eiga konur að eiga þann kost að eiga börn í sínum heimabæ, ekki síst í ljósi þess hversu samgöngur eru ótryggar.    

Páll Magnússon - Veljum öryggi - höfnum óvissu!

Það er alveg sama hvar borið er niður í dag og hvaða alþjóðlegu mælikvarðar eru skoðaðir - Ísland skorar alltaf hæst: ríkissjóði hefur verið snúið úr gegndarlausum hallarekstri í afgang; atvinnuleysi er nú bara tölfræðilegt, rúmlega 2%, sem þýðir á mannamáli að það er ekkert atvinnuleysi; hagvöxtur á Íslandi hefur verið meiri að undanförnu en í öllum þeim löndum sem við notum til samanburðar - og kaupmáttur launa hefur aukist meira síðustu misserin en dæmi eru um á svo skömmum tíma um langt skeið.   Þessi upptalning gæti haldið áfram lengi enn - og er einn samfelldur vitnisburður um hversu vel hefur tekist með stjórn efnahagsmála á því kjörtímabili sem er að ljúka. En við vitum líka að það þarf að gera betur á ýmsum sviðum. Hér á okkar slóðum - í Suðurkjördæmi - eru það innviðabrestirnir sem eru mest aðkallandi. Þeir eru samstofna um allt kjördæmið - vestan frá Reykjanesi og austur á Höfn - og á öllu þessu svæði nefna menn fyrst tvennt: samgöngumál og heilbrigðisþjónustu. Þar á eftir kemur svo löggæslan. Sumir þessir brestir eiga sér rætur í groddalegum niðurskurði í kjölfar hrunsins, aðrir eiga sér lengri sögu en allir verða þeir augljósari núna þegar fjöldi erlendra ferðamanna í kjördæminu hefur margfaldast á aðeins nokkrum árum.   Forgangsmálin eru mismunandi eftir svæðum og stöðum í kjördæminu en öll af sömu rótum runnin. Þessa bresti munum við þingmenn Sjálfstæðisflokksins leggja höfuðáherslu á að laga á næsta kjörtímabili. Forsendan fyrir því að það sé hægt, er að áfram haldi sú jákvæða þróun í efnahagsmálum og meðfylgjandi stöðugleiki sem ég gat um hér í byrjun.   En einmitt þar liggur hundurinn grafinn. Það er alls ekki víst að svo verði - og raunar fremur ólíklegt miðað við hina pólitísku stöðu í dag. Það má segja að það hafi verið heiðarlegt hjá vinstri flokkunum undir forystu Pírata að hefja stjórnarmyndunarviðræður um síðustu helgi - sex dögum FYRIR kosningar. Það hefði að vísu verið lýðræðislegra að hinkra eftir kosningaúrslitunum en látum það vera.   Þetta útspil Pírata og viðbrögð hinna vinstri flokkanna við því hafa einfaldað og auðveldað val kjósenda á laugardaginn. Það eru bara tveir kostir í boði: fjögurra eða jafnvel fimm flokka vinstri stjórn undir forystu Pírata - eða ríkisstjórn undir forystu Sjálfstæðisflokksins.   Við vitum hvað Sjálfstæðisflokkurinn stendur fyrir; hluta af því nefndi ég í byrjun þessarrar greinar. En sem betur fer vitum við líka hvað vinstri flokkarnir, sem hittust um helgina, standa fyrir. Þeir stjórna nefnilega allir saman einu verst rekna sveitarfélagi á Íslandi: Reykjavík. Á nýjum lista yfir 20 best reknu sveitarfélög á Íslandi tróna tvö á toppnum: Vestmannaeyjar og Grindavík. Tvennt af því sem þau eiga sameiginlegt er að þau eru bæði í Suðurkjördæmi og í báðum eru Sjálfstæðismenn við völd. Reykjavík kemst ekki einu sinni inn á þennan topp 20 lista. Tilviljun? Ég held ekki! Og við vitum meira. Við vitum að ef við leggjum saman megináherslur þessarra flokka ganga aftur allir gömlu draugarnir frá Jóhönnu og Steingrími J.: skattahækkanir á einstaklinga og atvinnulíf; Evrópusambandið; niðurbrot á fiskveiðistjórnunarkerfinu og óvissuferð inn í uppboðsleiðina; niðurrif á stjórnarskránni sem ekkert hefur gert af sér - og svona mætti áfram telja.   Á laugardaginn er sem sagt hægt að velja á milli áframhaldandi framfara og efnahagslegs stöðugleika undir forystu Sjálfstæðisflokksins - eða fjölflokka vinstri óvissuferðar undir forystu Pírata.   Ég treysti á dómgreind kjósenda í Suðurkjördæmi. Ég treysti á að þeir kjósi með með sjálfum sér - fyrir eigin velferð og öryggi. Ég treysti á að þeir hafni þessu vinstra kraðaki; sporin hræða. Ég treysti því að þeir kjósi Sjálfstæðisflokkinn!   Páll Magnússon Oddviti Sjálfstæðisflokksins í Suðurkjördæmi    

Ragnar Óskarsson - Hvernig væri það?

 Sjálfstæðisflokkurinn og Framsókn hafa í kosningabaráttunni nú haldið því hátt á lofti að nauðsynlegt sé að viðhalda stöðugleika á Íslandi til frambúðar. Það geti þeir flokkar einir gert og því sé rökrétt að kjósa þá áfram til valda. Nú skulum við aðeins velta fyrir okkur nokkrum þáttum þess stöðugleika sem ríkisstjórnin býður upp á: • Um ríkisstjórnina sjálfa er enginn stöðugleiki. Stjórnin er að hrökklast frá völdum áður en kjörtímabilið er búið vegna spillingarmála og stjórnarflokkarnir hamast nú hvor gegn öðrum og eru nánast ósammála um allt. • Í heilbrigðismálum er enginn stöðugleiki. Heilbrigðiskerfið komið að fótum fram og stjórnarflokkarnir bjóða ekki upp á neinar lausnir til úrbóta, hvað þá til enduruppbyggingar. Þeir eru þó sammála um að einkavæða heilbrigðiskerfið svo einhverjir vildarvinir geti grætt á kostnað almennings í landinu. • Í fiskveiðistjórnunarmálum er stöðugleikinn ekki meiri en svo að byggðirnar vítt um landið verða fyrri hverju áfallinu á fætur öðru vegna stefnu stjórnarflokkanna. Fjölmargir smábátasjómenn eru sem leiguliðar kvótakónga sem í síauknum mæli taka fé út úr sjávarútveginum og fjárfesta í alls kyns braski. • Um stöðugleika í samgöngumálum nægir að nefna aðstæður okkar Vestmannaeyinga. Samgöngur á sjó milli lands og Eyja í algerum ólestri. Ekkert er ákveðið með umbætur á Landeyjahöfn, allt óljóst með nýtt skip og þar fram eftir götum. Í nútímanum þurfa svo farþegar frá Þorlákshöfn til Eyja að ganga um bílaþilfar til þess að komast um borð í Herjólf. • Stöðugleiki ríkisstjórnarinnar í skattamálum felst í því að lækka skatta til hinna ríku á kostnað almennings. • Eini stöðugleikinn sem ríkisstjórnin getur „státað af“ eru spillingarmálin. Ráðherrar beggja flokka hafa orðið uppvísir að því að tengjast skattaskjólsfélögum til þess að fela fjármuni fyrir íslenskum skattyfirvöldum og samfélagi. Og áfram mætti halda. Sú spurning hlýtur því óhjákvæmilega að vakna hvort við eigum að treysta þessu fólki til að fara áfram með völdin í landinu. Ég held að það ættum við alls ekki að gera. Til þess eru vítin að varast þau. Hvernig væri að treysta fólki eins og Katrínu Jakobsdóttur, Ara Trausta og HelguTryggva og öðru góðu fólki til þess að breyta samfélaginu, skapa hér réttlátt samfélag. Það getum við gert með því að kjósa Vinstri græn. X V Ragnar Óskarsson  

Þetta er hægt og þetta er sanngjarnt

Vinstrihreyfingin- grænt framboð leggur nú sem fyrr höfuðáherslu á að á Íslandi sé öflugt og samábyrgt velferðarkerfi. Einn þáttur í því er áherslan á skattkerfið sé skilvirkt, réttlátt, grænt, jafni tekjur og eyði aðstöðumun. En hvernig er hægt að gera skattkerfið skilvirk, réttlátt o.s.frv. Lítum á það. Þessar leiðir benda Vinstri- græn á: • Stöðva verður þá þróun að æ meiri auður safnist á æ færri hendur. Í dag eiga 10% landsmanna 75% alls auðs í landinu. Meðan þetta er svona eykst ójöfnuður í landinu. • Til að stemma stigu við skattaundanskotum einstaklinga og fyrirtækja frá velferðarkerfinu þarf að stórefla skattaeftirlit og skattrannsóknir. Nýtingu aflandsfélaga í skattaskjólum á að banna. • Þrepaskattur verði nýttur til jöfnunar í samræmi við það sem gerist á Norðurlöndunum. Þannig er lögð áhersla á aukin framlög þeirra ríkustu inn í sameiginlega sjóði. • Innheimta á gjald af nýtingu auðlinda og tryggja þannig að arðurinn af sameiginlegum auðlindum renni til þjóðarinnar. • Reglur um þunna eiginfjármögnun verði leiddar í lög og þannig unnið gegn því að íslensk dótturfélög í eigu erlendra aðila komi ósköttuðum hagnaði úr landi. Allar þessar leiðir eru til þess fallnar að stuðla að öflugu velferðarkerfi og réttlæti. Þær eru allar færar og þær stuðla allar að því að skapa réttlátara þjóðfélag.   -Ragnar Óskarsson    

Vésteinn Valgarðsson - Vestmannaeyingar og Alþýðufylkingin

 Eyjafréttir greindu frá því á föstudaginn, að enginn Vestmannaeyingur væri á framboðslista Alþýðufylkingarinnar í Suðurkjördæmi. Því miður verður ekki betur séð en að það sé rétt, þó með þeim fyrirvara að ég veit ekki hvaðan allir á listanum eru ættaðir. En það er annað mál.   Góða fréttin er hins vegar að Vestmannaeyingar eiga þess kost að kjósa Alþýðufylkinguna í þessum kosningum. Þess áttu þeir ekki kost í síðustu Alþingiskosningum, ekki frekar en aðrir utan Reykjavíkur. Við viljum auðvitað að sem flestir geti kosið Alþýðufylkinguna, þannig að við settum það ekki fyrir okkur að heilu byggðarlögin vantaði fulltrúa á listann -- það verður bara að hafa það. Enda berjumst við fyrir hagsmunum og velferð alþýðunnar alls staðar í landinu, en ekki í einstökum byggðarlögum.   Alþýðufylkingin er ekki í þeim bransa sem boðar kjördæmapot eða bitlinga. Enginn sem gengur til liðs við okkur getur vænst þess að fá feitt embætti að launum. Hins vegar bjóðum við upp á mikla vinnu, óeigingjarnt sjálfboðastarf og baráttu sem mun vonandi á endanum skila sér í betri lífskjörum fyrir alla alþýðu í landinu.   Megináherslur okkar eru stóru þjóðfélagsmálin: Félagslegt réttlæti, félagsvætt fjármálakerfi og fullveldi landsins. Þetta þrennt helst í hendur: Félagsvæðing er andstæðan við markaðsvæðingu og þýðir að starfsemi sem er rekin í gróðaskyni sé breytt í samfélagslega þjónustu. Í tilfelli fjármálakerfisins: Opinber fjármálaþjónusta sem tekur ekki sjálf gróða og tekur því ekki vexti. Hugsið um það augnablik, hver húsnæðiskostnaðurinn ykkar væri, ef lánin ykkar bæru ekki vexti.   Vaxtalaust fjármálakerfi mundi spara heimilunum og þjóðfélaginu öllu gífurlegt fé, sem mundi aftur nýtast til að byggja upp innviði landsins af öllu tæi. Óskorað fullveldi er forsenda þess að geta þetta, þar sem ESB-aðild mundi skuldbinda okkur til meiri markaðsvæðingar á flestum sviðum. Við erum fortakslausir andstæðingar ESB-aðildar, ekki vegna þess að við viljum geta stundað spillingu, heldur vegna þess að við þurfum fullveldið, með þeim rétti sem fylgir því, til þess að takast á við hana sjálf. Það mun enginn gera það fyrir okkur.   Það er fleira í pokahorninu hjá okkur, og það ættuð þið að skoða á heimasíðunni okkar: Alþýðufylkingin.is   Auðvitað er það synd að Vestmannaeyinga vanti á þennan lista, þótt þeir geti kosið hann. En því geta engir nema Vestmannaeyingar sjálfir breytt, með því að ganga til liðs við Alþýðufylkinguna og þannig hlutast til um að Eyjar eigi fulltrúa á listanum í næstu kosningum. Það er auðvelt að hafa uppi á okkur ef þið viljið gefa ykkur fram og ganga í flokkinn.   Vésteinn Valgarðsson varaformaður Alþýðufylkingarinnar

Lára Skæringsdóttir - Þurfum að tryggja stöðugleika

Lára Skæringsdóttir situr í 8. sæti lista Framsóknar í Suðurkjördæmi fyrir komandi kosningar. Lára sem er grunnskólakennari segist alltaf hafa haft brennandi áhuga á pólítk og samfélagsmálum, þá sérstaklega í Vestmannaeyjum.   Hvað ertu að aðhafast við þessa daganna? Starfa sem grunnskólakennari í unglingadeild GRV Hvað var til þess að þú ákvaðst að gefa kost á þér? Hef brennandi áhuga á pólitík og hvernig landinu okkar er stjórnað og þá ekki síður velferð Vestmannaeyja og framtíð okkar sem hérna búum. Hvaða málefni brenna helst á þér og hvað er það sem þú mundir vilja koma í gegn ef þú ferð inná þing? Líkurnar á að ég fari beint á þing eru að sjálfsögðu miklar enda ætla allir merkja við x-B. Ég hef mikinn áhuga á samgöngumálum líkt og flestir Vestmannaeyingar. Fjármögnun heilbrigðisþjónustu hér og á Suðurlandi þarf að sjálfsögðu að bæta. Heilbrigðisráðherra hefur því miður ekki - hingað til a.m.k. - haft mikinn áhuga á Suðurhafseyjum í þeim efnum og kennir auk þess Bjarna Ben um, segist ekki fá meiri pening frá honum en þetta. Bjarni verði bara reiður ef hann biður um meira. Ég myndi gjarnan vilja sjá úrbætur í málefnum aldraðra, og breytingar á húsnæðilánakerfinu þannig að auðvelda megi ungu fólki að festa kaup á eigin eign. Þá er framtíð okkar sem sjávarpláss mér ofarlega í huga og þarf að huga vel að þeim málaflokki hvort sem stjórnun í sjávarútvegi eða almennt að hlúa vel að byggðastefnu landsins.   Samgöngumál og heilbrigðismál eru það sem brennir helst á Eyjamönnum. Hvað viltu helst sjá gert þar? Ég styð heilshugar þá hugmynd að Vestmannaeyingar reki sjálfir Herjólf og hef fulla trú á því að það komi betur út að hafa reksturinn hér í heimabyggð. Ég deili áhyggjum margra af því að annars muni hagmunir íbúa og ferðamanna lúti í lægra haldi fyrir sérhagsmunum stofnana og einkafyrirtækja. Stjórna þarf ferðatíðni og ferðatímum eftir eftirspurn, en ekki hagnaðarsjónarmiðum einkafyrirtækis, þannig að sem flestir komist til og frá Eyjum. Heildarhagmunir af því fyrir samfélagið eru mun meiri en hugsanleg skerðing á gróða einkafyrirtækja. Útboð er vel hægt að gera með þeim hætti að slíkt sé tryggt, annars er útboðið illa unnið. Ég styð líka lyktarlausar samgöngur; að farþegar þurfi ekki endurtekið og óvalkvætt að skrúbba skítafýlu af skóm og úr bílum eftir ferjuferðir. Heilbrigðisstofnun Suðurlands er vanfjármögnuð og úr því þarf að bæta. Annars er ekki hægt að viðhalda þjónustu, hvað þá að auka hana. Aukin og nægileg fjármögnun er forsenda fyrir því að efla aftur sjúkrahúsþjónustu í Vestmannaeyjum, þar með talið skurðstofuvakt og fæðingarþjónustu. Auka þarf fjárframlög um a.m.k. 250 milljónir til að Heilbrigðisstofnun Suðurlands geti sinnt hlutverki sínu þannig að vel fari. Þetta eru smápeningar fyrir ríkið og eins og staða ríkissjóðs er nú bara spurning um forgangsröðun. Ég held að það færi vel á því að næsti heilbrigðisráðherra kæmi úr Suðurkjördæmi enda kjördæmið ekki verið í forgangi í þessum málaflokki undanfarin ár. Stefnumörkun ríkisins í heilbrigðismálum fyrir landsbyggðina er auk þess ábótavant. Úr þessu þarf að bæta og einnig draga úr flækjustigi embættismannakerfisins.   Annað sem þú vilt koma á framfæri, þá má það endilega koma fram. Framsóknarflokkurinn setti fram mjög ákveðnar hugmyndir fyrir síðustu kosningar. Þær hugmyndir gengu eftir landi og þjóð til hagsbóta. Mikilvægt er að halda áfram á sömu braut og tryggja stöðugleika og festu. Framsóknarflokkurinn hefur sýnt það að hann er meira en traustsins verður í þeim efnum.    

Páll Valur Björnsson - Til hvers eru stjórnmálamenn?

Til hvers eru stjórnmálamenn? Að mínu mati hafa stjórnmálamenn það eina hlutverk og þá einu skyldu að gera það sem í þeirra valdi stendur til að bæta lífsgæði fólks í nútíð og framtíð og að tryggja því sem jöfnust tækifæri. Ég er sannfærður um að þjóðfélag þar sem sátt er um það meginmarkmið að tryggja fólki og fyrirtækjum sem jöfnust tækifæri tryggir líka almenna velmegun, frelsi, framtak og sanngirni og og stuðlar þannig að stórbættum lífsgæðum og hamingju alls almennings Við sem störfum í Bjartri framtíð viljum skipuleggja þjóðfélagið þannig að allir landsmenn hafi jöfn tækifæri til að nýta margbreytilega hæfileika sína sjálfum sér og okkur öllum til framdráttar. Við leggjum áherslu á að allt þetta sé gert í fullkominni sátt við náttúruna og umhverfið, með sjálfbærni og ábyrgð og langtímahagsmuni þjóðarinnar að leiðarljósi. Við viljum leggja okkar af mörkum við að byggja hér upp lifandi efnahags- og velferðarkerfi sem býr við heilbrigt samkeppnisumhverfi sem hvetur fjárfesta og frumkvöðla til framtaks, athafna og fjárfestinga. Það mun skapa ótal tækifæri? tækifæri sem munu gera okkur öllum kleift að fá vinnu sem henta okkar margvíslegu hæfileikum og áhugamálum. Enga fordóma. Við í Bjartri framtíð viljum leggja okkar lóð á vogarskálarnar til þess að hér verði gott að lifa og starfa fyrir alla og allir fái tækifæri til að vera með, án þess að þurfa að þola mismunun og fordóma. Þetta hefur alltaf verið mikilvægt en þó aldrei sem nú á þessum tímum fjölmenningar og margbreytileika mannlífsins og allra þeirra stórkostlegu tækifæra sem því fylgja. Við þurfum að hafa vit á að nýta þessi tækifæri en reisa ekki veggi og óþarfar, gagnslausar hindranir fyrir okkur sjálf og aðra með þröngsýni og kjarkleysi. Stórt skref var stigið í þá átt með fullgildingu samnings Sameinuðu þjóðanna um réttindi fatlaðs fólks og með samþykkt geðheilbrigðisstefnu til fjögurra ára í vor sem á að tryggja að þeir sem eiga við geðheilbrigðisvanda að etja fái viðeigandi þjónustu hratt og örugglega. Við eigum að sjálfsögðu að leggja höfuðáherslu á að efla forvarnir og mæta börnum sem eiga við ýmis konar raskanir að stríða strax á fyrstu stigum. Börnin okkar eru framtíðin og við berum öll saman ábyrgð á að þau fái öll notið öll hennar. Það er langmikilvægasta verkefnið sem okkur er treyst fyrir, sem einstaklingum og sem samfélagi. Stöndum saman og vinnum saman! En að byggja hér upp samfélag sem verður besta útgáfan af sjálfu sér er mikil áskorun; áskorun sem krefst kjarks og þátttöku allra þeirra sem þetta samfélag byggja. Þátttöku stjórnvalda, sveitarfélaga, atvinnulífsins, fræðasamfélagsins, hvers konar samtaka og félaga og ekki síst alls fólksins sem í landinu býr, ungra og gamalla, kvenna og karla. Við eigum ekki að einblína á það sem skilur okkur að, okkur greinir á um og sundrar okkur heldur eigum við að horfa fyrst og fremst á það sem við eigum sameiginlegt og hvernig við getum eflt og styrkt það sem sameinar okkur. Sú ríkisstjórn og það löggjafarþing sem við tekur eftir kosningar verður að taka mannréttindi og skyldur sínar til að gera það sem mögulegt er til að fólki fái jöfn tækifæri mjög alvarlega. Til að tryggja að allir fái notið arðs af sameiginlegum auðlindum þjóðarinnar. Ekki bara fáir útvaldir. Þannig getum við búið hér til betra og réttlátara samfélag, samfélag sem ræktar heiðarleika, kærleika og ábyrgð ásamt hófsemd og auðmýkt, samfélag sem setur málefni barna sinna og þeirra sem höllustum fæti standa í samfélaginu í forgang, samfélag sem tekur opnum örmum nýjum þegnum sem hér vilja búa, og síðast en ekki síst samfélaga sem tryggir eldri borgurum sínum áhyggjulausa göngu inn í sólarlag lífs síns. Þannig samfélag lendir ekki í hruni, þannig samfélag setur bönd á græðgina, það hafnar hrokanum og metur heiðarleika og ábyrgð miklu meira en munað og auð. Þannig samfélag viljum við í Bjartri framtíð að okkar góða og gjöfula land verði.   Páll Valur Björnsson þingmaður Bjartrar framtíðar í Suðurkjördæmi  

Vilhjálmur Árnason - Hver mínúta skiptir máli

 Fyrir stuttu kynntum við Styrmir Sigurðarson hugmyndir um nýjar og betri leiðir í utanspítalaþjónustu með sérhæfðum sjúkraþyrlum á fjölmennum fundi í Vestmannaeyjum. Vegna íbúafjölgunar, fjölgunar ferðamanna og aukinnar sérhæfingar í heilbrigðisþjónustunni, sem virðist ekki vera hægt að sinna annarsstaðar en á höfuðborgarsvæðinu, er nauðsynlegt að bregðast við með því að koma sérhæfðri aðstoð sem fyrst til okkar út á land. Heilbrigðisráðherra gefur hugmyndinni byr undir báða vængi Síðan fundurinn var hefur mikið vatn runnið til sjávar. Við höfum til að mynda fundið fyrir mikilli hvatningu og góðum viðbrögðum en hugmyndin um sjúkraþyrluna hefur fengið afar jákvæðar viðtökur. Fjöldi aðila hefur haft samband við okkur og skiptast á upplýsingum til að fleyta málinu áfram. Þá var enn fremur fagnaðarefni þegar heilbrigðisráðherra ákvað að veita fjármagni í að gera frekari úttekt og kynningu á málinu. Þannig má segja að heilbrigðisráðherra hafi gefið hugmyndinni byr undir báða vængi.   Þær tillögur sem við höfum unnið að undanfarið, ásamt þeim Viðari Magnússyni formanni Fagráðs sjúkraflutninga Íslands og Njáli Pálssyni formanni fagdeildar utanspítalaþjónustu hjá Landssambandi slökkviliðs- og sjúkraflutningamanna, snúa að því að fá sérstaka sjúkraþyrlu í notkun. Hugmyndir þessar taka mið af því sem gengur og gerist á hinum Norðurlöndunum. Áhöfn þyrlunnar yrðu skipuð með sérhæfðum bráðatækni og bráðalækni sem yrðu á svokallaðri staðarvakt allan sólarhringinn. Þannig verður hægt að stytta viðbragðstíma í að veita sérhæfða utanspítalaþjónustu fyrir þá sem veikjast og slasast fjarri spítölum. Eins og allir þekkja þá getur hver mínúta skipt máli.   Vilhjálmur Árnason þingmaður -höfundur skipar 3. sæti á lista Sjálfstæðisflokksins í Suðurkjördæmi      

Ásmundur Friðriksson - "Þakklátur fólkinu sem studdi mig"

  „Ég vil byrja á því að þakka öllum sem þátt tóku í prófkjörinu og Eyjamenn sýndu enn og aftur að þeir kunna að bregðast við þegar kallið kemur og standa saman. Mikil þátttaka í Eyjum gefur okkur byr undir báða vængi fyrir komandi kosningar og ég hlakka til að vinna með Páli Magnússyni forystumanni okkar á listanum. Við höfum rætt saman og ég veit að samstarfið verður gott, við höfum þekkst í áratugi og Eyjahjartað slær í okkur báðum. Ég vil þakka þeim sem studdu mig, annað sætið á listanum er góður árangur og ég er afar sátur og þakklátur ykkur öllum,“ sagði Ásmundur Friðriksson, alþingismaður sem hafnaði í öðru sæti í prófkjör Sjálfstæðisflokksins á laugardaginn.   Þú barðist fyrir fyrsta til öðru sæti og hafnar í öðru með rétt um helming atkvæða. Er það ekki ásættanleg niðurstaða fyrir þig? „Það er auðvitað mjög góður árangur að ná öðru sætinu á lista Sjálfstæðisflokksins í Suðurkjördæmi. Ég er líka að fá góða almenna kosningu og yfir 70% þáttakenda völdu mig í sæti á listanum sem sýnir góða breidd. Þegar ég lít til baka er ég sáttur við þá vinnu sem ég og stuðningsmenn mínir lögðu í prófkjörið. Við höfðum að leiðarljósi þau verk sem ég hef unnið í þinginu og kjördæminu og gleðina sem var ósvikin allan tíman. Ég og Sigga viljum þakka öllu því góða fólki sem studdi mig og vann langan vinnudag til að ná þessum árangri sem ég hefði aldrei náð nema vegna þeirra. Ég mun halda mínu striki og undirbúningur fyrir næstu kosningar hófst strax á mánudagsmorgun með heimsókn í tvö fyrirtæki áður en ég fór á morgunfundi í þinginu, þingmennska er endalaus vinna ef árangur á að nást og ég mun ekki slá af.“   Á eigin forsendum   Þú ferð upp um sæti og sitjandi ráðherra húrrar niður, styrkir það ekki stöðu þína innan flokksins? „Í þessu prófkjöri fór ég algjörlega á eigin forsendum, bauð mig fram í 1.til 2. sætið á listanum og náði öðru sætinu. Það voru 4000 manns, helmingur konur og helmingur karlar sem völdu listann og ég treysti því að það fólk hafi kosið af ábyrgð og við virðum niðurstöðuna. Mín prófkjörsbarátta gekk út á að ræða um mig sem þingmann, hvað ég stæði fyrir og mín störf. Slík vinna skilar árangri nú eins og áður.“   Listinn verði sigurstranglegur   Áttu von á breytingum á listanum með tilliti til konuleysis? „Þegar ég svara þessari spurningu veit ég ekki hvaða stefnu það mál kann að taka. Í prófkjörinu var kosið um verk stjórnmálamanna ekki kyn fólks. Það er mikilvægt að konur sitji í efstu sætum listans en samkvæmt reglum flokksins er enginn öruggur með sæti sitt sem ekki fær bindandi kosningu. Bindandi kosning er þegar frambjóðandi fær meira en 50% fylgi í viðkomandi sæti og ég var með tæp 50%. Mikilvægast er að listinn verði skipaður konum og körlum sem ætla að vinna saman sem liðsheild. Það höfum við Páll rætt saman um og ég veit að það verður mikil breyting frá því sem var og hlakka sannarlega til þess. Fólk hefur almennt áhyggjur af því að breytingar verði en það er mikilvægast í enda dagsins að listinn verði sigurstranglegur og kjósendur í kjördæminu vilji styðja sigurstranglegan lista skipaðan konum, körlum og ungu fólki af báðum kynjum. Við munum standa saman um slíkan lista.“   Á hvað munt þú leggja áherslu á í komandi kosningabaráttu? „Fyrir utan mál er varða stöðuleika í samfélaginu og betra heilbrigðiskerfi fyrir alla þá er ég persónulega með mál eldra fólks á minni könnu. Kjör þeirra eru mér kappsmál og ég vil leggja mig fram í þeim málaflokki eins og ég hef gert lengi. Varðandi Eyjar sérstaklega eru heilbrigðis- og samgöngumálin þau mikilvægustu. Sömu fargöld til Landeyjarhafnar og Þorlákshafnar og fé til rannsókna á höfninni í landeyjum til að tryggja öruggar siglingar þangar allt árið þegar ný ferja verður komin 2018. Heilbrigðisstofnunina í Eyjum þarf að styrkja, auka þjónustu og bæta fæðingarhjálpina og sannarlega verður lögð áherslur á þau mál,“ sagði Ásmundur að endingu  

Eyjakonan Helga Tryggvadóttir í fimmta sæti hjá Vinstri grænum

 Helga Tryggvadóttir náms- og starfsráðgjafi situr í fimmta sæti lista Vinstri grænna í suðurkjördæmi fyrir komandi kosningar. Hún hefur mikinn áhuga á velferð allra í samfélaginu og vill leggja sitt af mörkum. Helga hóf störf í Framvegis miðstöð símenntunar í síðasta mánuði sem náms- og starfsráðgjafi og verkefnastjóri. Einnig er hún í lítilli stöðu sem kennari við námsbraut í náms- og starfsráðgjöf í Háskóla Íslands.   Hvað var til þess að þú ákvaðst að gefa kost á þér? -Ég hef alltaf verið pólitísk, haft skoðanir á samfélaginu og viðrað þær af og til í gegnum tíðina, án þess þó að taka þátt í skipulögðu stjórnmálastarfi. Þegar leitað var til mín með að taka sæti á listanum sagði ég strax já, held að það sé kominn tími til að ég leggi baráttunni fyrir betra og réttlátara samfélagi lið á þessum vettvangi.   Hvaða málefni brenna helst á þér og hvað er það sem þú mundir vilja koma í gegn ef þú ferð á þing? - Ég hef mikinn áhuga á velferð allra í samfélaginu og snertir það líklega alla fleti stjórnmálanna. Velferðar-, heilbrigðis-, mennta-, byggða-, samgöngu-, umhverfis og atvinnumál svo eitthvað sé nefnt, allt blandast þetta saman og snertir gæði lífsins hjá okkur öllum.   Það sem mér finnst mikilægt að skipting gæða, þar með talið auðs, verði réttlátari. Hvað segir að kennari sé ekki jafn mikilvægur og bankamaður? Eða fiskvinnslufólk síður merkilegt en lögfræðingar eða læknar? Í mínum huga erum við öll jöfn og þó svo það sé kannski ekki alltaf augljóst þá erum við öll að leggja mikið til samfélagsins. Eða þannig finnst mér að raunverueikinn eigi að vera. Raunin er hins vegar sú að þetta hefur heldur betur riðlast síðustu árin þar sem okkar minnstu bræður og systur lepja dauðann úr skel á meðan aðrir lifa í lúxus. Svo sem ekkert að því að fólk lifi í vellystingum, svo lengi sem næsti maður á skammlaust til hnífs og skeiðar. Ég hef verið svolítið upptekin af því að manneskjan geti lifað með reisn sama í hvaða stöðu hún er. Niðurstaðan er því líklega sú að ef ég kæmst á þing myndi ég berjast fyrir réttlátara samfélagi á öllum vígstöðvum.   Í tilefni að nýju kvótaári, hver telur þú framtíð kvótakerfisins vera? - Óskastaðan er sú að öll þjóðin njóti góðs af auðlindinni, að arðurinn safnist ekki á hendur fárra. Mér finnst ekkert réttlæti í því að fiskurinn í sjónum verði um ókomna tíð eign annarra en þjóðarinnar allrar. Þeir sem sækja fiskinn og fjárfesta eiga svo sannarlega skilið laun fyrir sína vinnu og áhættu, en eins og málin hafa þróast þá tel ég ótækt hvernig kökunni er skipt. Þær leiðir sem VG hefur lagt til fela m.a. í sér fyrningu aflaheimilda á lögnum tíma, sanngjarnari ráðstöfun þeirra auk fleiri ráðstafana. Mér hugnast þessi stefna vel þar sem markmiðin eru þau sem ég tala um hér að ofan. Aflamarkskerfið virðist aftur á móti þjóna tilgangi sínum vel og vona ég að svo verði áfram. Ég vona því að framtíð kvótakerfisins verði í takt við stefnu VG, en hvort það verður á eftir að koma í ljós.   Að lokum vildi Helga hvetja fólk til að kynna sér stefnu VG vel og vandlega. „Þar er að finna skynsamar og framkvæmanlegar leiðir að réttlátu samfélagi. Svo er náttúulega aðal málið að fólk nýti sinn lýðræðislega rétt og mæti á kjörstað, sama hvar það stendur í pólitíkinni“ sagði Helga að lokum.  

Eyjamaðurinn Smári McCarthy leiðir lista Pírata í Suðurkjördæmi

 Smári MacCarthy mun leiða fleiða framboð Pírata í Suðurkjördæmi. Hann hefur mikinn áhuga á samfélaginu og skipulagi þess. Hann hefur verið búsettur erlendis en ákvað að snúa aftur heim og ætlar sér að hjálpa til við að endurræsa Ísland.   Hvað ertu að aðhafast við þessa daganna? - Aðallega að þvælast um Suðurlandið að kynna mér aðstæður, reyna að læra allt sem ég get. Suðurkjördæmið er stórt, miklir hagsmunir í sjávarútvegi og landbúnaði, samgöngur í molum, heilsugæslur í vondri stöðu, og fleira til. Mikið að læra áður en við förum af fullum krafti í kosningabaráttuna.   Hvað var til þess að þú ákvaðst að gefa kost á þér? - Ég hef mikinn áhuga á samfélaginu og skipulagi þess, en hef undanfarin ár orðið fyrir miklum vonbrigðum með stjórnmálin. Mælirinn fyltist á einhverjum tímapunkti, og þá voru Píratar augljósa svarið. Ég hef unnið undanfarin ár í Austur-Evrópu við rannsóknir á skipulagðri glæpastarfsemi og spillingu, en ákvað að flytja heim og taka til hendinni við að endurræsa Ísland. Við höfum svo rosalega mikla möguleika á því að byggja gott samfélag hérna, og það er ömurlegt að horfa á slík tækifæri sóast.   Hvaða málefni brenna helst á þér og hvað er það sem þú mundir vilja koma í gegn ef þú ferð inná þing? - Ég vil skoða stóru myndina. Ég vil sjá nýjar grunnstoðir fyrir samfélagið okkar: opnari stjórnsýslu, meira traust í stjórnkerfinu, nýja stjórnarskrá. Ég held við getum byggt sterkara hagkerfi með frjálsari atvinnuvegum og meiri nýsköpun. Það þarf líka að uppræta mikla spillingu. Þetta allt þarf að gera til að geta lagað þau stórkostlegu vandamál sem eru til staðar í heilbrigðiskerfinu, í menntakerfinu, og víðar. Mér finnst þetta allt stórkostlega áhugavert, og margt sem þarf að gera.   Í tilefni að nýju kvótaári, hver telur þú framtíð kvótakerfisins vera? - Kvótakerfið er ágætt, en fiskveiðistjórnunarkerfið er það ekki. Úthlutunarreglurnar, braskið og samþjöppunin eru að valda mörgum byggðum mikinn skaða meðan fáir græða. Við viljum færa okkur smám saman yfir í uppboðskerfi, því það tryggir betur jafnt aðgengi, atvinnufrelsi, hagsmuni sjómanna, og eykur möguleika á nýliðun. En við viljum alls ekki kippa fótunum undan stórum og stöndugum útgerðum – við vitum að sumar útgerðirnar eru hræddar við hugmyndirnar okkar, en þær áhyggjur eru óþarfar. Markmiðið er að stuðla að sanngjarnara kerfi fyrir alla, en við vitum líka að þetta er flókið og margir fletir á þessu. Ég vona að fólk kynni sér stefnu Pírata í sjávarútvegsmálum sjálfstætt, en hafni þeim ekki bara vegna hræðslu við breytingar. - Píratar eru nýtt stjórnmálaafl, sem hefur þó fengið smá tækifæri til að sanna sig. Okkar fólk hefur staðið sig rosalega vel, en það þarf meira en þrjá þingmenn í stjórnarandstöðu til að breyta heiminum. Framtíðin ræðst að miklu leyti af því hvaða ákvarðanir verða teknar 29. október næstkomandi: hvort ætlum við að halda gjörspilltu fúskaramenningunni á Alþingi á lofti með sömu gömlu aðferðafræðinni, eða að gera eitthvað nýtt? Það er ykkar að velja. En hvað sem fólk velur, þá er mikilvægast að mæta á kjörstað, sagði Smári að lokum.  

Páll V. Björnsson - Þetta er Björt framtíð

Fjölbreytt og spennandi Ísland Björt Framtíð er málsvari fjölbreytni, á öllum sviðum. Byggjum upp ferðaþjónustuna, skapandi greinar, rannsóknir og þróun, grænan iðnað og alls konar nýsköpun. Eflum skólastarf og menningarlífið og gerum Ísland að skemmtilegri stað til að vera á, uppfullum af tækifærum. Leyfum fólki að flytja til okkar og gerast nýir Íslendingar. Fáum unga fólkið heim. Treystum fólki til að skapa sín eigin tækifæri í traustu, opnu og alþjóðlegu samfélagi. Engin manneskja er útundan Stöndum mannréttindavaktina, alltaf, fyrir börn, fyrir fatlað fólk, fyrir innflytjendur, fyrir konur, fyrir karla, fyrir ríka, fyrir fátæka. Hjálpum þeim mest sem virkilega þurfa aðstoð, til þess að lifa sjálfstæðu lífi, til þess að öðlast þak yfir höfuðið, til þess að ala upp börnin sín. Endurreisum heilbrigðiskerfið, með stórbættri heilsugæslu um land allt, öldrunarþjónustu, lýðheilsu og forvörnum, nýjum Landspítala, betra gæðaeftirliti og miklu, miklu minni greiðsluþátttöku sjúklinga. Ábyrg langtímahugsun Verndum umhverfið, björgum jörðinni, verum græn. Hugsum fram í tímann. Frestum ekki vandamálum. Innviðir Íslands eru að drabbast niður, vegirnir, skólarnir, spítalarnir. Samt er góðæri. Í stað þess að fjárfesta í innviðum hefur verið bruðlað með fé. Í stað þess að afla tekna af auðlindum okkar til samfélagslegra verkefna, eru þær færðar fáum á spottprís. Þannig gerir Björt framtíð ekki. Við búum í haginn. Yfirveguð stjórnmál Tölum saman, segjum satt. Virðum hvort annað. Góð mál verða betri ef fleiri koma að þeim. Skoðanir, þekking og kunnátta fólks með alls konar bakgrunn og menntun eru fjársjóður. Upplýsingar eru gull. Björt framtíð þorir að leiða hin stærstu og erfiðustu deilumál til lykta með gögnum, rannsóknum, opnu samtali og lýðræðislegum aðferðum. Við höfum okkar sannfæringu og stöndum á henni. En við höfum líka kjark til að hlusta á aðra. Ekki kjósa ekki neitt. Kjóstu Bjarta framtíð X-A.   Páll V. Björnsson skipar 1.sæti Bjartar framtíðar í Suðurkjördæmi.

Kristín María Birgisdóttir - Afhverju Viðreisn?

Það er gaman og gefandi að hafa áhrif til góðra verka og undanfarin ár hef ég einbeitt mér að því að vinna í þágu minnar heimabyggðar. Staðbundin stjórnmál hafa freistað mín og ég hef gaman af starfi mínu sem bæjarfulltrúi í Grindavík. Ég hafði engin áform um að leggja lóð mín á vogaskálar þeirra sem buðu fram til þings. Einfaldlega vegna þess að ekkert þeirra framboða sem þar var heillaði mig - fyrr en Viðreisn kom fram. Stjórnmálaafl sem er reiðubúið að leggja sig fram í mikilvægar kerfisbreytingar sem munu skila sér verulega til almennings í landinu. Stjórnmálaflokkar og stjórnvöld eiga alltaf að setja almannahagsmuni ofar sérhagsmunum. Þetta ein af grunnstefnum Viðreisnar. Það skiptir máli að rugla ekki kjósendur með orðagjálfri. Stefnan þarf að vera skýr og kjósendur þurfa að meta nokkra kosti áður en þeir ganga að kjörborðinu 29. október næstkomandi. Skýr stefna og raunhæfar leiðir skipta máli. Það er aldrei sanngjarnt að boða óraunhæfa kosti eða stefnu sem kallar á verulega aukið fjármagn á sama tíma og við viljum hóflegar álögur. Forgangsröðun þarf að vera á hreinu. Þau eru fjölmörg stefnumál Viðreisnar. Eitt þeirra eru nýjar leiðir í kvótakerfinu. Leiðir sem kollvarpa engu en skila auknum auðlindatekjum til þeirra sem auðlindina eiga - þjóðarinnar. Umræðan um auðlindir landsins og nýtingu þeirra hefur verið mikið í umræðunni. Viðreisn ætlar að beita sér fyrir markaðslausn í sjávarútvegi. Það er stefna okkar að auka tekjur ríkisins af sjárvarauðlindinni með því að fara svokallaða markaðsleið. Hluti (3-5%) þess heildarkvóta sem úthlutað er ár hvert er boðinn upp árlega á markaðsvirði. Við trúum því að með þeirri leið sé ekki verið að ógna rekstargrundvelli þeirra fyrirtækja sem stunda sjávarútveginn en sanngjarnt markaðsverð fyrir þann kvóta sem færi á uppboð myndi skila sér til þjóðarinnar. Það verði ekki í höndum stjórnvalda að ákveða hversu hátt auðlindagjaldið ætti að vera. Því yrði einfaldlega skipt út fyrir tekjurnar af uppboðskvótanum. Nýtingartími þessa uppboðskvóta yrði sá sami og þeirra sem hafa afnot á núverandi kvóta. Það hefur í gegnum tíðina mikið verið rætt um sanngirni þess hvernig kvótanum var úthlutað fyrir þremur áratugum þegar kvótakerfið var sett á. Það er ekki sanngjarnt að færa óréttlæti af einum stað yfir á annan. Þessa lausn tel ég vera best til þess fallna til að sætta málefnin er varða sjávarauðlindina og þær tekur sem af henni skapast. Kosningar til Alþingis eru handan við hornið. Einhverjar þær mikilvægustu og þýðingarmestu í sögunni. Það verður kosið um kerfisbreytingar í þágu þjóðarinnar. Það verður kosið um almannahagsmuni ofar sérhagsmunum. Fyrir þeim breytingum mun Viðreisn standa.     Kristín María Birgisdóttir skipar 5. sæti á lista Viðreisnar í Suðurkjördæmi.

Ari Trausti - Ferðaþjónustan: Meira þarf til.

Margir benda á að megingagnrýni á þróun ferðaþjónustunnar varði sein viðbrögð opinberra aðila og einkageirans við álaginu. Byggðir, bæir, borgin og ólíkir geirar samfélagsins hafa misvel skilgreinanleg þolmörk frammi fyrir þjónustuhlutverki sínu; ekki bara ein heldur mörg. Íbúar bæja og héraða persónuleg þolmörk, annað atvinnulíf en ferðaþjónusta hefur þolmörk og innviðir hafa þolmörk o.s.frv. Þar í blandast ólíkar skoðanir á hvað er réttara en annað þegar ferðaþjónustulestin æðir áfram, sífellt hraðar. Það er flókið verk að búa þannig um að þessi þolmörk séu sæmilega ljós og í samræmi við lýðræði. Til þess þarf frumkvæði einkaaðila, samtaka og umfram annað: Stjórnvalda á stigi sveitastjórna og ríkisvalds. Þolmörk umhverfis, bæði þess manngerða og náttúrunnar, eru líka til. Allar umhverfisnytjar og þá sér í lagi náttúrunytjar hafa sín þolmörk. Um þau hefur þegar verið rætt en þau sjaldan tengd við raunveruleikann, þ.e. blússandi fjölgun dýrmætra ferðamanna sem verða sennilega nær áttfaldur fjöldi fullorðinna landsmanna við árslok 2016 og 2,4M á næsta ári. Vegvísir í ferðaþjónustu (október 2015) sem Samtök ferðaþjónustunnar og Atvinnuvega- og nýsköpunarráðuneytið stóðu að er einungis grunnur að stefnu; langur verkefnalisti. Stefnan sjálf verður til þegar unnið er úr þessum vegvísi, hann bundinn áætlunum, hengdur verðmiði á mikilvæg atriði og ákveðið hvernig peninganna er aflað. Lítið hefur enn sést til þess alls og er þá ekki gert lítið úr auknum fjárveitingum eða nýjungum. Heildina vantar. Inn í alla þá vinnu verður að flétta þolmörkum. Fyrsta skrefið er að viðurkenna að ferðaþjónusta lýtur ekki ósvipuðum takmörkum og aðrar náttúru- og samfélagsnytjar - ef við viljum halda uppi fjölbreyttu mannlífi, fjölbreyttri atvinnu og áhugaverðu náttúruumhverfi. Annað skrefið felst í að ræða og ákvarða aðferðir við að stýra uppbyggingunni jafnt sem álagi á fólk og umhverfi. Sjálfbær ferðaþjónusta er markmið, ekki satt?   Ari Trausti Guðmundsson skipar 1. sæti á lista VG í Suðurkjördæmi.

Bæjarráð - Neita að greiða til húsmæðraorlofs í nafni jafnréttis

Meirihluti Sjálfstæðismanna í bæjarráði neitaði ósk Orlofsnefndar húsmæðra í Vestmannaeyjum um að Vestmannaeyjabær greiði samkvæmt lögum til orlofsnefndar vegna ársins 2016. Einnig er óskað eftir svari hvort sveitarfélagið hyggist greiða styrkinn vegna ársins 2017.   Meirihlutinn vísaði til 1. gr. laga um jafna stöðu og jafnan rétt kvenna og karla hljóðar svo: „Markmið laga þessara er að koma á og viðhalda jafnrétti og jöfnum tækifærum kvenna og karla og jafna þannig stöðu kynjanna á öllum sviðum samfélagsins.“     Minnt var á að í kjölfar fyrirspurnar Vestmannaeyjabæjar árið 2007 svaraði Jafnréttisstofa því til að hún teldi líkur á að lög um orlof húsmæðra teljist brot á lögum um jafna stöðu og jafnan rétt kvenna og karla. Stofan áréttaði þó jafnframt að það sé Alþingis að afnema hin umræddu lög.   Bæjarráð minnti einnig á að á fundi bæjarstjórnar kvenréttindadaginn 19. júní 2008 samþykkti bæjarstjórn ályktun þess efnis að skorað yrði á Alþingi að afnema lög um orlof húsmæðra.   „Bæjarráð Vestmannaeyja er eins og bæjarstjórn einbeitt í vilja sínum að hafa jafnrétti að leiðarljósi í öllu sínu starfi. Með ofangreint að leiðarljósi staðfestir bæjarráð að ekki verði greitt út fjármagn til húsmæðraorlofs árið 2016,“ segir í bókun meirihlutans en Stefán Óskar Jónasson, oddviti Eyjalistans lét bóka að hann sé hlynntur því að Orlofsnefnd húsmæðra í Vestmannaeyjum fá styrkinn og gert verði ráð fyrir styrknum í fjárhagsáætlun 2017.    

Erna Ingólfsdóttir: Gríðarlega spilling innan norska barnaverndarkerfisins

Eyjakonan Erna Ingólfsdóttir sem heldur úti Facebook-síðu og stendur fyrir undirskriftasöfnun þar sem skorað er á íslensk stjórnvöld að hafa afskipti af barnaverndarmálum í Noregi kveðst vita af 25 íslenskum fjölskyldum sem hafa misst börnin sín til barnaverndar í Noregi. Visir.is greindi frá   Alls er um að ræða á milli 60 og 70 íslensk börn að sögn Ernu en rætt var við hana í Reykjavík síðdegis í dag. Þá segir Erna jafnframt að hún telji norsk barnaverndaryfirvöld hafa fjárhagslegan ávinning af því að ná til sín sem flestum börnum.   Vísir hefur undanfarið fjallað ítarlega um mál íslensks drengs sem senda á héðan til Noregs að kröfu norskra barnaverndaryfirvalda. Málið hefur vakið mikla athygli og hafa þingmenn meðal annars gert það á umtalsefni á Alþingi og hvatt innanríkisráðherra til að beita sér í málinu.   Málið sem Erna tengist kom upp árið 2013 en þá voru börn bróður hennar voru tekin af honum árið 2013 af norskum barnaverndaryfirvöldum. Var Erna ein þeirra sem stóð fyrir mótmælum gegn starfsháttum barnaverndar á Íslandi í vor en þá var norskum barnaverndaryfirvöldum mótmælt víða um heim.   „Það sem við stefnum á er að íslensk stjórnvöld viðurkenni þennan vanda sem er þarna úti sem er gríðarlega mikill og mörg lönd eru búin að senda formlega kvörtun til Noregs varðandi það hvernig farið er með þeirra þegna. Við erum að berjast fyrir að íslensk stjórnvöld geri það sama. Maður þarf eiginlega að krefjast þess því hlutirnir hafa gengið svo langt að það er eiginlega ekki hægt að lýsa því ,“ segir Erna.   Aðspurð hvort hægt væri að gera sér einhverja grein fyrir því af hverju þessi að því er virðist óbilgirni norskra barnaverndaryfirvald og hvort verið geti að þau hafi einhvern fjárhagslegan ávinning af því að taka til sín sem flest börn segir Erna:   „Sjálfsagt hefur barnaverndarnefnd verið í upphafi eins og alls staðar annars staðar en í dag er þetta orðin mikil peningaspilling. Það eru einkarekin fósturheimili úti sem að hafa mikla peninga upp úr þessu og að þetta skuli þrífast í landi eins og Noregi skilur maður engan veginn. Þá hafa fósturforeldrar mjög gott upp úr því að hætta að vinna og gerast fósturforeldrar en þeir geta verið með 600-700 þúsund tekjur á mánuði plús alls konar aukabónusa. Það er orðin gríðarleg spilling í þessu kerfi, það er ekki hægt að segja það á neinn annan hátt.“  

Elliði - Betra að stjórna og bera þannig raunverulega ábyrgð

„Það er afstaða okkar í bæjarstjórn að rekstur Herjólfs sé ekki bara hluti af innrigerð samfélagsins heldur í raun horsteinn innrigerðarinnar. Í honum er fólgin grunnþjónusta í nærumhverfi bæjarbúa. Ítrekað hefur það gerst að ábyrgð á slíkum málaflokkum eru fluttir frá ríki til sveitarfélaga og þá gerist það ekki í gegnum útboð heldur í gegnum samninga milli þessara tveggja stjórnsýslustiga. Dugar þar að vísa til málefna fatlaðra, rekstur grunnskóla, rekstur heilsugæslu og margt fl. Með þessari samþykkt erum við að falast eftir því að taka þetta verkefni yfir á sama máta,“ segir Elliði Vignisson, bæjarstjóri í Vestmannaeyjum um ósk bæjarstjórnar um að samið verði beint við hana um rekstur nýrra Vestmannaeyjaferju.   „Það er afstaða okkar hagsmuna bæjarbúa sé ekki nægilega vel gætt í dag. Með þessu er á engan veg máli hallað gagnvart núverandi rekstraraðila enda algerlega kýrskýrt að einkafyrirtæki er eingöngu ábyrgt fyrir því að framfylgja samning en ekki að gæta að samfélgagslegum hagsmunum. Það er langtum frekar samningurinn sjálfur og eftirlit með honum sem við gagnrýnum. Þar er hagsmunum okkar ekki nægilega vel gætt og kemur það til að mynda í ljós með hversu fáar ferðir eru sigldar á áætlunartímum, hversu há gjöld eru lögð á okkur í siglingum í Þorlákshöfn og svo margt fl.   Í viðbót við þetta þá hefur hvorki okkur né öðrum bæjarbúum dulist að bæjarstjórn er ítrekað gerð ábyrg fyrir þessum málaflokki og dregst ítrekað inn í umræðuna. Það er hinsvegar vont að vera gerð ábyrg fyrir einhverju af bæjarbúum en hafa ekki nokkur tök á að hafa bein áhrif. Þá er hreinlega betra að stjórna og bera þannig raunverulega ábyrgð,“ segir Elliði.    

Jóna Sólveig Elínardóttir leiðir lista Viðreisnar í Suðurkjördæmi

Framboðslisti Viðreisnar fyrir Suðurkjördæmi fyrir alþingiskosningarnar 29. október næstkomandi er tilbúin. Listinn er fléttulisti með konur og karla til jafns. Athygli vekur að enginn Vestmanneyingur er á lista Viðreisnar.   Framboðslistinn er þannig skipaður. 1. Jóna Sólveig Elínardóttir, aðjúnkt, Mýrdalshreppi 2. Jóhannes Albert Kristbjörnsson, lögmaður, Reykjanesbæ 3. Ingunn Guðmundsdóttir, deildarstjóri, Selfossi 4. Gunnar Þórarinsson, viðskiptafræðingur, Reykjanesbæ 5. Kristín María Birgisdóttir, kennari, Grindavík 6. Sigurjón Vídalín Guðmundsson, jarðfræðingur, Eyrarbakka 7. Þóra G. Ingimarsdóttir, framkvæmdastjóri í ferðaþjónustu, Suðursveit 8. Skúli Kristinn Skúlason, sjómaður, Þorlákshöfn 9. Júlía Jörgensen, stjórnmálafræðingur, Reykjanesbæ 10. Haukur Már Stefánsson, verkfræðingur, Hveragerði 11. Sigurbjörg Björgvinsdóttir, hjúkrunarfræðingur, Selfossi 12. Skúli Thoroddsen, lögfræðingur, Reykjanesbæ 13. Guðbjörg Ingimundardóttir, sérkennari, Reykjanesbæ 14. Arnar Páll Guðmundsson, viðskiptafræðingur, Reykjanesbæ 15. Þórunn Benediktsdóttir, framkvæmdastjóri hjúkrunar, Reykjanesbæ 16. Agnar Guðmundsson, tölvunarfræðingur, Reykjanesbæ 17. Iwona Zmuda Trzebiatowska, starfsmannastjóri, Vík i Mýrdal 18. Róbert Ragnarsson, stjórnmálafræðingur, Grindavík 19. Heiða Björg Gústafsdóttir, sjúkraliði og hjúkrunarfræðingur, Reykjanesbæ 20. Bergsteinn Einarsson, framkvæmdastjóri, Selfoss    

Myndasafnið >>

Öldudufl við Landeyjahöfn

Öldudufl við Landeyjahöfn

Stjórnmál >> Mest lesið

Greinar >>

Menningarverðmæti Eyjamanna lokuð ofan í kössum

Ég er hugsi yfir menningarverðmætum okkar Eyjamanna og hvernig við eigum að halda sögu okkar á lofti. Eftir því sem ég kemst næst er töluvert af menningarmunum okkar geymdir í kjallara Safnahússins og á lofti Miðstöðvarinnar við Strandveg. Ég leiddi hugann að þessu þegar ég sá gamlar ljósmyndir af heimili hér í Eyjum. Á einni myndinni voru stórkostlegir munir sem aðstandendur gáfu byggðasafninu á sínum tíma. Nú eru þessir munir geymdir ofan í kössum í stað þess að þeim sé sómi sýndur með því að hafa þá til sýnis á safni, fyrir almenningssjónum. Þetta nær auðvitað ekki nokkurri átt. Allir munir sem geymdir eru í kjallara Safnahússins og á lofti Miðstöðvarinnar eru menningarverðmæti þeirra sem byggðu upp samfélagið okkar, Vestmannaeyjar. Við eigum að virða söguna og halda henni á lofti. Eitthvað er um að þessir munir séu dregnir fram í dagsljósið úr geymslunum annað slagið. En að mínu viti er það ekki nóg. Það þarf að koma þeim öllum á einn stað þar sem safnið og þar af leiðandi sagan er sýnd gestum og gangandi. Safnahúsið hefur fyrir löngu sprengt starfsemina utan af sér en Helga Hallbergsdóttir og Kári Bjarnason ásamt öðru starfsfólki safnsins vinna þar mjög gott starf miðað við aðstæður. Nýtt og/eða stærra Safnahús eða Byggðasafn, sem sýndi okkur og gestum og gangandi alla þessa muni sem tengjast sögu Eyjanna væri sannarlega rós í hnappagat bæjaryfirvalda. Við skulum ekki gleyma forfeðrum okkar sem byggðu upp Eyjarnar með mikilli vinnu og eljusemi og lögðu grunninn að samfélagi okkar í dag. Sýnum þeim virðingu okkar þannig að við getum verið stolt af. Sýnum munina frá heimilum forfeðra okkar sem draga upp söguna og svipmyndir forfeðra okkar, sorgir og sigra. Eldheimar risu á mettíma og ekkert var til sparað enda verið að segja stórbrotna sögu. Það ætti því ekkert að vera því til fyrirstöðu að koma upp nýju Safnahúsi sem við getum öll verið stolt af. Saga Vestmannaeyja er ótrúlega viðburðarík og kraftmikil og við þurfum að gera henni góð skil.